Gazetarët dhe punonjësit e medias duhet të kenë të njëjtën mbrojtje ligjore ashtu si mjekët, punonjësit të policisë dhe funksionarët e lartë publikë, sa i takon kanosjes dhe dhunës për shkak të detyrës. Kështu parashikon një projektligj, për ndryshimin e Kodit Penal, i propozuar nga deputetja Ina Zhupa. Edhe pse nisma ligjore është depozituar në Kuvend që në 7 shkurt të vitit 2023, ende nuk ka nisur shqyrtimi në komisionet parlamentare, ku për rrjedhojë nuk ka një qëndrim nga grupet parlamentare nëse janë pro apo kundra. 

Nisma ligjore shton një paragraf në nenin 237 të Kodit Penal, vepra penale goditje për shkak të detyrës, duke parashikuar që dhuna ndaj gazetarit, operatorit, fotoreporterit apo punonjësit të mediave, dënohet nga një deri në 5 vite burg. Kodi Penal në fuqi parashikon një dënim nga 1 deri në 3 vite burg për goditjen ose dhunën për shkak të detyrës. Kodi në fuqi parashikon 1 deri në 5 vite burg vetëm për dhunën ndaj mjekëve, punonjësit të policisë, deputetët, kryebashkiakët apo funksionarit publik. 

Projektligji i propozuar shton një paragraf edhe në nenin 238 të Kodit Penal, vepra penela ‘Kanosja për shkak të detyrës’, duke parashikuar që kanosja ndaj gazetarit, operatorit, fotoreporterit apo punonjësit të mediave, dënohet nga një deri në 3 vite burg. Kodi Penal në fuqi parashikon një dënim deri në dy vjet, pra pa një kufi minimal, duke krijuar hapësirë që një kanosës mund edhe të mos dënohet fare. Propozimi parashikon për herë të parë një dënim minimal 1 vit burg, dhe atë maksimal deri në 3 vite burg, ashtu siç edhe parashikohet për mjekët, policët dhe të zgjedhurit. 

Në relacionin që shoqëron projektligjin, thuhet se “Punonjësit e medias në Shqipëri përballen me sulme dhe përpjekje për censurë, që sipas gazetarëve e përfaqësuesve të organizatave të medias kalojnë pa u ndëshkuar. Shqetësimet janë ngritur disa herë edhe nga Këshilli i Evropës dhe organizatat e mbrojtjes se mediave, vendase apo të huaja. Ekspertët e lirisë së shtypit dhe mediave kanë konstatuar se në vitin 2021, nga 6 raste të dhunës ndaj gazetarëve në Shqipëri të raportuar nga "Safe Journalist", asnjë nuk ishte zbardhur dhe askush nuk ishte ndëshkuar. Roli i organeve shtetërore në parandalimin e rasteve të dhunës apo intimidimit ndaj gazetarëve, kërkon që këto raste të parandalohen por edhe të ndëshkohen më rëndë, pikërisht nëpërmjet një kuadri penal me të ashpër”.