Rekomandimet e qeverisë për SPAK dhe Prokuroritë/ Gogu: Luftë evazionit e pastrimit të parave! Braho: Duhet më shumë buxhet, korrupsioni s’luftohet vetëm nga një institucion

Qeveria prezantoi rekomandimet për SPAK-un dhe prokuroritë e juridiksionit të përgjithshëm për vitin 2026, në 8 fusha kryesore dhe të fokusuara te lufta kundër krimit financiar, pastrimit të parave dhe evazionit fiskal. Ministri i Drejtësisë, Toni Gogu, vlerësoi arritjet e SPAK gjatë vitit 2025, duke thënë se Prokuroria e Posaçme ka rritur me 19.8% hetimet e nisura kryesisht, ndërsa ka ulur me 78% stokun e dosjeve të mbartura.

Gogu theksoi se rekomandimet fokusohen tek fushat ku ka ende hapësira për përmirësim, siç janë forcimi i hetimeve financiare, një fushë ku qeveria kërkon më shumë rezultate nga prokuroritë. Gogu tha se evazioni fiskal nuk duhet parë vetëm si shkelje tatimore, por si kërcënim për konkurrencën e ndershme dhe rendin ekonomik, ndaj kërkohet shtim i hetimeve proaktive nga prokuroritë.

“Risitë e rekomandimeve për vitin 2026 do t’i përmblidhja në tre shtylla. E para lidhet me evazionin fiskal, i cili nuk duhet parë thjesht si një çështje tatimore, por si një element themelor për rendin ekonomik dhe konkurrencën e ndershme. Kjo do të kërkojë intensifikimin e hetimeve proaktive nga prokuroritë”, tha Gogu.

LEXO EDHE:
Lufta kundër krimit e korrupsionit/ Gonzato: Nevojiten hetime financiare sistematike dhe konfiskime të shpejta të aseteve

Një tjetër prioritet është lufta kundër krimit kibernetik dhe pastrimit të parave. Sipas ministrit, sot pastrimi i parave kryhet gjithnjë e më shpesh përmes kriptovalutave, ndërsa mashtrimet zhvendosen në platformat online. Për këtë arsye, qeveria kërkon ngritjen e njësive të specializuara brenda prokurorive, të afta për të hetuar dhe ndjekur në mënyrë efektive këto forma moderne të krimit.

“Shtylla e dytë lidhet me krimin kibernetik dhe format e reja të kriminalitetit. Sot, pastrimi i parave kryhet gjithnjë e më shpesh përmes kriptovalutave, ndërsa mashtrimet zhvillohen në platforma online. Për këtë arsye, në rekomandimet për vitin 2026 kërkojmë ngritjen e njësive të specializuara brenda prokurorive, të afta për të hetuar dhe ndjekur në mënyrë efektive këto forma moderne të krimit”, tha Gogu.

Aksidentet e fundit rrugore me pasoja fatale, të cilat iniciuan deri në ndërmarrjen e nismës për ndryshime në Kodin Rrugor, janë në mesin e rekomandimeve dhe qeveria kërkon më shumë efektivitet të hetimeve.

“Së treti, lidhet me kriminalitetin rrugor, i cili sipas rekomandimeve për vitin 2026 duhet të trajtohet me një fokus më të shtuar nga organet e drejtësisë”, theksoi Gogu.

Kreu i SPAK-ut, Klodian Braho, tha se sfidat e reja në luftën kundër krimit kërkojnë investime shtesë, më shumë buxhet dhe teknologji moderne.

“Sfidat e reja duhet që të shoqërohen edhe me mbështetje buxhetore, që të luftohet pastrimi i parave”, tha Braho.

Ai theksoi se krimi i organizuar tashmë vepron përtej kufijve kombëtarë dhe se lufta kundër korrupsionit nuk mund të fitohet nga një institucion i vetëm.

“Lufta ndaj krimit e korrupsionit nuk mund të bëhet vetëm nga një institucion i vetëm. Duhet një bashkëpunim gjithnjë e më i madh me Policinë e Shtetit dhe të gjitha institucionet e tjera”, deklaroi kreu i SPAK-ut.

Prokurori i Përgjithshëm, Olsian Çela, bëri një bilanc të punës që juridiksioni i përgjithshëm ka bërë për asetet e sekuestruara. I kënaqur me punën, u kujdes të cekte faktin se “jo të gjithë e kanë parë”.

"Lidhjet me hetimin financiar me goditjen e as kriminale. Më duhet ta theksoj edhe pse kjo ka shkuar shpesh pa u vënë re, nuk i të di arsyet. Në vitin 2024 u sekuestruan mbi 60 milionë euro dhe në vitin 2025 mbi 40 milionë euro asete”, tha ai.

Rekomandimet e Këshillit të Ministrave për prokuroritë në vend nuk janë direktiva, por orientim i politikës penale të shtetit. Organet e hetimit, përpiqen të kuptojnë nevojat edhe për shkak të direktivave dhe orientimeve për vijimësinë e procedurave për anëtarësimin në Bashkimin Evropian.

 

SI.E./A.M/Shqiptarja.com

TAG:
• spak
• korrupsion
• prokuroria e pergjithshme
• ministria e drejtesise
• klodian braho
• toni gogu
• Olsian Çela
• evazion fiskal
• pastrim parash