TIRANË- Deri me datë 15 mars, çmimi i naftës në vend do të jetë 217 lekë, nga 223 që tregonin pikat e karburanteve mëngjesin e kësaj të shtune, ai i benzinës 217, ndërsa gazi 93 lekë për litër. Ky vendim u mor sot, në mbledhjen e parë të Bordit Kombëtar të Administrimit të Karburantit me furnizuesit e naftës në vend. Mbledhja u zhvillua në Ministrinë e Financave.

Çdo pikë karburanti në vend është i detyruar të zbatojë këtë vendim, teksa organet ligjzbatuese do të bëjnë çdo ditë kontrolle në terren. Ndërkohë, nga një vëzhgim i bërë nga Report Tv, rezulton se pikat e karburanteve në vend kanë zbatuar këtë vendim.

Një ditë më parë Rama paralajmëroi se kushdo që do vendosë çmim tjetër nga ai i vendosur nga Bordi, do të humbasë pikën e karburantit. 

Ndërkohë, bëhet me dije se Bordi i Transparancës do mblidhet përsëri ditën e martë, më 15 mars me qëllim pasqyrimin në çmimin e shitjes me pakicë të këtyre nënprodukteve, të ndryshimeve të mundshme të çmimeve në tregjet ndërkombëtare.

Bordi i  Administrimit të Karburanteve u mblodh sot menjëherë pas miratimit të aktit normativ nga Këshilli i Ministrave. Kujtojmë se anëtarë të këtij Bordi janë: ministrja Belinda Balluku, ministrja e Financave, Delina Ibrahimaj, drejtori i drejtorisë së Tatimeve, Ceno Klosi, drejtori i drejtorisë së Doganave, Gent Gazheli si dhe kryetari i Autoritetit të Konkurencës, Denar Biba.

Ngritja e çmimit të naftës dhe produkteve të shportës ka shkaktuar reagimin e qytetarëve, të cilët kanë organizuar protesta në disa qytete, teksa janë ngritur në protestë sërish sot, për të katrën ditë radhazi, që prej orës 11:00

Rendit zhvillimet sipas orarit:
Ora 14:38
Rama publikon foton: Si ndryshoi çmimi i naftës pas vendimit të Bordit

Kryeministri Edi Rama ka publikuar një foto që thekson se si ka ndryshuar çmimi i naftës, nga rritja që pësoi pas luftës dhe te ulja deri në 217 lekë për litër pas vendimit të Bordit Kombëtar të Administrimit të Karburanteve.

 

1647092324_page.jpg

Foto e publikuara nga kryeministri Edi Rama

B.K./Shqiptarja.com

Ora 13:56
Pikat e karburanteve zbatojnë vendimin e Bordit të Administrimit, çmimi i naftës 217 lekë për litër

 

Pikat e karburanteve në vend kanë nisur zbatimin e vendimit të Bordit të Administrimit të Karburantit në vend, duke vendosur çmimin e naftës 217 lekë për litër. Ky vendim u mor sot gjatë mbledhjes së bordit me përfaqësuesit e furnizuesve të naftës dhe do të jetë në fuqi deri më 15 mars, ku do të zhvillohet edhe mbledhja e radhës.

Ora 12:27
Bordi Kombëtar i Administrimit të Karburantit merr vendimin: Sot çmimi i naftës 217 lekë, nga 223! VENDIMI I PLOTË

Ulja sot e çmimit të naftës nga 223 lekë në 217 është vendimi i marrë nga Bordi Kombëtar i Administrimit të Karburantit në mbledhjen e parë ët zhvilluar këtë të shtunë.

"Në mbledhjen e tij të datës 12 Mars 2022 Këshilli i Ministrave,  miratoi  Aktin Normativ
“PËR DISA SHTESA DHE NDRYSHIME NË LIGJIN 8450, DATË 24.2.1999 “PËR PËRPUNIMIN, TRANSPORTIMIN DHE TREGTIMIN E NAFTËS TË GAZIT DHE NËNPRODUKTEVE TË TYRE”. 
Nëpërmjet këtij akti normativ normohen dhe monitorohen çmimet e shitjes së nënprodukteve të naftës për  konsumatorët.
Në zbatim të këtij Akti Normativ u mblodh menjehere Bordi i Transparancës dhe kufizimit të përkohshëm të çmimeve të tregtimit me shumicë/pakicë të nënprodukteve të naftës dhe gazit,.
Në mbledhjen e tij të parë, dhe bazuar në metodologjinë e ndërtimit të çmimeve sipas nenit  21/5 të Aktit Normativ vendosi:
 
1.       Cmimi i shitjes me pakicë të nënproduktit gasoil i standardit SSH EN 590 për periudhën 12 Mars-15 mars 2022,  të  jetë 217 lekë/litri.
2.       Cmimi i shitjes me pakicë të nënproduktit benzinë e standardit SSH EN 228  për periudhën 12 Mars-15 mars 2022,  të  jetë 217 lekë/litri.
3.       Cmimi i shitjes me pakice të  nënproduktit gaz për periudhën 12 Mars-15 mars 2022,  të jetë 93 lekë/litri.
Bordi i Transparancës do mblidhet përsëri ditën e martë, datë 15.03.2022 me qëllim pasqyrimin në çmimin e shitjes me pakicë të këtyre nënprodukteve, të ndryshimeve të mundshme të çmimeve në tregjet ndërkombëtare.
Cdo operator i shitjes me shumicë dhe pakicë të nënprodukteve të naftës, është i detytuar të zbatojë Vendimin e Bordit të Transparencës në lidhje më çmimet e shitjes me shumicë dhe pakicë.
Organet ligjzbatuese do kontrollojnë zbatimin e vendimeve të Bordit të Transparencës çdo ditë
Në rast të shkeljeve të konstatuara nga operatorë të ndryshëm, do të zbatohen penalitetet e përcaktuara në Aktin Nortmativ", thuhet në vendimin e Bordit. 

Ora 08:19
Ngrihet Bordi i Administrimit të Karburantit, Rama: Nga sot çmimet do kalojnë në filtrin e transparencës, s'lejojmë abuzim në kurriz të qytetarëve

1646727070_rama1.jpg

Duke nisur nga kjo e shtunë, çmimet e karburantit në vend do të kalojë në filtrin e transparencës. Kështu bën me dije kryeministri Edi Rama nëpërmjet një postimi në Facebook, ku shkruan se në asnjë pikë karburanti nuk do të ketë çmim të vendosur pa miratimin e Bordit Kombëtar të Administrimit të Karburantit, që u ngrit ditën e sotme.

Kryeministri thekson se marzhi i fitimit të kompanive do të ngrijë dhe nuk do të lejohet abuzimi në kurriz të qytetarëve.    

"Mirëmëngjes  dhe me konfirmimin se nga sot, me ngritjen e Bordit Kombëtar të Administrimit të Karburantit, çmimet do të kalojnë në filtrin e transparencës dhe marzhi i fitimit të kompanive do të ngrijë, për të mos lejuar asnjë abuzim në kurriz të qytetarëve, ju uroj një fundjavë të mbarë", shkruan Rama.