Ruçi, uron kryeparlamentarin e Japonisë për Festën Kombëtare: Jeni ndër donatorët më të rëndësishëm për Shqipërinë

Kryetari i Kuvendit, Gramoz Ruçi, i ka dërguar një letër urimi Kryetarit të Dhomës së Përfaqësuesve të Japonisë, Tadamori Oshima, me rastin e Festës Kombëtare.

Ruçi në letër shkruan se marrëdhëniet mes Shqipërisë dhe Japonisë janë shumë të mira dhe se vitin që vjen marrëdhënia mes 2 vendeve mbush 1 shekull.

Kryetari i Kuvendit përmes letrës së tij ka shprehur edhe mirënjohjen lidhur me mbështetjen e Japonisë, pasi është një nga donatorët më të rëndësishëm për Shqipërinë.

“Me rastin e Festës Kombëtare, Ditës së Themelimit të Japonisë, Ju dërgoj përshëndetjet më të përzemërta të Kuvendit të Shqipërisë dhe të miat personale.  Kremtimi i kësaj date të shënuar të themelimit dhe historisë së kombit japonez është një rast për të ridëshmuar dashurinë dhe përkushtimin për kombin dhe të ardhmen e tij.

Marrëdhëniet ndërmjet Shqipërisë dhe Japonisë janë shumë të mira dhe vitin që vjen marrëdhëniet tona dypalëshe mbushin një shekull.

Gjej rastin të shpreh mirënjohjen për ndihmën e dhënë gjatë këtyre viteve nga Japonia, e cila është një nga vendet donatore më të rëndësishëm për Shqipërinë, duke dhënë rreth 400 milion USD mbështetje financiare në formë grantesh, asistencë për bashkëpunim ekonomik, kredi të buta në arsim, shëndetësi, infrastrukturë, mjedis, energjetikë etj. 15 marrëveshje janë nënshkruar mes dy vendeve, ndërkohë që disa të tjera janë në proces.

Dëshiroj, gjithashtu, të vlerësoj  rritjen e interesit gjeopolitik të Japonisë për rajonin, nëpërmjet Iniciativës së Bashkëpunimit me Ballkanin Perëndimor, e cila krijon mundësi të reja bashkëpunimi me Shqipërinë dhe vendet e rajonit.”, shkruan në letrën e urimit Kryetari i Kuvendit, z. Gramoz Ruçi.

J.GJ./Shqiptarja.com

TAG:
• gramoz ruçi
• Japoni
• shqiperi-japoni
• tadamori oshima