'Partizani'/ Berisha drejt arrestimit, Kuvendi i jep autorizimin SPAK-ut me 75 vota pro! 'Lejen' ia dërgon në zyrë! Mungon në seancë PD e Bashës

Ministrja për Shtetin dhe Parlamentin Elisa Spiropali sheh si pozitive zhvillimet e SPAK-ut në raport me Sali Berishën. Pasi Kuvendi i hoqi sot imunitetin Berishës dhe i dha autorizim SPAK-ut të ndërmarrë masë ndaj arresti ndaj ish-kryeministrit, Spiropali ka përshkruar situatën me një thënie të shkrimtarit dhe dramaturgut të njohur anglez William Shekspir.

‘S'ka natë që s'ka të gdhirë, sado qoftë e gjatë.’- shkruan ministrja socialiste teksa ka publikuar edhe një bardhezi të Sali Berishës.

Pas heqjes së imunitetit Sali Berisha tha se do të këshillohet me avokatët e tij se si do të veprojë për vendimin që do të marrë Gjykata e Posaçme ndaj tij.

Prononcimi i Berishës te selia blu

Berisha: E patë se cili ishte ligji. Cilido që lexon procedurën dhe sheh, sheh një bandë antikushtetuese në veprim. Kjo është e vërteta.

Pyetje: Cilat do të jenë hapat që do të ndërmarrë PD...

Berisha: Partia Demokratike do të marrë çdo masë për ti dhënë përgjigje Edi Ramës. 

Pyetje: Keni zhvilluar takime me deputetët sot, çfarë këshillash i keni dhënë, për çfarë diskutuat.

Berisha: Bisedat private nuk mund të jenë objekt. O sot o kurrë, kjo është motoja. 

Pyetje: Cili ishte reagimi i deputetëve, a e aprovuan këtë kërkesë tuaj... 

Berisha: I shkëlqyer, i shkëlqyer. 

Pyetje: Nëse gjykata merr vendimin për arrest në shtëpi apo në seli...

Berisha: Çështje që do të diskutohet me avoketërit

Kuvendi i dërgon SPAK-ut vendimin për autorizimin e arrestimit të Sali Berishës. Report Tv sjell momentin kur postieri dorëzoi në SPAK të protokolluar vendimin e marrë nga pushteti legjislativ në sencën plenare të ditës së sotme (21 dhjetor).

Me xhup, xhinsa, syze dielli dhe çantë shpine postieri i hipur mbi një skuter ndalon para godinës së SPAK për të dorëzuar letrën.  

Pasi SPAK njoftohet zyrtarisht dhe njihet me relacionin e Kuvendit, i drejtohet Gjykatës së Posaçme, konkretisht gjyqtares Irena Gjoka për të kërkuar zëvendësimin e masës së sigurisë nga detyrim paraqitje dhe bllokim pasaporte, në masën arrest me burg apo arrest shtëpie.

Referuar procedurës ligjore, pas depozitimit të kërkesës së SPAK në gjykatë kjo e fundit ka 5 ditë kohë për shqyrtimin e saj.

Kuvendi miratoi sot kërkesën e SPAK për dhënien e autorizimit për arrestimin e ish-kryeministrit Sali Berisha.

Në këtë foto shihni disa nga momentet kur deputetët socialistë ngritën kartonin jeshil për arrestimin e Sali Berishës, ndërsa nga ana tjetër opozita ndezi tymuese ngjyrë blu.

Deputeti Erion Braçe shkoi në seancë me maskë, ndërsa ministri Taulant Balla apo deputeti socialist Fatmir Xhafaj u panë të buzëqeshur.

Në seancë ishte edhe kryeministri Edi Rama, i cili ngriti kartonin pro arrestimit të Berishës.

Verëm pak orë pasi miratoi me 75 vota pro Kuvendi i dërgoi SPAK-ut  pranimin e kërkesës për dhënien e autorizimit nga Kuvendi i Republikës së Shqipërisë për arrestimin/heqjen e lirisë së deputetit Sali Berisha, nëpërmjet zëvendësimit të masës së sigurimit.

REPUBLIKA E SHQIPERISE

KUVENDI

VENDIM

Nr. 127/2023

PËR KËRKESËN E PROKURORISË SË POSAÇME KUNDËR KORRUPSIONIT DHE KRIMIT TË ORGANIZUAR, TIRANË, PËR DHËNIEN E AUTORIZIMIT PËR ARRESTIMIN/HEQJEN E LIRISË SË DEPUTETIT SALI BERISHA, NËPËRMJET ZËVENDËSIMIT TË MASËS SË SIGURIMIT

Në mbështetje të nenit 73, pika 2, të Kushtetutës, nenit 288 të Kodit të Procedurës Penale dhe neneve 118, pikat 4 dhe 5, e 55 të Rregullores së Kuvendit, me rekomandim të Këshillit për Rregulloren, Mandatet dhe Imunitetin,

KUVENDI

I REPUBLIKËS SË SHQIPËRISË

VENDOSI:

I. Pranimin e kërkesës së Prokurorisë së Posaçme kundër Korrupsionit dhe Krimit të Organizuar, Tiranë, për dhënien e autorizimit nga Kuvendi i Republikës së Shqipërisë për arrestimin/heqjen e lirisë së deputetit Sali Berisha, nëpërmjet zëvendësimit të masës së sigurimit.

II. Ky vendim hyn në fuqi menjëherë.

Miratuar në datën 21.12.2023

KRYETARE

Lindita NIKOLLA

Tashmë ‘topi’ është në SPAK, i cili pritet t’i drejtohet GJKKO-së me kërkesën për arrest me burg ose arrest shtëpie për Berishën.

Seanca plenare e ditës së sotme që po ashtu zgjati rreth 8 minuta siç ka ndodhur së fundmi për shkak të kaosit të deputetëve të grupit Bardhi-Berisha, u përfshi sërish nga tymueset.

Këtë herë, nga fotot e publikuara nga LSA shihet deputeti Gazment Bardhi teksa i jep një çakmak Flamur Nokës dhe ky i fundit ndez tymueset me qëllim ndërprerjen e seancës plenare ku u votua heqja e imunitetit të deputetit Sali Berisha.

Por ndryshe nga seancat e kaluara, pas hyrjes në fuqi të rregullores së re të propozuar nga PS, deputetët që ndezin tymuese rrezikojnë përjashtimin deri në 60 ditë. 

Kuvendi i Shqipërisë votoi sot heqjen e imunitetit të deputetit Sali Berisha duke i hapur rrugë arrestimit të këtij të fundit pas kërkesës së SPAK.

Por cila është procedura që ndiqet pas votimit në Kuvend?

Një korrier i Kuvendit, paraqitet në SPAK dhe dorëzon të protokolluar vendimin e marrë nga pushteti legjislativ në sencën plenare të ditës së sotme (21 dhjetor). Pasi SPAK njoftohet zyrtarisht dhe njihet me relacionin e Kuvendit, i drejtohet Gjykatës së Posaçme, konkretisht gjyqtares Irena Gjoka për të kërkuar zëvendësimin e masës së sigurisë nga detyrim paraqitje dhe bllokim pasaporte, në masën arrest me burg apo arrest shtëpie.

Pas vendimit të gjykatës, agjentët e BKH dhe policia e shtetit ekzekuton vendimin për arrestin e Berishës.

Në më pak se 8 minuta, pa asnjë surprizë, me 75 votat e mazhorancës, Kuvendi miratoi kërkesën e SPAK për dhënien e autorizimit për ashpërsim të masës së sigurisë ndaj tij, pasi refuzoi të zbatonte vendimet e GJKKO-së.

Në momentin kur Berisha doli krah tij ishin deputetët Albana Vokshi, Tritan Shehu dhe Luçiano Boçi. Në një moment i dhanë të pijë ujë para se të afrohej tek grupi i vogël i militantëve që ishin mbledhur para kuvendit

Pasi Kuvendi votoi për heqjen e imunitetit të tij në kuadër të kërkesës së SPAK për ta arrestuar nën akuzën e korrupsionit për aferën ‘Partizani’, Berisha tha se vendimi i marrë për të do të dështojë.

Ai tha se votimi i Kuvendit për heqjen e imunitetit të tij, do të mobilizojë opozitën në shkallën më të lartë kundër qeverisë.

“Sot narko-parlamenti në një akt antikushtetues votoi në kundërshtim me procedurë kushtetuese dhe ligjore për heqjen e imunitetit dhe arrestimin tim. Në një mënyrë apo tjetër, Parlamenti sot vazhdoi veprën që dështoi me datën 9 shtator, 2 vite më parë por nëse dështoi me 9 shtator, iu garantoj se sot do jetë më i dështuar se kurrë. Se ky vendim jo që nuk do mund të realizojë qëllimin për shkatërrimin e opozitës por do ta na mobilizojë në shkallën më të lartë dhe nën moton “o sot o kurrë” do i japë përgjigjien këtij regjimi. Parlamenti nga klandestiniteti përfundoi në parlamentin e “vrimës së miut”. Edi Rama u fut sot nga tunelet e hapura që lidhin parlamentin me zyrën e Skënder Gjinushit. Beteja vijon më e fuqishme se kurrë më parë”- tha Berisha.

Kuvendi ka miratuar kërkesën e SPAK për dhënien e autorizimit për arrestimin e ish-kryeministrit Sali Berisha. Tashmë, Berisha do të përballet me drejtësinë pa imunitetin e deputetit.

Në më pak se 8 minuta, pa asnjë surprizë, 75 deputetë votuan pro kërkesës së SPAK duke i hapur kështu rrugë arrestimit të Sali Berishës mes tymueseve dhe kaosit të krijuar nga Rithemelimi.

Ashtu siç e parashikonte rregullorja, kryetarja e Kuvendi, Lindita Nikolla i dha fjalën Sali Berishës, por ky i fundit refuzoi.  Ai kërkoi që të hiqej garda e Republikës nga Foltorja, mirëpo një kërkesë e tillë nuk u mor parasysh, e për pasojë ish-kryeministri zgjodhi të heshtë.

Tashmë, SPAK do t’i drejtohet GJKKO me një kërkesë për shtrëngimin e masës së sigurisë për Sali Berishën, pasi ky i fundit nuk zbatoi masën e sigurisë detyrim paraqitjeje. SPAK do të kërkojë ose ‘arrest në shtëpi’ ose arrest në burg’.

Seanca plenare ku pritet të votohet kërkesa e SPAK për arrestimin e Berishës ka nisur me kaos.

Rithemelimi ka ndezur tymuese në Kuvend. Madje, ish-ministri i Brendshëm Flamur Noka, me tymuese në duar jua ka drejtuar në fytyrë punonjësve të Gradës.

Kryeministri Edi Rama është i pranishëm në seancën ku Kuvendi do të votojë për heqjen e imunitetit të Sali Berishës në kuadër të kërkesës së SPAK për arrestin e tij. 

Ndërkohë, nga ora 10:00, ka nisur edhe seanca e Kuvendit. 

Argita Berisha i është bashkuar protestës që babai i saj, drejt arrestimit, thirri para Kuvendit, ndërsa u miratua kërkesa e SPAK për dhënien e autorizimit për arrestimin e Berishës.

Në protestë u panë vetëm një grup i vogël militantësh të cilët u larguan për 1 orë, ndërsa në Kuvend tentuan skenarin e kaosit, por ndezën vetëm dy tymuese dhe më pas kërkesa e SPAK për arrestimin e Berishës u miratua.

Në një prononcim për median, Argita Berisha nuk e përjashtoi mundësinë që të bëhet pjesë e garës për drejtimin e partisë, megjithëse tha se kjo do të varet nga rrethanat.

“Vendimi i djeshëm i Gjykatës Kushtetuese ishte rënia e një tjetër institucioni ligjor. Njerëzit duhet të vrasin frikën. Berisha do ta udhëheqë opozitën, unë do të jap kontributin tim, ashtu siç kërkohet nga rrethanat, do të dalë në shesh e në çdo rrethanë. PD është një strukturë e mirëorganizuar, nuk është një grupim që veprohet në mënyrë spontane, kjo është përgjigja ime. Nuk mund ta them këtë, nuk është në planet e mia.– tha Argita Malltezi.

Argita u shfaq edhe në protestën e kaluar, kur Këshilli i Mandateve shqyrtoi kërkesën e SPAK për arrestimin e Berishës.

Përveç babait të saj që pritet të arrestohet për aferën ‘Partizani’, Argitës i është arrestuar edhe bashkëshorti, Jamarbër Malltezi, i cili ndodhet në ‘arrest shtëpie’.

Deputetja Albana Vokshi është përplasur me punonjësit e Gardës, të cilët donin ta kontrollonin për flakadanë.

Ajo s'ka pranuar që t'i ushtrohet kontroll, ndërsa në sallë do të krijojnë kaos, ditën kur Kuvendi pritet t'i hapë rrugë arrestimit të Sali Berishës. 

“Kush je ti mo që më thua do të kontrolloj unë. Kalova te skaneri”, tha Vokshi.

Dhjetëra militantë të Sali Berishës janë mbledhur jashtë Kuvendit, ku pritet që në orën 10:00 të nisë seanca ku do votohet heqja e imunitetit të ish-kryeministrit pas kërkesës së bërë nga SPAK.

Me një ekran të madh, ku ndjekin çfarë ndodh në Kuvend, protestuesit, të paktë të numër mbajnë edhe pankarta në duar kundër Gardës së parlamentit dhe qeverisë.

Deputeti Flamur Noka u bë sërish protagonisti kryesor i kaosit për të mbrojtur Sali Berishën në seancën e sotme ku do të votohej dhënia e autorizimit të SPAK për arrestimin e këtij të fundit.

Ndonëse vite më parë ka qenë dhe ministër i Brendshëm i vendit në kohën e qeverisjes Berisha (3 korrik – 2012 – 16 mars 2013) pra dhe ministri tyre që kishte detyrë ti mbronte sot është kthyer ndër deputetët më të flaktë kundër tyre, edhe pse e di shumë mirë që ata janë aty e bëjnë detyrën.

I qëllon me karrige, i kërcënon me tymyese, i tërheq për xhakete.

Edhe në seancën e sotme ai ishte protagonisti kryesor.

Fillimisht mori karriget dhe i vendosi pirg mu përpara gardistëve të cilët këtë herë ishin bërë gardh para foltores me qëllim që të mos lejonin deputetët e rithemelimit të përsërisnin skenarin e seanca të kaluara.

'Hiqi duart se mu në kokë e ke. Hiqi duart!' i tha ai. 

Nokës që  ‘i janë errur sytë’ nga Sali Berisha ishte pajisur me tymuese blu të cilat pasi i ndizte kërcënoi disa herë dy gardistë të cilët iu afruan tia hiqnin.

Krahu i djathtë i Berishës është parë të kërcënojë dhe operatorët e të hipë mbi kangjellat e Kuvendit të dalë nga dera dhe më pas të hyjë sërish përmes dritares. 

E megjithatë i gjithë skenari i tij i kaosit nuk e ndal dot atë që është e drejtë. Përballjen e Sali Berishës me SPAK, si çdo shqiptar tjetër i cili nuk duhet të jetë mbi ligjin por i barabartë para tij. 

Garda e Republikës pengoi 10 deputetë të grupit Berisha-Bardhi që të hynin në seancën ku do të votohet heqja e imunitetit të Sali Berishës. Duke folur për mediat jashtë Kuvendit, Asllan Dogjani, një prej deputetëve që nuk u la të hynin në Kuvend, tha se është plotësuar afati 10 ditor i përjashtimit të tij dhe deputetëve të tjerë. Sipas tij, fakti që nuk po lihen të hyjnë në Kuvend, shkel rregulloren pasi tashmë kanë kaluar 15 ditë që prej masës së marrë ndaj 7 prej deputetëve.

“Nuk po marrim në konsideratë që po bëhen 15 ditë që jam i përjashtuar. Çfarë të apelosh këtu, sepse këtu drejton dhe urdhëron Edi Rama. Edhe këta deputetët e mazhorancës vetë thonë jemi nën presionin e Edi Ramës. Nuk ka ndodhur kurrë që sot të fusësh mik për të takuar një kriminel. Sot situata është katastrofë. Jemi 10 deputetë të përjashtuar, 7 prej nesh që në seancën e kaluar dhe prandaj e kemi plotësuar 10 ditëshin. Nuk i shpëton askush me këto masa, sepse qytetarët po ndërgjegjësohen përditë”- tha Dogjani.

Në seancën kur Kuvendi do të votojë për heqjen e mandatit të Sali Berishës, ky i fundit në bashkëpunim me grupin e Bardhit po zhvillojnë skenarin e kaosit. Ata janë futur brenda në sallë dhe po përpiqen të bëjnë karriget pirg në foltore.

Nga ana tjetër, Garda është në gatishmëri dhe ka rrethuar foltoren. Flamur Noka dhe Gazment Bardhi po udhëheqin skenarin e kaosit.

Gazment Bardhi: Pse nuk kalojmë dot ne këtu, ca ka. Pse PS kalon ne s’kalojmë dot.

Ina Zhupa: Erdhën nga kafja kaluan, pse si ndaluat.

Garda nuk ka lejuar deputetët e opozitës të përjashtuar që të futen brenda në Kuvend, ndërsa sot do të votohet kërkesa e SPAK për autorizimin e arrestit për Sali Berishën. Deputetët e përjashtuar janë përplasur me Gardën.

Dogjani: Hape derën, do futemi.

Dogjani: Deri më 21 thotë aty. Kam 15 ditë i përjashtuar.

Vokshi: Hape derën, s’më pengon dot mua. Hape derën se do futem. O djalë, hape derën se s’më tregon ti mua.

EMRAT/ Deputetët e përjashtuar

Nga seanca e fundit:

Edmond Spaho

Kastriot Piroli

Saimir Korreshi  

Bledion Nallbati

Asllan Dogjani

Ervin Salianji

Lefter Gështenja

Isuf Çela

Xhelal Mziu

Luan Baçi

Ndërkohë që sot zhvillohet seanca ku do të votohet heqja e imunitetit të tij në kuadër të kërkesës së SPAK, Sali Berisha ka mbërritur në Kuvend. 

Menjëherë, së bashku me një grup të deputetëve të Rithemelimit që janë të përjashtuar, Berisha ka tentuar të hyjë në Kuvend, por fillimisht ka hasur në pengesën e Gardës. 

Socialistët dhe kryeparlamentarja Lindita Nikolla janë paraqitur rreth 2 orë para në Kuvend, ndërsa sot do të mbahet seanca për miratimin e kërkesës së SPAK, që kërkon heqjen e imunitetit të Sali Berishës për arrestimin e tij.

Sali Berisha ka paralajmëruar protestë jashtë Kuvendit dhe bashkë me militantët e tij do të provonte bllokimin e hyrjes në parlament të deputetëve socialistë, me qëllim që ata të mos futeshin në seancën plenare ku ish-kryeministrit pritet t’i hiqet imuniteti.

Kështu ligjvënësit e PS u paraqitën me herët për të shmangur këtë skenar të Berishës.

Ndërsa Kuvendi do të mblidhet sot për të miratuar kërkesën e SPAK për arrestimin e Sali Berishës, ky i fundit ka thirrur protestë para ambienteve të Kuvendit.

Report Tv sjell pamjet, ndërsa vihet re një prani e shtuar e policisë. Ndërkohë, disa prej deputetëve socialistë janë paraqitur në Kuvend 2 orë para nisjes së seancës.

Qindra policë janë angazhuar gjatë kësaj ditë për mbarëvajtjen e rendit dhe sigurisë. Perimetri i Parlamentit është blinduar nga forca të shumta të policisë, mësa këto të marra nga Drejtoria e Përgjithshme e Policisë së Shtetit në koordinim me DVP Tiranë.