Eksperti i Sigurisë, Xhavit Shala dhe ish-deputeti Azgan Haklaj diskutuan në studion e emisionit ‘Repolitix’ me gazetarin Denis Minga në Report Tv për Samitin e NATO-s të zhvilluar në Ankara dhe për mbajtjen e Samitit të radhës të Aleancës Trans-Atlantike në Tiranë.

Gjatë fjalës së tij, eksperti Shala tha se Samiti i radhës i NATO-s, kurdo që të mbahet, pra edhe nëse nuk mbahet vitin e ardhshëm, do të zhvillohet në Tiranë.

Mbajtja e Samitit të NATO-s në Tiranë, sipas Shalës u vu në dyshim për shkak se Shqipëria, Sllovakia dhe Çekia nuk kishin përmbushur standardin e NATO-s, që shtetet anëtare duhet të investojnë mbi 2% të PBB në fushën e Mbrojtjes.

Shala shtoi se gjatë këtyre ditëve, Qeveria shqiptare ndërmori disa hapa dhe tani sipas tij, standardi është arritur dhe Shqipëria rezulton të investojë 2.15% të Prodhimit të Brendshëm Bruto në fushën e Mbrojtjes.

“Fillimisht u diskutua, sepse Samiti i radhës u vendos që në Hagë, u vendos Ankaraja dhe pastaj Samiti i Tiranës. Këtu filluan të hidhen tymnaja, për shkak edhe të këtyre polemikave që plasën, që të mos ketë Samit vit për vit. Por Samiti i Tiranës ishte vendosur. Edhe po ta shohësh, këtu thotë Samiti i radhës, jo Samiti i vitit tjetër. Unë mendoj që do bëhet në 2027, për shkak të zhvillimeve dhe situatës gjeopolitike. U vu në dyshim fillimisht sepse Shqipëria llogariti atë përqindjen, me atë hesapin e vet e kishte kaluar 2.1 %. Por në standardet e NATO-s, doli që Shqipëria, Sllovakia dhe Çekia nuk e arrinin 2 %. Pastaj u bë ajo që u bë, u ndërmorën disa veprime nga shteti shqiptar dhe tani jemi ok, me 2.15%. U vendos që Samiti i radhës do jetë i radhës, por nuk u tha ku do jetë tjetri”, tha mes të tjerash eksperti Shala.

Nga ana tjetër, për ish-deputetin Azgan Haklaj, ende nuk është vendosur përfundimisht nëse Samiti i radhës i NATO-s do të mbahet në Tiranë.

Kjo pasi sipas tij, sekretari i Përgjithshëm i NATO-s, Mark Rutte, kur njoftoi sot mbajtjen e Samitit të radhës të aleancës në Tiranë, iu referua një vendimi të mëparshëm të marrë në Samitin e Hagës.

Më tej Haklaj e cilësoi lajm të mirë nëse Samiti i radhës i NATO-s do të zhvillohej në Tiranë, pasi sipas tij, do të bënte krenar çdo shqiptar.

“Sigurisht që është mirë të bëhet Samiti në Shqipëri, sepse çdo shqiptar ndihet krenar. Por kjo lidhet pastaj në mënyrë individuale, utilitare politike. Samiti bëhet në Shqipëri sepse përfiton kryeministri. S’ka lidhje kryeministri këtu. Sigurinë e merr vetë përsipër NATO. S’mund të thuash që X shtet nuk e merr dot përsipër Samitin, sepse nuk siguron dot sigurinë. Do kemi zhvillime akoma më të mëdha derisa të vijë koha e Samitit të NATO-s. Sekretari i Përgjithshëm nuk tha që do bëhet, por e pyetën gazetarët. Ai e lidhi me Hagën. Ku e di ti çfarë do të ndodhë pas një viti? Mbase s’do të ketë Samit të NATO-s më”, tha ish-deputeti Haklaj.