Skënder Minxhozi: Parashkrimi i krimeve, gabimi më i parë i Ramës përballë SPAK

Edi Rama

Edi Rama

Sa herë që janë pyetur në njëzet vjetët e fundit në lidhje me mosdënimin e krimeve të pretenduara të kryera nga kundërshtarët e tyre politikë, socialistët janë justifikuar duke e drejtuar gishtin tek drejtësia e kontrolluar nga Sali Berisha. “Nuk merremi dot me juristët e plepave”, ka qenë justifikimi klasik i Nanos, Majkos e më vonë Ramës. Nën këtë diçiturë u harruan fajet e përgjegjësitë shtetërore gjatë viteve ’90 kur u dogjën gazeta, u burgosën, rrahën e dhunuan politikanë e gazetarë, apo edhe kur qindra milionë dollarë kursime dhe apartamente u bënë tym nga firmat piramidale e kur shteti u çmend duke nxjerrë në rrugë ushtrinë kundër popullit të vet.

I njëjti fat i është rezervuar kohë më pas edhe zullumeve të tjera që kanë pasuar për shkak të arbitraritetit e arrogancës së shtetit, gjatë dekadës së parë të shekullit ku kemi hyrë. Gërdeci, 21 prilli, Rruga e Kombit, Marrëveshja Detare me Greqinë e të tjera histori të mbarsura eventualisht me korrupsion e shkelje ligji, janë përdorur si municion verbal në luftën politike në opinionin publik, por nuk e panë kurrë një proces serioz hetimi e gjykimi. Sërish “juristat e plepave” ishin justifikimi i përdorur vend e pa vend!

Sot Edi Rama ka ndërmarrë një kryqëzatë në epruvetë kundër SPAK. Është kryqëzatë në epruvetë sepse deri më sot nuk ka ndonjë provë se kryeministri dhe qeveria kanë penguar me fakte hetimin apo dërgimin para drejtësisë të zyrtarëve të lartë socialistë. E kundërta ka ndodhur. Krejt ndryshe nga sa bënte Berisha pas 21 janarit, kur i kthente mbrapsht fletë-arrestet e gardistëve tek dera e Këshillit të Ministrave, Rama nuk është investuar që njerëzit e tij të partisë të mos shkojnë në burg dhe as po i mbron sot, teksa sulmon SPAK. Po kërkon hetime për të tjerët, jo që hetimet të ndalen për të tijët!

Duhet thënë se ky presion publik i Edi Ramës është sa i kotë aq edhe i dëmshëm. Presioni politik mbi drejtësinë kujtohej një praktikë e arshivuar dhe madje thelbi i reformës në drejtësi që Edi Rama e konsideron suksesin më të madh të qeverisjes së tij, është që ta mbajë larg drejtësinë nga duhmat e politikës.

Ndërkaq, tek sheh tonet e rënda dhe seriozitetin me të cilin kryeministri ankohet për mosveprimin e SPAK ndaj Berishës, Metës e të tjerëve, nuk mund të mos tundësh kokën e të kujtosh se ndodhemi në vitin e nëntë të qeverisjes së Edi Ramës. Prej nëntë vitesh ai hyn çdo ditë në një godinë dhe punon në një zyrë prej nga janë urdhëruar vrasje njerëzish me duar në xhepa. Zyra e Ramës është po ajo zyrë ku Berisha, siç deklaronte publikisht në media, ishte kthyer në snajperin e pestë që do të vriste kreun e opozitës në 21 janar!

Në nëntë vjet, duke u fshehur pas “juristëve të plepave” socialistët jo vetëm amnistuan politikisht kundërshtarët e tyre, por edhe përfshinë në koalicion Ilir Metën (të cilin sot e anatemojnë) dhe e zgjodhën më pas president republike, u ulën e bënë pazare me Bashën dhe harruan de facto gjithçka për të cilën kishin luftuar kur ishin në opozitë. Duke çuar në këtë mënyrë drejt parashkrimit shumë vepra penale të asaj kohe, të cilat për shkak të djegies së afateve sot mund të jenë duke u arshivuar, duke hequr mundësinë procedurale të rihapjes, hetimit e gjykimit! Ky është gabimi më i parë i Ramës ndaj SPAK, që daton shumë kohë para deklaratave të orëve të fundit.

Sot apatia e dukshme e SPAK dhe heshtja e fajshme e Arben Krajës ndaj malit të dosjeve të qeverisjes Berisha-Meta, është gjithashtu edhe përgjegjësia direkte e nëntë viteve heshtje të qeverisjes socialiste. Gjatë të cilave viktimat e Gërdecit e 21 janarit morën vetëm nga një tufë lule, por kurrë drejtësi. Teksa ankohet për SPAK, Rama duhet të bëjë edhe bilancin shterpë të angazhimit të tij si maxhorancë dhe si qeveri, për të kërkuar, gjetur e ofruar fakte e prova për akuzat që i dëgjojmë prej njëzet vitesh. Nuk e kanë penguar “plepat” ta kryejë këtë gjë, e ka penguar natyra e njohur hipokrite e politikës shqiptare ku çdo gjë falet e harrohet. Porsi një rrahje krahësh në derën e një spitali, pas një shpërthimi gjigand në periferi të Tiranës…

J.GJ./M.Q./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Guri Paparelo: 10/05/2022 18:08

    Vini ne gojen e Edit ate qe Ka thene dhe si è Ka thene,Jo si iu do qejfi Juve .Edi i Ka hapur rruge prokurorise si Kane dashur ATA.Pardje per ASPAK Ka folur per here te pare dhe me te drejte.U nisen per SPAK reforme dhe doli ASPAK.Nuk Ka asnje Justifikim per kete gjendjen ,as nga Politika,nga juriste,as nga avokatet e Mbrojtjes te krimit,perfshi ketu Edhe guvernatores.Ka ardhe koha qe ky sistem drejtesise te shembet,ose te vendoset drejtesia per te gjithe.Por drejtesi me gjyqtare dhe Prokurore te korruptuar nuk Ka.Ndaj revolta eshte e madhe.Kete duhet te vleresoje Edhe guvernatorja e kolonise Shqiperi,dhe Jo ta interpretoje si presion i politikes.Kur ben presion Saliu,asnje nuk flet.Sa shpreh Edi revolten te gjithe me kembet ,Duke shtremberuar Edhe kontekstin e fjaleve te tij.Edi shpreh Edhe revolten time.Sepse ,po' jap nje shembull per saimir Tahirin sajohen Akuza te rreme,vetem per ta denuar,per te thene se punojme.Ndersa per krimet e Saliut Jo,se cenohen "interesat strategjike te SHaBA-nit dhe DAP-es se Zavalanit

    Përgjigju
  • Vera: 10/05/2022 13:56

    E gjej jo me vend faktin se Rama nuk eshte investuar qe njerzit e tij te partise te shkojne ne burg. Ne e pame kete ne rastin Tahiri, madje dhe Koka. Por me fuqishem e pame ne rastin e patronazhisteve kur tere karshillik jo vetem mori ne mbrojtje por haptazi deklaroi qe nese guxonin te shkonin me tej kishin pune me te. Absurde eshte kjo lloj te menduari apatia ndaj kohes se qeverisjes Berisha Meta nderkohe jemi nje dekade nen Rama. Ndoshta na duhet edhe nje SPAK tjeter atehere. Nje per te hetuar ish kryeministerin dhebtjetren kryeministerin ne detyre.

    Përgjigju
  • Sondazhi i ditës:

    A mendoni se Presidenti i ri do zgjidhet me konsensus?



×

Lajmi i fundit

John

Eurovizioni 2022, një mesazh për paqen, më tepër se sa një fitore për muzikën