Juristi Kreshnik Spahiu është shprehur se PD kërkon arrestimin e Belinda Ballukut, por nga ana tjetër sipas tij, nxjerrin si kandidat për kryeministër Sali Berishën që është marrë i pandehur nga SPAK.

Komentet Spahiu i bëri në emisionin ‘5 Pyetjet nga Babaramo’ në Report TV, ku tha se kryeministri Rama pas veprimeve të fundit në mbrojtje të Ballukut i është bashkuar Sali Berishës në atë që ai e quajti aleanca anti-SPAK.

“Rama është kthyer në taktikën e rivalit politik, Berishës. Nëse deri dje ishte bashkëpunëtor për të dhënë miratimin për çdo vendim të SPAK, tani është kthyer në origjinë te demokratët, të cilët në të njëjtën mënyrë kanë refuzuar për çdo imunitet të demokratëve për të dhënë autorizime, madje kanë një të pandehur si kandidat për kryeministër. Aleanca ati-SPAK ka dalë hapur, PD dhe PS janë kundër SPAK”, tha mes të tjerash Spahiu.

Spahiu e vijoi argumentin e tij duke thënë se Balluku duhet të hetohet në gjendje të lirë nga SPAK dhe jo në masën e arrestit me burg. Kjo pasi sipas tij, gjykimi i plotë i saj mund të zgjasë deri në 4 vite. Spahiu shtoi se kjo është një kohë e gjatë për të mbajtur një grua në qeli, në një kohë që sipas tij, veprat për të cilat ajo mund të dënohet parashikojnë deri në 1 vit burg.

“Hetimet e SPAK për një vepër të tillë zgjasin minimalisht një vit. Gjykimi zgjat edhe një vit tjetër. Deri në Apel në vendim të formës së prerë shkon 3-4 vite. Tani unë kam një pyetje për gjithë publikun dhe për ata që janë pro arrestimit të Ballukut. Çfarë ndodh nëse Balluku arrestohet, por arrestohet për një vepër që dënohesh me 1 vit burg. Si mundet ta mbash në arrest 4 vite dhe ta dënosh me 1 vit burg. Për shkeljen e barazisë në tendera nuk mund të gjykohet një grua nën arrest”, vijoi më tej Spahiu.

Rendit zhvillimet sipas orarit:
Ora 23:16
Ngërçi në Kosovë, Spahiu: Vjosa Osmani dhe Hashim Thaçi u eliminuan politikisht nga Kurti sepse ishin pro-amerikanë

Juristi Kreshnik Spahiu ka deklaruar se Presidentja e Kosovës, Vjosa Osmani dhe ish-Presidenti Hashim Thaçi u eliminuan politikisht nga kryeministri Albin Kurti.

Komentet Spahiu i bëri në emisionin ‘5 Pyetjet nga Babaramo’ në Report TV, ku komentoi vendimin e sotëm të Gjykatës Kushtetuese, që pezulloi përkohësisht dekretin e Osmanit për shpërndarjen e Parlamentit, pasi legjislativi nuk arriti të zgjidhte Presidentin e ri të Kosovës.

Spahiu tha se Kurti duke parë afrimin e Osmanit me administratën e Presidentit të SHBA-së Donald Trump, vendosi ta eliminonte politikisht atë, duke mos e propozuar për mandatin e dytë si Presidente të Kosovës.

Ai shtoi se Kurti kishte vënë re afrimin e Osmanit edhe me kryeministrin Edi Rama, që sipas Spahiut do i garantonte mbështetjen e deputetëve të opozitës nëse do të kandidohej nga Vetëvendosje për Presidente.

“Dekreti i Presidentes Osmani është një dekret politik juridik që është edhe kushtetues. Pas dy javësh do të lihet në fuqi si i ligjshëm nga Kushtetuesja, e cila do të anatemohet si argate e Serbisë nga Vetëvendosja. Albin Kurti ka shkelur çdo lloj parimi. Kurti e ndjeu që Vjosa Osmani nëse propozohej nga Vetëvendosja siguronte kuorumin për votat, sepse ndjeu që Rama u afrua me Ramën dhe ai do i garantonte vota opozitare. Dhe kjo e hodhi në erë Vjosa Omanin. Ishte Kurti që e çoi drejt krizës dhe u kujtua në 24 orët e fundit. Një Vjosë që vinte nga Shtëpia e Bardhë duhej ekzekutuar politikisht. Siç e çuan në pranga Thaçin, po ekzekutojnë politikisht edhe Osmanin. Njërin nuk e lanë të hipte në avion dhe tjetrin nuk e lanë të kandidojë. Nuk është rastësi që dy Presidentë që lidhen me shtëpinë e Bardhë, njëri futet në burg dhe tjetra kërcënohet me vdekje dhe nuk lejohet të kandidojë”, tha mes të tjerash Spahiu.

Kujtojmë se Kosova prej kohësh në një ngërç politik, pasi edhe pas votimit në Kuvend të qeverisë së re, nuk po arrihet zgjedhja e Presidentit të ri, ç’ka mund ta fusë vendin në zgjedhje të tjera parlamentare.

R.Xh/Shqiptarja.com