Sulmet e LSI si i përfshirë në skandalin e inceneratorëve, Alqi Bllako: Hakmarrje personale! S'kam pasur asnjë rol në dhënien e asnjë kontrate koncesioni

TIRANË- Deputeti i Partisë Socialiste Alqi Bllako i është përgjigjur sulmeve në adresë të tij nga Lëvizja Socialiste për Integrim në lidhje me inceneratorët. Të gjitha këto akuza, Bllako thotë se janë një hakmarrje personale e Monika Kryemadhit, kryetares së LSI-së, akuza që sipas tij janë të pabaza, për pasojë thekson se ka zgjedhur që të sqarojë edhe opinionin publik. Në reagimin e tij, deputeti thotë se ai nuk ka pasur asnjë në dhënien e asnjë kontrate koncesioni, gjatë ushtrimit të detyrës, si Sekretar i Përgjithshëm në Ministrinë e Mjedisit, në kohën kur dikasteri ishte nën drejtimin e Lefter Kokës asokohe, ky i fundit i arrestuar.

"Prej disa kohësh, jam vendosur në shënjestrën e pronarëve të LSI-së për hakmarrje personale, jo për arsye parimore. Në respekt të transparencës dhe interesit publik, më duhet të sqaroj disa pika kyçe për të rrëzuar njëherë e mirë mashtrimet e LSI.

1 - Nuk kam pasur asnjë rol në dhënien e asnjë kontrate konçesioni, gjatë ushtrimit të detyrës, si Sekretar i Përgjithshëm në Ministrinë e Mjedisit. Ligji i Koncesioneve dhe Partneritetit Publik Privat përcakton se Sekretari i Përgjithshëm, nuk ka asnjë të drejtë të ndërhyjë në procedurë, nëse nuk është pjesë e komisionit përgjegjës për dhënien e konçensionit. Nuk kam qenë kurrë anëtar i 3 komisioneve përgjegjëse për dhënien e 3 konçensioneve, për të cilat hidhen akuza. Nuk kam marrë pjesë kurrë në asnjë prej mbledhjeve të zhvilluara nga këto komisione.

LEXO EDHE:
Adriatik Doçi: Deputetët e PD që kanë mbi 3 shtëpi me rrogë shteti, bie sfida e Berishës për Altin Dumanin

2 - Nuk kam vepruar kurrë në konfilikt interesi, siç mashtrojnë me dashje kundërshtarët politikë. Gjatë kohës së shpalljes së fituesit për impiantin e Tiranës nuk ushtroja detyrën e Sekretarit të Përgjithshëm në Ministrinë e Mjedisit. Fituesi është shpallur në 17 Gusht 2017 dhe kontrata është lidhur në 31 Gusht 2017. Kam ndërprerë mardhëniet e punës në Ministrinë e Mjedisit më 27 Korrik 2017 dhe jam emëruar Sekretar i Përgjithshëm në Presidencë më 31 Korrik 2017.

3 - AKUM, agjenci që e kam drejtuar nga 26 Shkurt 2019 deri më 05 Mars 2021 ka ZERO lidhje me impiantin e Tiranës. Kjo agjenci nuk ka qene kurrë pjesë as në procedurë, as në menaxhim. Kjo vlen njësoj për periudhat e si për drejtuesit para meje, ashtu dhe për ata pas meje. AKUM nuk ka asnjë rol në politikbërjen apo menaxhimin e mbetjeve. AKUM është agjencia përgjegjëse vetëm për ndërtim infrastrukture në sektorin e mbetjeve.

4 - Më e rëndësishmja! Babai im nuk ka përfituar kurrë asnjë qindarkë prej meje. Im atë është një nga sipërmarrësit e parë në vitet ‘90. Si inxhinier mekanik, i specializuar për industrinë është profesionist dhe sipërmarrës i mirënjohur në këtë fushë prej 31 vitesh. Nuk ka asnjë konflikt interesi timin me punën e kryer prej tij në Impiantin e Tiranës, punë që e ka filluar 1 vit e 3 muaj, pasi isha larguar nga Ministria e Mjedisit dhe ushtroja detyrën e Sekretarit të Përgjithshëm në Presidencë. Im atë, ka lidhur një kontratë afatshkurtër me afat të përcaktuar, si përgjegjës për detajimin e projektit mekanik, pjesë kjo e projektit tërësor të zbatimit, projektim i ardhur nga një kompani ndërkombëtare. Zero vendimarrje e imja, në çdo hallkë të këtij proçesi! Zero konflikt interesi", shkruan ai.

Ndërkohë, ka edhe një paralajmërim për LSI-në.

"Ata që akuzojnë kanë të drejtë vetëm për diçka! “Follow the money" dhe shumë shpejt do të mbërrijmë në destinacion", përfundon Bllako. 

Alqi Bllako është një nga tre personat e kallëzuar nga SPAK për aferën e inceneratorëve në akuzën e "shpërdorimit të detyrës" si edhe "shkelje të barazisë së pjesëmarrësve në tendera".

B.K./Shqiptarja.com

TAG:
• LSI
• monika kryemadhi
• lefter koka
• inceneratoret
• Alqi Bllako