TIRANË- Dosja e dhunës në familjen mbretërore do të hetohet nga Agjencia e Mbikëqyrjes Policore. Këtë vendim, Prokuroria e Tiranës e mori pas pretendimeve të Princ Lekës se policia i bëri publik videon e skandalit brenda ambienteve të shtëpisë së tij pranë pedonales së Tiranës dhe mbajtjen e çështjes sa më diskrete të jetë e mundur, pranë AMP-së.

Burime të Report Tv bëjnë me dije se këtë të shtunë, agjentët e institucionit të drejtuar nga Florian Sulejmani morën në pyetje Princin, i cili dha të gjitha pretendimet e tij lidhur me rastin, dhunën e pretenduar nga ish-bashkëshortja Elia Zaharia dha babai i saj, Gjergj Zaharia, por edhe dyshimet për rrjedhjen e videos në media.

Në pyetje, thonë të njëjtat burime, do të merren në ditët në vijim edhe pala tjetër, të cilët po ashtu në denoncimin paraprak pretenduan për dhunë nga Leka. Përtej rastit të dhunës të cilët do ta hetojë, AMP ka detyrë të vështirë për identifikimin e burimit të rrjedhje së videos, e cila është filmuar nga vetë Princ Leka.

I njëjti material është dërguar në Komisariatin nr. 1, por këta të fundit nga verifikimet e bëra thonë zyrtarisht se janë të bindur se video nuk është shpërndarë nga ata.

Publikimi nuk përjashtohet të jetë bërë edhe nga persona të tjerë, miq pranë Princ Lekës, të cilët të kenë pasur akses në mirëbesim. Video ka qenë në administrim që në momentet e para edhe të avokatit të Princit. 42-vjeçari shkoi në shtëpinë e tij më 5 mars për të takuar vajzën 3 vjeçe, pasi prej kohësh qëndron me qira.

Që në momentin e parë të takimit me Gjergj Zaharinë nisi konflikti, i cili u mbyll me përleshje në sy të të miturës. Leka Zogu dhe Elia Zaharia njoftuan zyrtarisht nisjen e procedurave të divorcit më 15 janar.