'Provat e reja', Tahiri: Gjykata italiane pushoi hetimet. PD: Krimet janë kryer në Shqipëri, jo në Itali

Konferenca e sotme e ish-ministrit të Brendshëm, Saimir Tahiri, ka sjellë reagimin e menjëhershëm të Partisë Demokratike. Në një konferencë tjetër nga selia blu, eksperti për çështjet ligjore në Partinë Demokratike, Gazmend Bardhi, ka thënë se krimet për të cilat akuzohet Tahiri nuk janë kryer në Itali, por në Shqipëri.

PD ka akuzuar sot Tahirin se ka kërcënuar gjyqtarët dhe prokurorët për hetimin e kësaj çështjeje.

Deklarata e plotë

Saimir Tahiri, njësoj si Edi Rama paracaktoi sot vendimin e prokurorisë për të mbyllur dosjen e përfshirjes së tij në trafik droge.

Partia Demokratike e paralajmëroi dy ditë më parë se Saimir Tahiri do të shiste një vendim të autoriteteve italiane si çlirim nga akuzat në Shqipëri.

Shqiptarët duhet ta dinë se Saimir Tahiri është hetuar nga autoritetet italiane vetëm për veprimtari kriminale në territorin italian.

Dokumenti që ai valëvit për pafajësinë e tij, është i pavlerë për veprimtarinë e tij kriminale në Shqipëri.

Si Ministër i Brendshëm, akuzohet për lehtësimin dhe mbështetjen shtetërore për trafikun e drogës nga organizata kriminale e Habilajve në Shqipëri. Kjo veprimtari kriminale është zhvilluar në territorin shqiptar dhe si e tillë nuk mund të hetohet dhe as procedohet nga drejtësia italiane. Italia nuk ka juridksion për vepra penale të ndodhura në territorin e një vendi të huaj nga një shtetas i huaj.

Në 4 vite, Partia Demokratike denoncoi me emra dhe fakte se si Habilajt bënin trafik droge, duke përdorur si mburojë ndaj policisë edhe makinën personale të Saimir Tahirit, audin e famshëm AA 003 GB.

Në 4 vite Saimir Tahiri, që përbetohet për ndershmëri, së bashku me Edi Ramën, mohuan gjithçka, sulmuan opozitën dhe bënë avokatin e Habilajve.

Qëllimi kryesor politik i Edi Ramës prej një viti është që Saimir Tahiri t’i shpëtojë drejtësisë dhe të mos ndëshkohet. 

Zgjidhja që Rama dhe Tahiri kanë gjetur është që prokuroria të prishë hetimet dhe të rrëzojë çdo akuzë për mbështetjen nga Tahiri të organizatës kriminale të Habilajve dhe trafikut të drogës.

Për ta vënë në jetë planin e lirimit të Tahirit nga akuza për trafik droge dhe sabotuar çdo hetim, Edi Rama solli në krye të prokurorisë Arta Markun dhe Donika Prelën, të cilat larguan nga dosja Tahiri prokurorët kryesorë, që kërkuan arrestimin dhe hetuan Saimir Tahirin.

Hetimi italian është i parëndësishëm dhe nuk ka lidhje FARE me hetimin në Shqipëri.

Saimir Tahiri NUK i ka kryer krimet në Itali, por në Shqipëri:

• Ai bashkëpunoi me Habilajt në Shqipëri,
• U vuri atyre në dispozicion shefat e policisë në Vlorë që janë në arrati nga drejtësia
• Vuri në dispozicion të trafikut të drogës të paktën 127 punonjës policie.
• u vuri në dispozicion policinë kufitare,
• u vuri në dispozicion makinën dhe skafin e tij personal.

Prokuroria shqiptare ka sot të gjitha provat që vërtetojnë përtej çdo dyshimi përfshirjen aktive të Saimir Tahirit në mbrojtjen e Habiljave dhe të trafikut të drogës. 

Sajmir Tahiri është simboli i politikanit mafioz, produkt i lidhjes me krimin që nga Habilajt e deri tek Shullazi.

I trimëruar nga mbrojtja mafioze që i ka garantuar Edi Rama përmes Arta Markut dhe Donika Prelës, Saimir Tahiri kërcënoi sot çdo polic, prokuror dhe gjyqtar që mund të guxojë të mos u bindet urdhrave dhe të vazhdojnë hetimin ndaj tij.

Tahiri kërcënoi sot në mënyrë mafioze indirekt edhe të gjithë ata që kanë dëshmuar apo kanë prova kundër tij.

Pas këtyre kërcënimeve, prokuroria duhet të kërkojë ndryshimin e masës së sigurisë nga detyrim paraqitje në arrest me burg për Saimir Tahirin.

Sot ai jo vetëm ka kryer vepër penale duke kërcënuar punonjësit e drejtësisë, por ka vertetuar se, nëse mbetet i lirë, ai përbën rrezik për pavarësinë, prishjen e provave dhe vazhdimin e hetimeve.

Shfaqja e sotme e Saimir Tahirit është një goditje e rëndë ndaj Reformës në Drejtësi.

Është momenti që partnerët e huaj që i premtuan popullit shqiptar drejtësi të vërtetë dhe kapjen e peshqve të mëdhenj, të mbajnë premtimin dhe të mos lejojnë që një kriminel si Saimir Tahiri të shpëtojë pa u ndëshkuar.

Në fjalën e tij para gazetarëve, ish-ministri Saimir Tahiri, teksa po sqaronte vendimin e gjykatës italiane të Katanias, ka folur edhe për opozitën e sotme dikur në pushtet. Tahiri tha se në kohën kur Meta ishte pjesë e koalicionit me demokratët, një natë para se gjykata të jepte vendimin për audio-përgjimin Meta-Prifti, në shtëpinë  e tij kanë shkuar Lulzim Basha dhe Sali Berisha.

Por nuk kanë faj që e mendojnë kështu. Nuk e kam të largët natën kur Saliu e Luli i shkuan për darkë në shtëpi në atë kohë të pandehurit Ilir Meta, vetëm një ditë para vendimit të gjykatës. E pasi kishin larë duart me drejtësinë, tallnin kurabien me popullin duke i treguar sa mirë kishte gatuar Monika roston me kumbulla. Nuk është larg dita kur rrethohej prokuroria edhe me polic, që mos hetohej Lul Basha, që ikte si lepur me raporte mjeksore e nuk u gjykua kurrë për vjedhje miliona euro e vrasje. Dhe këta më bëjnë sot moral. Se nuk kanë faj, ia kanë hedhur drejtësisë.

Saimir Tahiri, ish-ministër

Një moment interesant ka pasuar konferencën për shtyp të ish-ministrit të Brendshëm, Saimir Tahiri.

Një grua iu afrua ish-ministrit duke e puthur dhe përqafuar. Siç shihet edhe nga këto foto të shkrepura nga LSA, të shumtë janë fansat që sërish kanë shoqëruar ish-ministrin.

Një nga mbështetëset e Tahirit duke u takuar me të

Një tjetër moment pikant i kësaj daljeje të Tahirit, ishte edhe nisja e konferencës, ku ai iu kërkoi ndjesë gazetarëve, për zërin e tij, i cili siç u dëgjua edhe në video, ishte i ngjirur.

Saimir Tahiri, sot gjatë konferencës për shtyp

Ish-ministri Saimir Tahiri, në konferencën e tij para gazetarëve, ka sfiduar prokurorinë që nga 7 prokurorë të angazhojë 70 prokurorë për t’a hetuar, por mjafton që të dalë e vërteta. Tahiri ka thënë se e di shumë mirë kush fshihet pas akuzave që janë ngritur drejt tij.

Janë 7 prokurorë në çështjen time. Ka kaluar 1 vit. Dokumentin e Italisë e dorëzova të hënën në prokurori. Unë them ‘boll’, nuk kam më çfarë më të pres. Nëse s’dalin 7 prokurorë, bëjini 70. Deri tani është hetuar gjithçka për mua. U bë një vit që prokuroria heton, por unë s’jam thirrur asnjë herë të vetme. Kam denoncuar vrasjen e 4 qytetarëve në Bulevard. Vetëm 1 ditë para vendimit  Këtu kam qenë edhe kur Lulzim Basha ia mbathte nga prokuroria si lepur. Unë e di kush mi sajoi këto kohë të vështira. Me ç’më kanë parë sytë nga të katërta anët, unë jam krenar për çdo ditë të punës time. Kam gabuar, por kam punuar. Mua më vjen zor të bërtas për padrejtësinë time, kur ka shumë padrejtësi më të mëdha se e imja. Për jetën e çdo qytetari në cep të Shqipërisë, duhet të dalim para dhe të godasim çdo palaço që ka vjedhur në këtë vend. Kush ka rënë e nuk është ringritur, e sot e di shumë mirë se në çdo ditë timen të vështirë, nuk kanë munguar njerëzit e thjeshtë që më kanë dhënë forcë. Unë jam Saimir Tahiri, dhe është e vërteta ime.

Saimir Tahiri, ish-ministër i Brendshëm

TIRANË- Ish-ministri Saimir Tahiri ka nisur konferencën para gazetarëve. Tahiri ka thënë se ambasadorë, gazetarë dhe politikanë kanë shpifur për të gjatë këtij viti.

Unë kam heshtur në respekt të hetimeve. Kam 1 vit që hesht. Zgjodha të mos bëja politikanin, siç kanë bërë ata që kanë qeverisur për 30 vitet e fundit. Kanë vrarë, kanë vjedhur dhe nuk janë hetuar kurrë. Kanë blerë prokurorë, gjyqtarë, gazetarë e media. Zgjodha të bëj qytetarin, të mos bëj politikë. Por të pres hetimet. Kam heshtur vetëm unë. Gazetarët plasin lajme bombastike për mua. Por unë s’kam bërë asgjë tjetër veçse kam qeshur. Disa të tjerë që bëjnë sikur më njohin, por s’më kanë njohur kurrë.

Menjëherë pas tyre ambasadorë që flisnin për mua, gjë që në vendet e tyre s’do e bënin dot kurrë. Kanë gënjyer për mua çdo ditë. Ndërsa unë kam pritur të vërtetën time. Kam patur dhe kam shumë për të thënë.

Saimir Tahiri, ish-ministër