Tarifat e studimeve, reagon MAS: Sekretaritë e universiteteve të njoftojnë studentët, i kemi në monitorim

Ministria e Arsimit, Sportit dhe Rinisë reaguar sërish sa i takon pretendimeve të studentëve për tarifën vjetore të studimeve. Një ditë më parë ata denoncuan se universitetet u kërkojnë të paguajnë të plotë tarifën, ndryshe nga sa vendosi qeveria në mbledhjen e 30 dhjetorit 2018 për zero tarifa për studentët ekselentë dhe ata në nevojë dhe përgjysim të saj për të gjithë të tjerët.

Në reagimin e sotëm të shpërndarë për mediat, MAS thekson se ka kërkuar pranë çdo institucioni publik të arsimit të lartë informacion lidhur me numrin total të studentëve që përfitojnë në rast të plotësimit të kritereve të përmendura, në Vendimet e Këshillit të Ministrave nr.778, 779, 780, 781, 782 dhe 784, datë 26.12.2018, për të vijuar me financimin. 

Gjithashtu, MAS paralajmëron sekretaritë e universiteteve, puna e të cilëve në informimin e studentëve do të mbahet në monitorim. "Tërheqim vëmendjen e sekretarive mësimore pranë universiteteve që të bëjnë njoftimin e nevojshëm për studentët dhe të garantojnë informacionin sipas vendimeve të sipërcituara. Veprimtaria e tyre do të monitorohet dhe do të mbahet qëndrim, bazuar në ligj, për këdo që disinformon apo vepron në kundërshtim me vendimet e marra nga Këshilli i Ministrave", thuhet në reagimin e MAS. 

Një grup i vogël studentësh bojkotuan mësimin edhe sot si dhe marshuan në këmbë drejt Kryeministrisë dhe Ministrisë së Arsimit ndërsa në duar mbanin pankarta dhe flakadanë (Lexo këtu). 

TAG:
• ministria e arsimit
• protesta e studentëve