'Të vish te Interi si tifoz është realizimi i një ëndrre', Kristjan Asllani: Më karakterizon përulësia

Në prag të ndeshjes kundër Sassuolos, e cila zhvillohet sot në 20:45, mesfushori i Interit, Kristjan Asllani foli për "Matchday", duke u rikthyer në emocionet e para të firmës dhe debutimit me zikaltërit.

"E mbaj mend shumë mirë herën time të parë në fushë, ende shikoj videon e debutimit. Emocioni më i madh sot është të mendoj për atë që kam bërë gjatë viteve, duke kërkuar dhe gjetur veten në San Siro. Si tifoz i Interit është gjëja më e mirë që mund të më ndodhte. Jam rritur me Interin, ende e mbaj mend finalen e Champions League të vitit 2010, isha me babanë në një lokal dhe brohorisja shumë", tha fillimisht mesfushori me origjinë nga Elbasani.

Realizimi i ëndrrës që nga fëmijëria, ky është perifrazimi që Asllani i bën kalimit te Interi.

"Kur u zyrtarizova në Inter ishte e pabesueshme, në të njëjtën ditë mora edhe lejen e drejtimit të mjetit dhe ishte një emocion i dyfishtë, padyshim bashkimi me zikaltërit ishte realizimi i ëndrrës që kisha pasur që fëmijë", vijoi mesfushori i Kombëtares.

I pyetur se kush ishte lojtari më gazmor te Interi, Asllani ka përmendur Barrelën. Më pas ai tregoi edhe cilësitë e tij që e karakterizojnë.

"Barrela është me të vërtetë gazmor. Pasioni është pranvera që nxit gjithçka, ajo që më lëviz në çdo hap. Përkushtimi është ai që më lejon të marr maksimumin nga vetja duke u përqendruar te puna. Respekti është një nga rregullat e para që të mëson ky sport dhe është gjithashtu një nga më të rëndësishmit. Pastaj është përulësia, jam i vetëdijshëm që nuk ndalojmë kurrë së mësuari dhe rritja, është një pikë fikse në rrugën time. Më në fund rëndësi ka qetësia, është thelbësore, kam një karakter kaq të fortë dhe kjo më bën të ndihmoj ekipin", vijoi ai.

Legjenda e klubit, padyshim Zanetti. "Për mua është Zanetti, jam rritur me të dhe e mbaj mend edhe tripletën", tha shqiptari i Interit.

S.DH/Shqiptarja.com

TAG:
• serie a
• Inter
• Legjionaret
• kristjan asllani