Tërmeti, pandemia dhe zgjedhjet shtyjnë me dy vite censi! INSTAT: Rezultatet dalin në 2023, mblidhen të dhëna edhe për emigrantët

TIRANW- Tërmeti i nëntorit, pandemia COVID-19 si dhe zgjedhjet e vitit që vjen kanë shtyrë me dy vite kryerjen e censit për popullsinë dhe banesat. I parashikuar për tu realizuar në muajit tetor-nëntor të këtij viti, regjistrimi do të zhvillohet në të njëjtët muaj në vitin 2022, duke ndryshuar edhe rregulloren për realizimin e censeve çdo 10 vite.

“INSTAT ka propozuar realizimin e censit të popullsisë dhe banesave në tetor të vitit 2022, punimet për realizimin e tij kanë nisur që në vitin 2018, dhe është parashikuar që nxjerrja e rezultateve të ndodhë në 2023”, u shpreh drejtoresha e INSTAT Elsa Dhuli.

Edhe në këtë cens feja dhe etnia, do të jenë opsionale për individët.

“Minoritetet nuk do të përcaktohen sipas kombësisë, por përcaktohen sipas vetë-identifikimit të tyre të lirë. Pra përgjigjet për etninë do të jenë të lira”, pohoi Dhuli.

Ky është censi i 11 që zhvillohet në vend që nga viti 1923 dhe do të kushtojë 16.5 milionë euro, dhe është i rëndësishëm edhe për zhvillimin ekonomik.

“Kostoja e censit do të jetë 16.5 milionë euro, 54% është përcaktuar të mbulohet nga buxheti i shtetit, ndërkohë donatorët e tjerë janë: Donatori kryesor është Komisioni Evropian, është qeveria zvicerane dhe deri tani është ofruar edhe qeveria suedeze”, tha drejtoresha e INSTAT.

“Realizimi i censit është i rëndësishëm edhe për çështje që lidhen me karakteristikat e individit, për të cilat ne vazhdimisht duhet të marrim informacion për të bërë edhe planifikime si për mirë-ushqyerjen, për vaksinimin, për moshën e tretë apo për ndarjen e pensioneve”, tha kryetarja e Komisionit të Ekonomisë Milva Ekonomi.

Drejtoresha e INSTAT Elsa Dhuli tha se do merret informacion edhe për emigrantët, ndërsa për fëmijët formulari do të plotësohet nga familjarët.

“ Do të mblidhet informacion edhe për emigrantët pasi pyetësori i censit shoqërohet edhe me një listë të personave të cilët nuk ndodhen momentalisht në shtëpi, në momentin e kryerjes së censit. Për të gjithë fëmijkoroët nën moshën 15 vjeç përgjigjen prindërit apo personi referues i cili do të gjendet në familje në momentin e kryerjes së censit”, u shpreh Dhuli.

Sipas drejtueses së INSTAT për këtë cens nuk do të përdoret sistemi i adresave i ministrisë së Brendshme, pasi do të ketë deklarim nga qytetarët për adresën e tyre aktuale, dhe më pas do të përditësohet informacioni në sistemin kryesor të adresave. Marzhi i lejuar i gabimit në këtë cens do të jetë deri në 5%, ndërsa në 2011 ishte deri në 3%.

B.K./b.ha./Shqiptarja.com

TAG:
• elsa dhuli
• koronavirusi ne shqiperi