Testimi, 4300 mësues në provim më
21 janar, kryeson Korça me aplikime

Më 21 janar do të testohen 4300 mësues, të cilët kanë dorëzuar dosjet dhe kanë aplikuar në portalin mësues për Shqipërinë.

Gerti Janaqi, drejtori i Institutit të Zhvillimit të Arsimit, sqaroi edhe detajet që do të shoqërojnë këtë provim, ku këtë vit numrin më të lartë të aplikantëve e zë Korça me 539 aplikime.

‘’Deri në momentin që flasim janë 4300 persona që kanë aplikuar nga e gjithë Shqipëria. Kemi tendencë që nuk është vetëm Tirana qarku i cili synohet nga aplikantët. Këtë vit kryeson Korça me 539 aplikime, më pas është Elbasani dhe Fieri’’,-u shpreh Janaqi. 

Dosjet fizike janë dorëzuar deri në datën 23 nëntor të vitit të kaluar, ku këtë vit aplikantëve iu janë vënë në dispozicion 17 programet orientuese për 17 profilet e mësuesëve që do të testohen.

 ‘’22 mjedise të cilat janë të shpërndara në çdo drejtori arsimore. Në këto mjedise zhvillohet provimi i cili administrohet nga përfaqësues të deleguar nga Ministria e Arsimit. Tekset rikthehen më pas për t’ju nënshtruar procesit të korrigjimit’’,-u shpreh Janaqi. 

Korrigjimet do të bëhen në kohë reale rezultatet do të shpallen online në portalin mësues për Shqipërinë brenda 2 ose 3 javëve. Çdo kandidat mund të ndjekë procesin e rekrutimit online.

Redaksia Online
XH.K/Shqiptarja.com