Shqipëria shkundet nga tërmeti 7.5 ballë, më i fuqishmi në 30 vitet e fundit! Tjetër lëkundje e fortë në mesnatë (VIDEO)

Dy lëkundje të tjera janë rregjistruar në orën 02:19 dhe 02:29, përkatësisht me magnitudë 2.7 dhe 4.4 rihter dhe me epiqendër në detin Adriatik.

Lëkundjet janë ndjerë në Tiranë dhe zonat përrreth duke përhapur sërish panik tek qytetarët në qarqet e Durrësit dhe Tiranës.

Lëkundja e orës 02:19 ka qenë 9 km nga Kavaja me thellësi 30 km dhe magnitudë 2.7 rihter, ndërsa lëkundja tjetër e orës 02:29 ka qenë 4 km nga Durrësi me magnitudë 4.4 rihter. 

Një tjetër lëkundje tërmeti është ndjerë në Shqipëri në mesnatë, pas goditjeve të fuqishme të tërmetit të rënë pasdite me magnitudë 5.8 dhe 5.2 Rihter.

Lëkundjet sizmike me epiqendër 4 kilometra nga Durrësi, (31 kilometra nga Tirana dhe 10 nga Shijaku), është me magnitudë 4.8 ballë. Lëkundjet zgjatën vetëm pak sekonda.

Nuk kanë të ndalur lëkundjet e tërmetit në vendin tonë. Lëkundje sizmike vijojnë të jenë aktive në detin Adriatik. Përgjatë ditës së sotme janë shënuar 12 lëkundje, ndërsa dy prej tyre kanë qenë tepër të fuqishëm duke lenë pas dhjetëra persona të plagosur dhe disa banesa të dëmtuara.

Lëkundja e fundit është në orën 22:00 me epiqendër, 7 km në veri të Durrësit ose 32 km nga Tirana. Tërmeti ka qenë me magnitudë 3.2 i shkallës Rihter.

Nga tërmeti i cili tronditi vendin ditën e sotme ka mbetur i lënduar edhe një turist i huaj. Ai po merr trajtim mjekësor në spitalin e Durrësit. Në një lidhje telefonike për Report Tv, prefekti i Durrësit Roland Nasto deklaroi se të dëmtuarit tashmë janë në gjendje të mirë dhe jashtë rrezikut për jetën.

"Aktulisht në Spitalin e Durrësit po trajtohen 4 persona, të tjerët janë kthyer në shtëpi. Aktualisht në Bashkinë Durrës janë 89 banesa të plasaritura, 2 shkolla dhe 6 pallate, kryesisht shtesa. Kjo është gjendja që paraqitet deri në këto momente që flasim. Të dëmtuarit janë në gjendje të mirë. Nga katërt të lënduarit, njëri është i huaj. Policia është në krye të detyrë", u shpreh Nasto për Report Tv.

Ministri i Turizmit, Blendi Klosi ka ndjekur nga afër situatën në zonën turistike në Golem. Në një lidhje telefonike për Report Tv ai tha  se po monitorohen të gjitha hotelet, ndërsa shtoi se vizitorët e huaj vijojnë të qëndrojnë pa frikë pasi sipas tij faza më e vështirë ka kaluar.

"Pasditja e sotme pati një shqetësim. Tashmë turistët janë të qetë. Ka disa shqetësime që ka të bëjë me garancinë shtetërore. Situata paraqitet e qetë falë ndihmës së operatorëve turistikë. Turistët janë qetësuar dhe kanë nisur aktivitetin normal turistik ", tha Klosi.

Lëkundjet e forta të tërmetit sot në të gjithë Shqipërinë, nxorrën njerëzit në rrugë me shpejtësinë për të shpëtuar. Të gjithë, krah njëri-tjetrit, në panik nga pasojat që mund të ishin tragjike në njerëz, dhe që fatmirësisht deri më tani nuk raportohet asnjë person që të ketë humbur jetën. Fotografi Gent Shkullaku ka kapur një moment që nuk ka nevojë për fjalë! Një familje e bashkuar në momentet e para të panikut nga tërmeti. Bie në sy përpjeka e kryedamiljarit për të mbrojtur njerëzit e tij të zemrës.

Ministrja e Shëndetësisë Ogerta Manastirliu tha në një lidhje telefonike për Report Tv se personat e paraqitur në Spital nuk kanë marrë dëmtime të rënda. Ajo deklaroi se në spitale po punohet me shumë grupe pune për të bërë të mundur përballimin e fluksit të pacientëve.

"Të lënduarit janë paraqitur me dëmtime jo të rënda. Aktulisht në spital po marrim mjekim 10 pacientë, ndërsa në Durrës deri para një ore po merrnin mjekim 5 pacientë. Pjesa tjetër kanë lënë spitalin për shkak se nuk kanë pasur gjendje të rënduar. Në spitalin e Traumës është paraqitur një vogëlush i cili ka marrë mjekimin dhe më pas është larguar. Kemi aktivizuar planin e gatishmërisë në QSUT dhe në spitalin e Durrësit. Në Tiranë kemi 3 qendra shëndetësore të hapur përgjatë 24 orëve. Situata në Tiranë është e mbuluar nga shërbimi shëndetësore", u shpreh Manastirliu.

Ministria e Financave ka zhvilluar një mbledhje urgjente mbrëmjen e sotme, pas tërmetit të fuqishme që goditi vendin, për të koordinuar pushtetin vendor për të bërë verifikimin e gjendjes teknike.

Nisur nga tërmeti i ndodhur sot dhe dëmtimeve që janë shkaktuar në banesa, ambiente publike dhe biznese, Ministria e Financave dhe e Ekonomisë dhe strukturat e saj në varësi janë në gatishmëri të plotë dhe po ndjekin të gjithë situatën në kohë reale.MFE po bashkëpunon me të gjitha ministritë e linjës, pushtetin vendor dhe strukturat e tjera që janë në terren për t'u informuar mbi dëmet e shkaktuara nga kjo dukuri natyrore. 

Edhe pse keto struktura po evidentojne dëmet në terren është ende herët për të llogaritur efektet financiare të këtyre dëmeve.  Gjithashtu, MFE disponon të gjithe fondet e nevojshme për të përballuar situatat e shkaktuara nga fatkeqësi të tilla natyrore.

Si institucioni që ka në varësi Inspektoriatin Shteteror të Mbikqyrjes së Tregut, MFE po koordinon gjithashtu me pushtetin vendor, kompanitë e ashensorëve dhe administratorët e pallateve për rritjen e ndërgjegjësimit për për të bërë verifikimin e gjëndjes së tyre teknike, pas situatës së krijuar nga tërmeti.

"Një informacion më i detajuar për trupat e autorizuara që kryejnë verifikimin e plotë të ashensorëve gjendet në faqen e Inspektoratit Shtetëror të Mbikëqyrjes së Tregut www.ishmt.gov.al si dhe mund të shkruani për rastet emergjente dhe për cdo problematikë tjetër lidhur me ashensorët në adresën [email protected]", njofton Ministria.

Ministrja e Infrastrukturës dhe Energjitikës Belinda Balluku në një lidhje për Report Tv deklaroi të gjthë grupet e punës kanë dalë në terren. Balluku u shpreh se ARRSH ka kontrolluar të gjitha akset kryesore. Ajo tha se i gjithë shteti është në këmbë teksa bëri thirrje për ruajtje të qetësisë.

"MIE është një ministri multi-sektoriale. Që nga momenti i parë kemi pasur në terren të gjithë grupet e punës. ARRSH ka kontrolluar të gjithë akset kryesore. As në sistemin e urave nuk kanë rezultuar dëmtime të thella. ARRSH është angazhuar në një kontroll akoma më të detajuar i planifikuar për ditën e nesërme. KESH nuk ka pasur problematika pasi në zonën veriore nuk ka pasur probleme. Lëkundjet e vogla patën një ndikim në transformatorë. Ka pasur një njoftim zyrtar nga Ministria e Brendshme për pallate të dëmtuara. Janë vlerësuar dëmet në mënyrë papaprake. Janë ngritur grupet e punës nga ministritë dhe bashkitë. Prefektët janë duke udhëhequr këto grupe pune. I gjithë shteti është në punë. Duhet ruajtur qetësia", u shpreh Balluku.

Dëmet e shkaktuara nga tërmeti në disa banesa në Tiranë, çahen muret e shtëpisë

termet.jpg" />

Frika dhe paniku që ka shkatuar tërmeti ka bërë që qytetarët sonte të qëndrojnë në qiell të hapur.

Në Ndroq disa qytetarë shikohet që kanë nxjerrë dyshekët për të fjetur jashtë sonte.

Edhe Emergjencat Civile kanë bërë thirrje që të mos qëndrojnë në banesa sonte.

Sonte do të ngrihen 6 kampe për tu ardhur në ndihmë qytetarëve.

Tërmeti ka shkaktuar dëme probleme në nënstacionet e zonës së Durrësit. Ministria e Infrastrukturës dhe Energjitikës njofton se ka pasur stakime të trasformatorëve dhe linjave 110 Kv që i furnizojnë ato, por me ndërhyrjen e grupeve të OSHEE janë kthyer të gjithë në gjendje pune. Aktualisht energjia është rikthyer në të gjitha zonat ku ka pasur ndërprerje.

Nga raportimi paraprak rezulton se nuk ka pasur dëmtime serioze apo bllokime te akseve kombetare rrugore. ARRSH vijon kontaktet me të gjithë inspektorët e kontratave dhe kontraktorët, për të evidentuar me imtësi çdo aks rrugor apo urë për ndonjë dëmtim të mundshëm që mund të rrezikojë qëndrueshmërinë e tyre.

Në Portin e Durrësit ka pasur një dëmtim të lehtë të magazinës 4-5 në Terminalin perëndimor, por pa rrezik përkeqësim të situatës.

MIE dhe strukturat e varësise do të vijojnë të jenë në gadishmëri gjatë gjithë natës së sotme për çdo nevojë të qytetarëve, te cilët mesazhet e tyre sinjalizuese kane mundësi të na i përcjellin përmes numri unik 112.

Pas tërmetit të fortë që u ndje fuqishëm edhe në Tiranë, të gjitha ekipet e emergjencës së Bashkisë së Tiranës vijojnë të jenë në terren dhe do vazhdojnë gjatë gjithë natës. Ndërkohë, vijon puna për evidentimin e dëmeve dhe riparimin e tyre.

Mjetet e rënda dhe grupet e punës të ngritura nga Bashkia e Tiranës po vijojnë me intensitet punën për eliminimin e dëmeve. Bashkia e Tiranës njofton se të gjithë punonjësit e emergjencave janë në terren për të ndihmuar me evakuime, hapje dyersh/ashensorësh dhe pastrim inertesh! Ndërkaq, grupet e punës vijojnë punën në të gjithë zonat, jo vetëm në qendër, por edhe në zonat rurale ku po bëhet evidentimi i plotë i çdo dëmi dhe për t’u ardhur në ndihmë qytetarëve.
Ndërkaq, të gjithë qendrat sociale të Bashkisë së Tiranës janë  të  hapura për të  gjithë  banorët që  kanë  nevojë  për strehim gjatë  natës. Nëse ke nevojë për ekipet tona njofto menjëherë

Prefektja e Tiranës në Suzana Jahollari në një lidhje telefonike për Report Tv deklaroi se ekipet e emergjencës janë në gatishmëri për t'i ardhur në ndihmë banorëve që kanë pësuar dëmtime nga tërmeti. Ajo tha se deri tani janë 224 objekte të dëmtuara dhe 20 banesa.

"Janë hapur 6 pika emergjence . Duhet të ngrenë çadrat fushore që të vendosen 6 pikat më problematike. Kjo do jetë detyra më parësore. Patrullat janë në çdo njësi administrative. Ka pasur problematika në të gjitha bashkitë e qarkut të Tiranës. Situata është nën kontroll, ne jemi të gjithë në gatishmëri. Me informacionet që kemi marrë janë të evidentuara 224 objekte dhe 20 banesa më plasaritje dhe rënie suvaje. Nuk janë të një shkalle shumë të lartë. Në Farkë janë vetëm 3 banesa të para viteve 90. U morën masa që banorët e tyre të dërgoheshin tek të afërmit e tyre. Ne do jemi në vijimësi për të parë situatën. Nuk kemi informacione nëse institucionet e dëmtuara janë banesa rezidenciale, janë kryesisht banesa të vjetra", u shpreh Jahollari.

Nga Shtabi i Emergjencave i ngritur ne Prefekturen e Tiranes, është vendosur ngritja e 6 pikave të emergjencave në ambiente të hapura, kryesisht për ata banorë që mund të kenë nevojë për ndihmë.

Pikat e Emergjencave do te jene ne:

1- Rr. "3 Deshmoret", Yzberisht;
2- Liqeni i Thate;
3- "Bulevardi ri", Kashar;
4- Stadiumi "Dinamo";
5- Kisha ne Rr. "Don Bosko";
6- Shkolla "Betim Muco",
Kombinat.

Lideri i PD Lulzim Basha ka shprehur solidaritet për të lënduarit të cilët kanë pësuar dëmtime nga tërmeti. Basha shprehst se kjo situatë do të kalohë në solidaritet me njëri-tjetrin dhe ndihmën e Zotit.

"Falë Zotit deri tani nuk ka raportime për jetë të humbura apo në rrezik nga tërmeti që goditi sot vendin. Ju uroj të lënduarve shërim të shpejtë dhe çdo familje një natë të qetë. Në solidaritet me njëri-tjetrin dhe me ndihmën e Zotit do ta kalojmë këtë situatë tronditëse", shkruan Basha.

Aeroporti Ndërkombëtar i Tiranës (TIA) njofton të gjithë pasagjerët se nuk ka asnjë situatë të krijuar pas tërmetit dhe se operimet vijojnë normalisht.

TIA bën me dije se lëkundjet sizmike nuk kanë shkaktuar asnjë dëm dhe se pasagjerët e familjarët e tyre lëvizin të qetë.

TIA ka vënë në dispozicioni numrin +35542381800 për çdo asistencë apo informacion që pasagjerët mund të kenë.

Ministria e Shëndetësisë njofton se është rritur numri i personave të lënduar nga tërmeti. Deri më tani në spitalin e Traumës në Tiranë dhe në spitalin e Durrësit janë paraqitur 105 qytetarë të cilët kanë marrë dëmtime.

"Vijon gatishmeria e ekipeve mjekesore me spitalin e Traumes, ne QSUT dhe ne spitalin e Durresit. Ne keto spitale kane marre sherbim mjekesor 105 qytetare te lenduar nga termeti, nga te cilet 74 qytetare kane marre sherbim ne spitalin e Traumes. 
Pjesa me e madhe e pacienteve kane lene spitalet dhe aktualisht jane 10 qytetare qe po marrin sherbim ne spitalin e Traumes dhe 5 qytetare ne spitalin e Durresit. 
Spitalet jane ne gatishmeri te plote, me staf te perforcuar mjekesor. Ministrja Manastirliu deklaroi se eshte vene ne zbatim plani i gatishmerise per rastet e emergjencave", njofton Ministria e Shëndetësië.

Në një lidhje telefonike për Report Tv, ministrja e Arsimit Besa Shahni është shprehur se nga të dhënat nuk ka mësues apo nxënës mes të lënduarve. Shahini u shpreh se ka disa shkolla të dëmtuara por që nuk do ndikojnë në vijimin e mësimit ditën e hënë.

"Ka disa godina që janë pak të dëmtuara. Kryesisht kanë plasaritje të mureve. Drejtuesit e shkollave kanë raportuar. Pjesë dërmuese e shkollave janë kryesisht të paprekura nga tërmeti. Të gjithë drejtuesit e shkollave janë në terren. Shpresoj që gjendja të mbetet në këtë nivel që të hënën të vijojë shkolla pa problem. Nuk raportohet për mësues mes të lënduarve. Po mbledhim akoma më shumë informacion. Jemi në komunikim të vazhdueshëm me të gjitha ministritë. Jemi duke u munduar të bëjmë çdo gjë që është e mundur për normalizim të situatës", u shpreh ministrja.

Ministria e Arsimit, Sportit dhe Rinisë (MASR) dhe të gjitha institucionet e saj të varësisë në të gjithë vendin, që në momentet e para të tërmetit janë të angazhuara plotësisht në monitorimin e situatës. MASR njofton se është në komunikim të vazhdueshëm me drejtuesit e shkollave dhe zyrave vendore arsimore në të gjithë territorin.

"Nga raportimi paraprak pas komunikimit me to, bëjmë me dije se deri më tani shumica e shkollave janë të paprekura fare dhe nuk kanë nevojë për ndërhyrje. Ka disa shkolla me dëmtime të vogla në Tiranë dhe Durrës, të cilat konsistojnë kryesisht në plasaritje të lehta muresh të jashtme dhe që fatmirësisht nuk pengojnë aspak vijimin e procesit të mësimit ditën e hënë.

Njëkohësisht, informojmë se ekipet e ministrisë dhe të institucioneve të saj të varësisë janë në monitorim të vazhdueshëm të situatës. Ditën e nesërme do të jenë po në terren në mënyrë që të garantojmë se secila shkollë është e sigurtë për t'u hapur të hënën për vijimin normal të mësimit", njofton MASR.

108 banesa të dëmtuara, mes të cilave njëra totalisht e shembur në Dibër dhe 7 pallate, është bilanci i dëmeve të shkaktuara nga tërmeti i fuqishëm që lëkundi Shqipërinë pasditen e sotme. Në një konferencë për mediat, Ministrja e Mbrojtjes, Olta Xhaçka ka dhënë informacionet paraprake në lidhje me dëmet që shkaktoi tërmeti prej 7.5 ballësh në vend. Xhaçka njoftoi se nga tërmeti nuk ka pasur asnjë viktimë, ndërsa të gjithë të lënduarit kanë marrë ndihmë mjekësore. Ministrja sqaron se lëndimet kanë ardhur kryesisht nga frika dhe krizat e panikut tek banorët. 

Deklarata

"E di që këto kanë qenë orë shumë shqetësuese për të gjithë ne. Dua të ndaj me ju informacionin zyrtarparaprak, që disponojmë për momentin bazuar në të dhënat që na vijnë nga terreni përmes Shtabeve të Emergjencës në të 12 prefekturat, ekipeve të emergjencave në të 61 bashkitë, komisariateve të policisë dhe spitaleve për t’ju dhënë një pasqyrë sa më të plotë të situatës. Tërmeti që ra sot, në orën 16.05 minuta ishte i një magnitude 5.8 sipas shkallës Rihter,me një intensitet prej 7 deri në 8 balle ne epiqender. Epiqendra ka qenë në Detin Adriatik, 30 kilometra në veri të Durrësit.  Goditja fillestare është shoqëruar nga disa lëkundje, për fat të mirë me magnitudë dhe intensitet më të ulët.

Sipas ekspertëve të Institutit të Gjeoshkencave, me të cilët jemi në kontakt të vazhdueshëm, është e pritshme që ngjarja kryesore të pasohet nga lëkundje të tjera deri në stabilizimin e pllakave tektonike. Por duke e konsideruar tërmetin e orës 16.05 si ngjarjen sizmike kryesore, është një lajm i mirë që goditjet pasuese kanë shënuar një trend në ulje, qoftë për sa i përket magnitudës ashtu edhe intensitetit. Sipas informacioneve zyrtare paraprake – dhe dua ta theksoj që këto informacione janë duke u përditësuar minutë pas minutiteksa ekipet skanojnë situatën në terren - deri në momentin që po flasim, raportohet për 68 persona të lënduar, por në të gjitha rastet bëhet fjalë për lëndime të lehta, që kanë ardhur kryesisht si pasojë e situatës së frikës që kanë përjetuar qytetarët në momentin e tërmetit, dhe pasi kanë marrë trajtimin mjekësor, janë larguar sërish për në banesat e tyre. Disa prej të lënduarve janë asistuar nga ekipet mjekësore të ambulancave pranë vendeve të tyre të banimit. Ajo që është më e rëndësishmja, eshte senuk ka pasur asnjë humbje jete.

Nga ana tjetër tërmeti ka shkaktuar dëme materiale, sidomos në Durrës dhe Tiranë, por fatmirësisht, ne pjesën dërrmuese behet fjale per krisje të mureve apo dëme të tjera të këtij niveli ndonëse në ditët në vijim serioziteti i këtyre dëmtimeve do të verifikohet nga grupet e ekspertëve në terren.

Më konkretisht, në qarkun Tiranë raportimet e deritanishme flasin për:

Dëmtime, kryesisht krisje, në 46 banesa e 3 pallate në Farkë, Zonën e Astirit, Dajt, Komunën e Parisit, njësia administrative 2 dhe 6, si dhe në Pezë, Kashar, Zallherr, dhe Kodër Sharrë,

Në qarkun Durrës, në Shijak dhe në Durrës qytet raportohen dëme ne 4 pallate dhe 42 banesa, kryesisht te vjetra.

Në bashkinë Librazhd janë dëmtuar 7 banesa.

Në qarkun Dibër, bashkia Klos, njësia administrative Xibër raportohen 4 banesa të dëmtuara, nga të cilat një e rrëzuar.

Në bashkinë Berat ka një banesë të dëmtuar.

Në qarkun Lezhë, në qytet ka dëme të lehta në 4 banesa.

Në qarkun Fier, janë shënuar 4 banesa të dëmtuara lehtë në Bashkinë Lushnje, dhe njësinë administrative Fier Shegan, por ajo që është e rëndësishme, pak më parë u konfirmua që nuk ka asnjë dëm në puset e naftës.

Në bashkinë Korcë nuk raportohen dëme.

Cdo institucion i shtetit shqiptar, FA, Ministria e Shëndetësisë e cila ka vendosur staf të përforcuar mjekësor nëpër spitale dhe gjendje gatishmërie për cdo emergjencë, prefekturat dhe bashkitë përmes ekipeve të tyre të emergjencave, komisariatet e policisë, janë në krye të detyrës për t’ju ardhur në ndihmë qytetarëve kudo që mund të shfaqet nevoja. Dua po ashtu t’i informoj qytetarët banesat e të cilëve kanë pësuar dëmtime, që bashkitë janë duke përgatitur qendra të posaçme strehimi për të sistemuar të gjithë ata që mund të kenë nevojë. Në raste nevoje apo për të marrë cdo lloj informacioni tjetër qytetarët mund të kontaktojnë një nga numrat e mëposhtëm:

Numrin unik 112, qëështë për cdo nevojë apo urgjencë. Dhe sipas nevojave specifike.

Policia e shtetit 129,

Zjarrfikesja 128,

Urgjenca  127

Kam qenë vazhdimisht në kontakt me Kryeministrin i cili ndodhej në Frankfurt në tranzit për në Nju Jork, ku do të merrte pjesë në punimet e Asamblesë së Përgjithshme të OKB, por ka vendosur ta ndërpresë udhëtimin për t’u kthyer po sot në Shqipëri. Dhe sot në orën 23.30 Kryeministri ka thirrur një mbledhje të qeverisë për të koordinuar punën e të gjithë strukturave vendore dhe qendrore për përballimin me gatishmëri të plotë 24 orë në ditë të pasojave të tërmetit.

Paralelisht, dua ta ritheksoj, po ngrihen edhe grupet e vlerësimit të dëmeve në secilën prej bashkive të prekura nga lëkundjet e tokës. Po ashtu, dua të theksoj që gjatë këtyre orëve kemi marrë mesazhe solidariteti dhe jemi në kontakt të vazhdueshëm me partnerët tanë ndërkombëtarë që kanë shprehur gatishmërinë për të ndihmuar në përballimin e pasojave të tërmetit.

Unë e di që shumë qytetarë kanë përjetuar momente ankthi e frike. Por dua t’ju siguroj që po bëjmë gjithçka për të përballuar situatën. Këto janë ngjarje që nuk mund të parashikohen e as të parandalohen. Por ajo që ne mund të bëjmë dhe jemi duke bërë është që t’ju gjendemi qytetarëve kudo e kurdo që mund të kenë nevojë për ndihmë. Forcat e Armatosura, policia e shtetit, stafet mjekësore, shtabet e emergjencave, prefekturat, bashkitë, ekipet e vlerësimit dhe cdo institucion i shtetit shqiptar qendror dhe vendor është 24 orë në krye të detyrës për të përballuar këtë situatë. Do t’ju mbajmë të informuar në vazhdimësi për masat e mëtejshme".

Në përgjigje të situatës së krijuar nga lëkundjet e tërmeteve të njëpasnjëshme gjatë orëve të pasdites, u thirr menjëherë Grupi i Menaxhimit të Emergjencave Civile dhe Krizave, nën drejtimin e Ministres së Drejtësisë.
 
Grupi i Menaxhimit në bashkëpunim me strukturat e tjera drejtuese kreu një verifikim paraprak të situatës në të gjitha institucionet e varësisë së Ministrisë së Drejtësisë, dhe veçanërisht pranë Institucioneve të Ekzekutimit të Vendimeve Penale në të gjithë territorin e Republikës së Shqipërisë.
 
Vlen të theksojmë se në Institucionet e ekzekutimit të vendimeve penale, situata paraqitet e qetë dhe pa probleme si në drejtim të sigurisë njerëzore, ashtu dhe shëndetit të punonjësve të strukturave të burgjeve dhe të shëndetit të të paraburgosurve dhe të dënuarve. Në momentet e lëkundjeve të tërmetit, në kuadër të menaxhimit të situatës, janë ndjekur me përpikmëri kërkesat e Planit të Emergjencës në Burgje, duke nxjerrë të dënuarit për çështje sigurie fizike në ambientet e ajrimit.
 
Në përgjigje të situatës, në bazë të Rregullores së Përgjithshme të Burgjeve dhe legjislacionit në fuqi, Ministri i Drejtësisë ka urdhëruar kalimin në gjendje gadishmërie, në Institucionet e Ekzekutimit të Vendimeve Penale në afërsi të epiqendrës së tërmeteve, ku janë ndjerë lëkundjet dhe po zbatohet plani i masave përkatëse në çdo IEVP.
 
Për të gjitha institucionet e varësisë, po vijon inspektimi i detajuar për evidentimin dëmeve të mundshme materiale. Situata është në monitorim dhe në ndjekje të vazhdueshme!", njofton Ministria e Drejtësisë.

Ministrja e Shëndetësisë Ogerta Manastirliu ka vizituar të lënduarit nga tërmeti në Spitalin e Durrësit. Bëhet e ditur se deri më tani në spitalin e Durrësit janë dërguar 21 persona, kryesisht me fraktura në gjymtyrë. Ekipi mjekësor në këtë spital është në gjendje gatishmërie, ndërsa gjendja shëndetësore e lënduarve paraqitet e stabilizuar.

Televizioni SKYnë Itali ka transmetuar tërmetin i cili tronditi Shqipërinë. Teksa ka përdorur një foto nga transmetimi i Report Tv, SKY transmeton edhe dëmet që ka shkaktuar ky tërmet.   

Edhe një nga rrjetet sociale më të njohura Facebook me opsionin e ri raporton për gjendjen e personave gjatë lëkundjeve.

Pas tërmetit në  Qarkun Fier raportohen 4 shtëpi të dëmtuara lehtë.

Në fshatin  Firshegan që ndodhet në bashkinë  Lushnje janë dy shtëpi  banimi të  dëmtuara, perkatësisht një  shtëpi në  fshatin  Jeta e re, ku janë  dëmtuar muret dhe tavanet  si dhe një  shtëpi në  fshatin Kosovë  e Vogël, të  dëmtuara  përsëri mure dhe tavane.

Shtëpia e dytë e dëmtuar ishte në fshatin  Ballagat përsëri të  Bashkisë Lushnje.

Në  fshatin Jazxhiaj janë dy shtëpi  të dëmtuara me mure dhe tavan të carë.

Sipas të dhënave nga gazetari i Report TV, në Fier raportohet se situata është pa probleme dhe grupet e punës kanë shkuar për verifikimin e gjendjes.

Presidenti Ilir Meta ka mbërritur në Durrës, ku dhe ishte epiqendra e tërmetit që tronditi vendin. I pyetur nëse ky ishte tërmeti apokaliptik që parashikoi pak kohë më parë, Meta ka zgjedhur të mos përgjigjet, duke bërë thirrje për bashkëpunim dhe vëmendje.

"Të merren masa për të verifikuar pasojat në drejtim ytë banesave. Mendoj që jemi në kushtet e një vigjilence të përhershme sepse jetojmë në një rajon problematik. Duhet të jemi në bashkëpunim me vendet fqinje. Unë besoj se tani është koha për të qenë gjithmonë të vëmendshëm dhe të punohet me një koordinim efikas", tha Meta.

Tërmeti ka shkaktuar gjendje ankthi tek banorët, të cilët janë të frikësuar të futen në banesa, pasi mund të ketë lëkundje të tjera.

Deputetja e zonës Blerina Gjylameti ka thënë se  Njesia Administrative nr 6 dhe qendra sociale Misto Mame janë  të  hapura për të  gjithë  banorët që  kanë  nevojë  për strehim gjatë  natës.

Postimi i Gjylametit

Një banesë në Shënkoll të Lezhës ka pësuar dëme materiale për shkak të tërmeit. Emergjencat kanë dalë në terren dhe po mbledhin informacion për dëme të tjera në qarkun e Lezhës.

Banorët e Durrësit kanë nxituar të dalin jashtë banesave, ndërsa tashmë që janë afruar orët e mbrëmjes qytetarët duken se kanë frikë të kthehen në banesa. Ata i druhen një lëkundje tjetër sizmike.

Panikun e lëkundjeve të tërmetit që prekën Shqipërinë ditën e sotme i kanë kaluar me panik edhe ata që ndodhen pas hekurave. Të dënuarit sapo kanë ndjerë tërmetin kanë flluar të bëjnë revoltë, të bërtasin dhe të kërkojnë nga rojet që tu hapen dyert.

Burime nga burgu numër 313 në Tiranë bëjnë me dije se vetëm pas lëkundjes së dytë gjithashtu të fuqishme të tërmetit, autoritetet e burgjeve kanë hapur qelitë e të burgosurve, duke i sistemuar ata në fushat sportive e ambiente të tjera të përshtatshme.

"Na nxirrni jashtë, do vdesim këtu", janë shprehur të burgosurit. Pas lëkundjeve të vazhdueshme ata janë futur sërish në qeli, por edhe më tej kanë shfaqur frikë për atë se çmund të ndodhë gjatë natës duke kërkuar të qëndrojnë jashtë qelisë. 

Shqipëria është prekur nga 6 lëkundje tërmeti. I pari dhe më i forti ka qenë në orën 16:04 minuta, me magnitudë 5.8. Lëkundja e dytë është shënuar në orën 16:15 me magnitudë 5.2. Këto ishin dhe dy lëkundjet më të forta të tërmetit me epiqendër në detin Adriatik pranë Durrësit. 

Pas 30 minutash, në orën 16:45 dhe 16:48 janë  regjistruar lëkundja e 3-të dhe e 4-të me magnitudë  3 dhe 3.2 me epiqendër sërish në detin Adriatik. Në 17:54 është regjistruar lëkundja më e fundit me epiqendër pranë Gërdecit dhe Marqinetës me magnitudë 3.4. 

Mediat italiane kanë pasqyruar lajmin për tërmetin në Shqipëri.

Repubblica.it shkruan se dy tërmete u regjistruan brenda dhjetë minutash me epiqendër veriun e Durrësit. I pari 5.8 ballë dhe i dyti 5.3 ballë. Lëkundjet janë ndjerë gjithashtu në Puglia, veçanërisht në Salento dhe Gargano.

Kontrollet janë në proces për të parë nëse ka pasur dëme materiale ose njerëz. Thirrje të shumta telefonike drejtuar zjarrfikësve nga qytetarë të alarmuar, të cilët mendonin se tronditja perceptohej, në mënyrë më konsistente, në bregdetin shqiptar, veçanërisht në qytetin e Durrësit.

Presidenti i Republikës Ilir Meta eshte nisur drejt qytetit te Durresit, ku ishte dhe epiqendra e termetit. 

Per pak minuta Presidenti Meta pritet te jete ne Prefekturen e Durresit, ku do te zhvilloje nje takim me Prefektin Roland Nasto per t'u njohur ne detaje me pasojat qe shkaktoi termeti.

Pas tërmetit të fortë që u ndje fuqishëm edhe në Tiranë, të gjitha ekipet e emergjencës së Bashkisë së Tiranës janë në terren për çdo rast të raportuar.
Kryetari i Basshkisë së Tiranës Erion Veliaj u bën thirrje të gjithë qytetarëve që nëse janë të prekur nga tërmeti të marrin në numrin e emergjencës 112 ose në nurmat e tjerë sipas nevojave që ata kanë.

“Ju lutem nëse jeni prekur nga tërmeti, njoftoni menjëherë në nr. unik 112 ose sipas nevojës:
Policia e shtetit  129,
Policia Bashkiake  042419465,
Zjarrfikësja 128,
Urgjenca  127”, shkruan Veliaj.

Pas komunikimit dhe informacionit të mbledhur në të gjitha njësitë administrative të Pogradecit, rezulton se nuk ka asnjë dëm të shkaktuar apo persona të lënduar nga lëkundjet e tërmetit.

Bashkia Pogradec është në gadishmëri të plotë për çdo ndërhyrje të nevojshme.

Një tërmet i fuqishëm lëkundi sot gjithë vendin dhe nëse ndodh një tjetër ja çfarë duhet të dini.

Disa nxitojnë për të hapur dyert e jashtme, të tjerë kanë dalë në ballkon apo janë vendosur poshtë shkallëve, prindërit kanë nxituar tek fëmijët.

Por si duhet të veprojmë gjatë kohës kur bie tërmet?

Në faqen Mbrojtja Civile Shqiptare jepen këshilla se si duhet të reagojmë gjatë rënies së tërmetit në varësi të vendit ku ndodhemi.

Nëse tërmeti bie gjatë kohës kur jemi në rrugë apo ambiente publike?

Për ata që janë në udhëtim apo drejtojnë mjetin gjatë kohës kur bie termet, këshillohet qëndrimi brenda në makinë dhe në njërin krah të rrugës.

Drejtuesi i mjetit duhet të shmangë qëndrimin nën ura, mbikalime, tabela të mëdha apo objekte të tjera.

Sipas ekspertëve do të jeni të sigurt nga tërmetet nëse merrni këto 3 hapa themelorë:

-Uluni në tokë,

-Fshihuni nën një tavolinë,

-Qëndroni aty deri sa të ndalojnë dridhjet.

Nëse nuk ka një tavolinë pranë jush, shtrihuni në një cep të ndërtesës dhe mbuloni kokën e qafën me krahët tuaj. Mos u mundoni të shkoni në një dhomë tjetër vetëm për t’u futur nën tryezë.

Nëse jeni në shtrat, mos lëvizni por qëndroni aty, duke mbrojtur kokën me një jastëk.

Ka më pak mundësi të lëndoheni duke qëndruar aty ku jeni.

Nëse je duke drejtuar makinën, gjej një vend për të parkuar.

Shmangni mbikalimet, urat, linjat dhe rreziqet e tjera.

Qëndroni brenda automjetit derisa dridhjet e tërmetit të kenë mbaruar.

Teska vendi është përfshirë nga një tërmet i fuqishëm, në rrjet nuk kanë munguar as memet të cilët kanë ironizuar deklaratën që bëri pak kohë presidenti i vendit Ilir Meta, duke thënë se vendit i kanoset një tërmet apokaliptik.

Menjehere pas lekundjeve te medha te termetit shume qytetare jane mbledhur jashte ambienteve te Kishes Ortodokse ne Tirane.

Një dasmë është ndërprerë nga lëkundjet e forta të tërmetit në zonën e Astirit në kryeqytet.

Një prej dasmorëve ka treguar për Report Tv se në momentin e tërmetit ata kanë nxituar të futen poshtë tavolinave.

"Jemi futur poshtë tavolinave. Nxituam të nxjerrim fëmijët jashtë. Njerëzit u përqendruan te dasma pastaj", tha dasmori.

Ministrja e Shëndetësisë Ogerta Manastirliu ka mbërritur në Spitalin e Traumës në kryeqytet për të parë gjendjen e personave të lënduar nga tërmeti. Minisrja ka deklaruar se deri tani në spitalin e Traumës në Tiranë janë dërguar 52 persona, ndërsa në Durrës janë dërguar 16 persona.

"Pashë nga afër gjendjen e të lënduarve nga tërmeti. Nga momenti i mbërritjes, tani janë 52 qytetarë që kanë marrë shërbim dhe janë larguar. Të gjithë po marrin ekzaminimet e nevojshme. Situata e tyre paraqitet e qetë. Një rast paraqitet më rëndë. Por në përgjithësi situata është e qetë. Në spital ka staf shtesë për të përballuar çdo fluks. Vijojnë qytetarët të vijnë të marrin shërbime. Qendra e urgjencës Kombëtare është duke punuar intensivisht. Po marrim qytetarët që kanë problematika. Janë situata që shoqërohen nga gjendje paniku. Urgjenca ka ndërhyrë edhe në shtëpi personat që kanë qenë në gjendje të rëndë. Vlerësimet do bëhen hap pas hapi. Nuk do mungojë asnjë element i kujdesit. Raste të tilla, kërkojnë gatishmëri dhe një plan emergjence, që nga vendosja e pacientëve në katet e para. Në Durrës 16 qytetarë kanë marrë shërbim shëndetësor në spital", tha Manastirliu.

Shkon në 51 numri i personave të lënduar nga tërmeti. Pak momente më parë në spital kanë mbërritur dy persona që kanë pësuar fraktura në gjymtyrë.

Tërmeti ka frikësuar të gjithë banorët e vendit, një njeri është filmuar duke dalë në rrugë vetëm me peshqir.

Të riut i është ndërprerë dushi dhe ka dalë me shpejtësi nga tërmeti.

Frika nga tërmeti ka bërë që të gjithë banorët të dalin jashtë banesave. I tillë është edhe personi në foto, i cili ka dalë në rrugë me të mbathura.

Rritet bilanci i të lënduarve nga tërmeti në vend. Deri më tani në spitalin e Traumës janë paraqitur 43 persona. Sipas burime te Report Tv behet fjale per lendime te vogla ne trup dhe ne koke, asnje ne rrezik per jeten

Gjatë tërmetit që ka tronditur vendin, stafi i Report Tv ka nxituar të largohet me shpejtësi jashtë ambienteve të saj.

Një pjesë e tyre ka telefonuar familjarët.

Pasi ka përfunduar kjo lëkundje stafi është kthyer sërish për të raportuar lajmin e fundit, ndërkohë që në momentet e transmetimit Live është ndjerë edhe lëkundja e dytë.

Lëkundjet e njëpasnjëshme sizmiologjike në Tiranë bënë që shumë qytetarë të dalin në rrugë mes panikut dhe frikës për lëkundje të tjera. Të gjithë, me fëmijët në krah, të larguar nga ndërtesat e larta u mblodhën në vendet që menduan si më të sigurta.

Disa dyqane në zonën e Astrit ka pësuar dëme të rënda materiale nga tërmeti që ka tronditur vendin. Muret anësore të dyqanit janë shembur plotësisht.

Janë regjistruar tre tërmete deri tani sipas Institutit  të Gjeoshkencave, Energjisë , Ujit dhe Mjedisit. Tërmeti i parë është regjistruar në orën  09:37:06 me epiqendër Lagunën e patokut, detin Adriatik me magnitudë 3.2 dhe thellësi 26 km.  Tërmeti i dytë është regjistruar në orën 14:04:20 me magnitudë 5.8, me thellësi 25 km me epiqendër Kepinj e Rodonit, 30 km larg nga Durrësi. Tërmeti i tretë  ka ndodhur në orën 14:15:49 me magnitudë 5.3 dhe me thellësi 12 km në Kepin e Rodonit, 30 km larg nga Durrësi.

Disa banorë në zonën e Don Boskos në kryeqytet kanë mbetur të bllokuar në ashensor në momentin kur ka rënë tërmeti. Por ato nuk kanë pësuar dëmtime të rënda pasi pas përfundimit të lëkundjeve janë dërguar në spitalin e Traumës për të marrë edhe ndihmën e parë mjekësore.

Nga tërmeti që ka përfshirë vendin, banorët janë tronditur duke lënë edhe banesat për të dalë në rrugë. Report Tv sjell pamje nga zona e Astirit ku banorët kanë dalë jashtë shtëpive të tyre pasi i tremben një rreziku apo një tjetër lëkundjeje.

Kryeministri Edi Rama ka folur ne telefon me kryeministrin italian Giuseppe Conte, i cili i ka shprehur solidaritetin e plote te Italise dhe gatishmerine per te mbeshtetur Shqiperine ne perballimin me pasojat e termetit te rende qe ra mbi vendin tone.

Deri më tani në spitalin e Traumës në kryeqytet janë paraqitur 26 persona të cilët kanë pësuar lëndime nga tërmeti.

TIRANE - Kryeminsitri Edi Rama ka mbledhur me urgjencë qeverinë në orën 23:30 lidhur me tërmetin e fuqishëm që goditi sot vendin tonë. Rama tha se i gjithë sistemi i operimit në këtë situatë të jashtëzakonshme ka vepruar në kohë reale. Kreu i qeverisë u shpreh se situata ishte e jashtëzakonshme, ndërsa shtoi se do të punohet me intensitet dhe kapacitet të plotë. 

Ministrja e Mbrojtjes Olta Xhaçka janë dëmtuar 563 banesa në të gjithë vendin. Ajo tha se dëmet janë modeste, duke veçuar Tiranën dhe Durrësin që kanë pasur dëmet më të rënda.

Mbledhja e qeverisë u shoqërua edhe nga një lëkundje e fuqishme me magnitudë 4.9. Në atë moment e kishte fjalën ministri Sandër Lleshaj i cili ndërpreu për pak fjalën duke ngritur kokën lart. “Po përpiqem dhe unë të mos më lëkundet zëri”, u shpreh Lleshaj.

Kryeministri Edi Rama anuloi udhëtimin për në New York pas lëkundjeve të fuqishme që goditën pasdite Shqipërinë. Rama ndodhej në Frankfurt dhe mori me urgjencë fluturimin për në Tiranë. S

Po nesër në Kuvend, do të mbahet në orën 11:00 një mbledhje emergjente e grupit, në sallën e grupit parlamentar në Kuvend, ku do të marrin pjesë edhe ministrat dhe kryetarët e bashkive.

"Prezenca në këtë mbledhje është e domosdoshme", u ka dërguar një mesazh kryeministri të gjithë anëtarëve që do të jenë në mbledhje. 

Menjëherë pas rënies së tërmetit, Sallat e Komandimit në të gjitha Drejtoritë Vendore të Policisë  në qarqe kanë komunikuar me Specialistët e Policisë së Zonave, me Spitalet dhe me përfaqësuesit e njësive administrative. 

Policia e Shtetit ka kaluar  e gjitha në gatishmëri.

Me  urdhër të Drejtorit të Përgjithshëm të Policisë së Shtetit   e gjithë Policia Rrugore êshtë në terren për të menaxhuar trafikun, të gjithë Specialistët e zonave  dhe Patrullat  e Përgjithshme kanë dalë në terren për tu ardhur në ndihmë banorëve në nevojë por edhe për të shmangur panikun e krijuar

Policia e Shtetit ju bën thirrje gjithë qytetarëve të telefonojnë në nr 112 për problematikat që mund të kenë nga rëna e tërmetit, duke ju garantuar se do jenë menjëherë pranë tyre.

Ministria e Shëndetësisë ka reaguar lidhur me situatën e tërmetit në vend. Ministria njofton se të gjithë strukturat shëndetësore janë në gatishmëri për të qenë pranë qytetarëve.

"Pas lëkundjeve të tërmetit të rënë pak minuta më parë, Ministria e Shëndetësisë njofton se të gjithë strukturat shëndetësore janë në gatishmëri për të qenë pranë qytetarëve që mund të paraqesin nevoja shëndetësore. 

Ministria e Shëndetësisë dhe Urgjenca Kombëtare ftojnë këdo që ka nevojë për ndihmë, të telefonojë në nr telefonit 127", njofton Ministria e Shëndetësisë.

Policia e Shtetit ka reaguar pas tërmetit të fuqishëm që tronditi vendin me epiqendër në Durrës.

"Menjëherë pas rënies së tërmetit, Sallat e Komandimit në të gjitha Drejtoritë Vendore të Policisë  në qarqe kanë komunikuar me Specialistët e Policisë së Zonave, me Spitalet dhe me përfaqësuesit e njësive administrative. 

Policia e Shtetit ka kaluar  e gjitha në gatishmëri.

Me  urdhër të Drejtorit të Përgjithshëm të Policisë së Shtetit   e gjithë Policia Rrugore êshtë në terren për të menaxhuar trafikun, të gjithë Specialistët e zonave  dhe Patrullat  e Përgjithshme kanë dalë në terren për tu ardhur në ndihmë banorëve në nevojë por edhe për të shmangur panikun e krijuar

Policia e Shtetit ju bën thirrje gjithë qytetarëve të telefonojnë në nr 112 për problematikat që mund të kenë nga rëna e tërmetit, duke ju garantuar se do jenë menjëherë pranë tyre", njofton Policia.

Një banesë dy katëshe pranë Kalasë së Elbasanit është dëmtuar nga tërmeti i cili goditi vendin pasditen e sotme. Ajo është çarë mes përmes por fatmirësisht dëmet janë vetëm materiale dhe nuk ka dëme  në njerëz.

Info e fundit nga Igjeum: Termeti me magnitude 5.8 Rihter dhe intensitet mbi 7.5 balle, 30 km ne veri te Durresit...ne bregdet afer kepit rodonit...termeti me i forte ne 20-30 vitet e fundit

Pas tërmetit që përfshiu gjithë vendin  ka reaguar Zëdhënësit i  Presidentit të  Republikes, Tedi Blushi.

Sipas tij Presidenti i Republikes  Ilir Meta shpreh keqardhjen për tërmetin që ka tronditur vendin tonë e në vecanti Qarkun e Durrësit dhe Tiranës.

"Presidenti Meta shpreson për sa më pak dëme dhe pasoja ndërkohe që  është  i rëndësishëm monitorimi i situatës në vazhdimësi  dhe informimi i qytetarëve nga strukturat pergjegjëse shtetërore", u shpreh Blushi.

Presidenti Meta po e ndjek situatën me vëmendje dhe shqetësim.

Muri i fakulteti të Inxhinierisë dhe Gjeologjikut është shembur për shkak të tërmetit të fortë që ka tronditur vendin.  Dy makina janë dëmtuar plotësisht, ndërkohë që fatmirësisht për shkak se ka qenë ditë e shtunë në fakultet nuk ka pasur studentë.

Bashkia Tiranë: Para pak minutash vendi u prek nga një tërmet i fortë. Raportimet e para tregojnë për magnitude 5.8 ballë me epiqendër në detin Adriatik.

Të gjitha ekipet e Emergjencës së Bashkisë së Tiranës ndodhen në terren për të dhënë ndihmën e parë për këdo që ka nevojë

Bashkia Tiranë: Për çdo emergjencë lutem njoftoni në numrat: Policia e shtetit 129, Policia Bashkiake  042419465, Zjarrfikesja 128, Urgjenca 127

Pas lëkundjeve të tërmetit të rënë pak minuta më parë, Ministria e Brendshme, në bazë të raportimeve të para që ka marrë nga Drejtoritë Vendore të Policisë, Shërbimet Zjarrfikëse dhe Prefekturat, njofton se nuk ka persona të lënduar dhe as dëme të rënda materiale.

Të gjitha strukturat e rendit janë në gadishmëri të plotë dhe do të marrin çdo masë për të qenë pranë dhe në shërbim të qytetarëve.

MB dhe Policia e Shtetit fton këdo që ka nevojë për ndihmë, të telefonojë në nr falas 112.

Ky është njoftim paraprak dhe pas thellimit të informacionit do të japim të dhëna të tjera.

Nga tërmeti i fuqishëm ka pasur dëmtime të fuqishme në disa pallate në kryeqytet. Për pasojë disa pallate kanë pësuar dëme materiale duke përbërë rrezik për qytetarët.

Sizmiologu Rrapo Ormeni tha për Report Tv se në orët në vazhdim mund të ketë sërish lëkundje tërmeti në vend, por me një mangnitudë më të ulët se dy lëkundjet e para që u ndjenë në të gjithë vendin.

"Ky është një tëremrt me mangnitudë të fortë dhe kanë një përsëritje në një hark kohor. Do ketë sërish tëmete në vend, derisa të vendoset ekuilibri, por lëkundjet do vijnë duke u zvogëluar. Aktiviteti sizmik shoqërohet me lëkundje tërmeti siç ka ndodhur në vitet 60 dhe 7O", u shpreh Ormeni.

Pas tërmetit të fuqishëm që ka shkundur vendin ka reaguar edhe Ministria e Mbrojtjes teksa njofton se sipas informacioneve paraprake tërmti 5.8 ballë ka qenë me epiqendër në Durrës. Ajo njofton se po punohet me shpejtësi për bërë bilanc për dëmet paraprake. 

Edhe Gjirokastra është shkundur nga tërmeti i fuqishëm i cili ka përfshirë të gjithë vendin. Lëkundjet më të mëdha janë ndjerë në fshatin Fushëbardhë. Njerëzit kanë nxituar të lënë banesat, por deri më tani nuk raportohet për pasoja.

Tërmet i fuqishëm është ndjerë edhe në Shkëmbin e Kavajës në Durrës. Report Tv sjell foto nga kjo zonë ku për shkak të lëkundjeve të fuqishme janë shkëputur edhe disa gurë.

Lëkundje të forta të tërmetit me magnitudë 5.8 janë ndjerë edhe në Tiranë. Qytetarët kanë nxituar të dalin jashtë për të shmangur rrezikun. Ndërkohë në zonën e Bllokut një grua e cila ka qenë duke dalë nga banesa në momentin e lëkundjes ka pësuar dëmtime. Ajo është dërguar me ambulancë në spital.