Eurodeputetët letër Von der Leyen: Hetoni Oliver Varhelyin, mbështeti Dodik-un e shpallur ‘non grata’ për shpërbërjen e Bosnje-Hercegovinës

30 eurodeputetë i kanë dërguar një letër presidentes së Komisionit Europian, Ursula von der Leyen ku i kërkojnë që të hetojë zyrtarin e BE-së, Oliver Varhelyi. Anëtarët e Parlamentit Evropian (PE) i shkruajnë në letër Von der Leyen se sipas një dokumenti të zbuluar thuhet se komisioneri i BE-së për Fqinjësinë dhe Zgjerimin, Oliver Varhelyi ka bashkëpunuar me udhëheqësin serb Milorad Dodik, i cili u shpall ‘non grata’ nga SHBA, për të shpërbërë Bosnjën dhe Hercegovinën.

“Më shqetësues është një dokument i zbuluar, i cili është nënshkruar nga Johann Sattler, Shefi i Delegacionit të Bashkimit Evropian në Bosnje dhe Hercegovinë, ku thuhet se komisioneri i BE-së për Fqinjësinë dhe Zgjerimin, Oliver Varhelyi, ka bashkëpunuar hapur me Milorad Dodik për ndarjen e mundshme të Bosnje dhe Hercegovinës. Raporti vëren se komisioneri Varhelyi ‘u pajtua’ me z. Dodik lidhur me datën e një sesioni të posaçëm të Asamblesë Kombëtare të Republikës Sprska dhe se do të shpallej një moratorium 6-mujor për të miratuar legjislacionin mbi tërheqjen e njëanshme nga institucionet shtetërore”, shkruhet në letër.

Eurodeputetët kanë ngritur tre pyetje në letër dhe presin përgjigje nga Komisioni Europian mbi veprimet e Varhelyit, nëse ato janë në përputhje me politikën e BE-së ndaj Bosnje-Hercegovinës dhe nëse do të ketë një hetim për rolin e tij si Komisioner për Fqinjësinë dhe Zgjerimin.

Bosnja aktualisht po përballet me krizën e saj më të madhe politike që nga përfundimi i luftës në dhjetor 1995, kur u nënshkrua marrëveshja e paqes e Dejtonit. Marrëveshjet e ndanë vendin në dy entitete gjysmë autonome, entitetin e Federatës së dominuar nga boshnjakët dhe kroatët dhe entiteti Republika Srpska e drejtuar nga serbët.

Letra e nënshkruar nga 30 eurodeputetët thekson se Komisioni si një palë neutrale ka një rol kyç në sigurimin e respektimit të marrëveshjes së Dejtonit nga të dyja palët pasi tensioni politik brenda Bosnje Hercegovinës ka përshkallëzuar. Kjo letër u nda në rrjetin social ‘Twitter’ nga eurodeputetja Katalin Cseh.

“Me kolegët e eurodeputetëve, ne bëjmë thirrje për një hetim mbi rolin e Komisionerit Varhelyi që ndihmon përshkallëzimin separatist Milorad Dodik në Bosnje-Hercegovinë. BE-ja duhet të qëndrojë në mënyrë të vendosur në anën e paqes. Njerëzit në Bosnje-Hercegovinë meritojnë qartësi për këtë situatë”, shkruan ajo.

Milorad Dodik u shpall “non grata” nga SHBA si i përfshirë në korrupsion dhe cenim të demokracisë. Prej muajsh, ai ka kërcënuar tërheqjen e serbëve nga institucionet e shtetit federal boshnjak me pretendimin se nuk janë respektuar të drejtat e minoritetit serb në vend sipas Marrëveshjes së Dejtonit 1995. Pas shpalljes “non grata” nga SHBA, Dodik deklaroi se në 5 vitet e ardhshme ai parashikon që Republika Srpska do të bëhet shtet i pavarur. Javën e ardhshme, ministrat e Jashtëm të BE do të mblidhen për të diskutuar çfarë masash dhe qëndrimesh do të mbajnë për situatën në Bosnje-Hercegovinë, raporton Shqiptarja.com.

Letra e eurodeputetëve drejtuar presidentes së KE-së, Ursula von der Leyen:

Parlamenti Evropian, por padiskutim edhe Komisioni Europian e ndjekin me vëmendje çështjen e Republika Srpska. Paqja dhe integriteti territorial i Bosnje dhe Hercegovinës është i një rëndësie vendimtare jo vetëm nga një perspektivë lokale, por edhe nga një perspektivë rajonale dhe në të vërtetë evropiane.

Ne jemi jashtëzakonisht të alarmuar nga përshkallëzimi i tensionit politik brenda Bosnje dhe Hercegovinës, i nxitur nga Milorad Dodik, anëtari serb i presidencës trepalëshe të vendit. Nëse përpjekja e z. Dodik për të shpërbërë vendin dhe për të vendosur pavarësinë e RS duke u tërhequr nga institucionet shtetërore dhe duke ngritur autoritete të pavarura në territorin e RS është e suksesshme, pasojat e saj do të ndihen shumë përtej kufijve të Bosnje Hercegovinës, ku do të sjellë pasoja të rënda edhe për politikën e jashtme të BE-së.

Si një palë neutrale me ndikim të konsiderueshëm, Komisioni ka një rol kyç për të siguruar që konkluzionet e Marrëveshjes së Dejtonit të respektohen nga të dyja palët.

Megjithatë, jo të gjitha vendet anëtare të BE i ndajnë këto synime. Është raportuar gjerësisht se qeveria aktuale hungareze po mbështet aktivisht fushatën e z. Dodik për të ndjekur strategjinë e tij politike në ndarjen e Bosnje dhe Hercegovinës, siç dëshmohet nga një mbështetje e fundit prej 100 milion euro nga Hungaria për Republikën Srpska, pak përpara zgjedhjeve të ardhshme të përgjithshme në Bosnje.

Megjithatë, edhe më shqetësues është një dokument i zbuluar, i cili është nënshkruar nga Johann Sattler, Shefi i Delegacionit të Bashkimit Evropian në Bosnje dhe Hercegovinë, ku thuhet se komisioneri i BE-së për Fqinjësinë dhe Zgjerimin, Oliver Varhelyi, ka bashkëpunuar hapur me Milorad Dodik për ndarjen e mundshme të Bosnje dhe Hercegovinës. Raporti vëren se komisioneri Varhelyi ‘u pajtua’ me z. Dodik lidhur me datën e një sesioni të posaçëm të Asamblesë Kombëtare të Republikës Sprska dhe se do të shpallej një moratorium 6-mujor për të miratuar legjislacionin mbi tërheqjen e njëanshme nga institucionet shtetërore, raporton Shqiptarja.com.

Ne dëshirojmë të pyesim nëse Komisioni konsideron se sjellja e komisionerit Varhelyi ishte në përputhje me politikën zyrtare të BE-së ndaj Bosnje Hercegovinës? A mund të presim një hetim për të përcaktuar nëse veprimet e tij janë në përputhje me rolin e tij si Komisioner për Fqinjësinë dhe Zgjerimin? Cili është qëndrimi i Komisionit në lidhje me integritetin territorial të Bosnje Hercegovinës dhe si planifikon Komisioni të sigurojë që konkluzionet e Marrëveshjes së Dejtonit nuk do të shkelen?/Përgatiti Shqiptarja.com

SI.E./AV/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

Ish ministri dhe ish kryebashkiaku i Sarandës Stefan Çipa në SPAK

Ish ministri dhe ish kryebashkiaku i Sarandës Stefan Çipa në SPAK