Udhëtim në kohë, pullat postare dhe rrugëtimi i pandalshëm i Posta Shqiptare

Të kthehesh pas më 5 maj të 1913-s, pa rrëfime të ngjyrosura, por me simbolin më të vyer të historisë së Shqipërisë: pullat postare. Me to, përjeton gjithashtu rrugëtimin 110-vjeçar të Postës Shqiptare; kupton thellësisht konsolidimin e shërbimeve të saj postare, konkretisht se çfarë e bën të jetë shoqëria më e madhe tregtare në vend.

Bëhet fjalë për shumë emisione pullash, me tipare unike e shprehëse. Koleksionistët ndajnë të njëjtin mendim përsa i takon pasurisë së çmuar të Postës Shqiptare. Sipas tyre, pullat gëzojnë tematika spikatëse, të cilat pasqyrojnë më së miri jo vetëm historinë, por edhe trashëgiminë natyrore e kulturore të Shqipërisë.

Rrugëtimi drejt së ardhmes është i pandalshëm, sikurse puna e vazhdueshme e Postës Shqiptare për të tjera emisione pullash, cilësore e plot vlera. Është treguar kujdes që temat kombëtare të zënë vendin më të madh në emëtimin e tyre; figurat atdhetare gjithashtu zënë hapësirë të rëndësishme. I njëjti përkushtim shfaqet për emisionet “Flora” dhe “Fauna”, por edhe për evenimentet, aktivitetet dhe figurat e shquara ndërkombëtare nën ciklin e emisionit “Europa”.

Paraqitja e pullave s’mund të cilësohet veçse dinjitoze, jo vetëm për shkak të futjes së elementeve të reja filatelike, por edhe nga ana cilësore e kompozicionale.Larmishmëria e tyre, është impresionuese. Pikërisht për këtë arsye - që shoqëron misionin e Posta Shqiptare për t’i folur gjeneratave të reja të vërtetën e rrënjëve të tyre - është ngritur një hapësirë e dedikuar, ku ekspozohen pullat e emëtuara ndër vite, si dhe objekte të vjetra autentike të Postës.

Posta Shqiptare nuk është thjesht një institucion që ofron shërbime utilitare. Angazhimi i saj në ruajtjen dhe pasurimin e pullave postare, edhe në sajë të ngritjes së një galerie të kuruar, e dëshmon më së miri këtë.
Posta Shqiptare kontribuon me perfeksionizëm për mirëqenien e qytetarëve dhe të vendit, duke mos harruar se njohja e së shkuarës parashtron të ardhme premtuese. Për të gjithë ju të interesuarit, mund t’i drejtoheni sektorit filatelik dhe porositë tuaja mund t’i dërgoni me email në adresën fizike, ose në email-et e shkruara në website-n e Posta Shqiptare.

#Shpejt #Sigurt #Kudo
Posta Shqiptare

A.M./Shqiptarja.com

TAG:
• posta shqiptare
• pulla postare