Mbyllet aksioni, IKMT shemb 33 objekte tek 'Astiri! 25 banorë në hetim për bombat molotov, 1 i arrestuar /Video

Inspektorati Kombëtar i Mbrojtjes së Territorit ka njoftuar në mbrëmje se janë shembur të 33 objektet në zonën e Astirit të cilat ishin pengesë për projektin e Unazës së Re, dhe për të cilat janë bërë gati dëmshpërblimet, një pjesë e të cilave të tërhequra nga banorët.

Nga operacioni qe filloi mengjesin e sotëm, u shembën 15 objekte një katëshe, 11 objekte 2 katëshe, 6 objekte 3 katëshe dhe 1 objekt katër katesh.

Inspektorati Kombëtar i Mbrojtjes së Territorit njofton deri më tani janë prishur 24 objekte nga 33 që parashikohen të përfundojnë brenda ditës së sotme.

"Prej mëngjesit te sotëm IKMT ka nisur prishjen e 33 objekteve ne zonën e “Astir”. Deri në këto momente janë prishur 24 objekte, prej të cilave 8 objekte 2 katëshe, 4 tre katëshe dhe 12 nje katëshe. Objektet e tjera janë ne proces dhe do te prishen të gjitha brenda ditës së sotme", shkruan IKMT.

Mes të shoqëruarve nga policia gjatë mëngjesit të sotëm në protestën e banorëve të "Astirit" ka qenë edhe pedagogu i gazetarisë Ervin Goci.

Report Tv ka siguruar edhe momentin e shoqërimit të pedagogut, i cili edhe pse ka kundërshtuar është marrë nga 4 efektivë të FNSH.

Goci ka qenë i pranishëm në grupin e protestuesve që kanë bërë rezistencë gjatë mëngjesit të sotëm ndaj policisë, ku disa prej tyre kanë hedhur gurë dhe bomba molotov ndaj efektivëve.

Kryedemokrati Lulzim Basha ka mbërritur në spitalin e Traumës në kryeqytet ku po viziton banorët e Astirit të lënduar gjatë tensioneve të krijuar mëngjesin e sotëm. Por ndonëse kishte premtuar se do të ishte pranë tyre, lideri demokrat ka munguar mëngjesin e sotëm krah banorëve të Astirit edhe pse ishte njoftuar se do niste aksioni për shembjen e banesave të tyre. Krah kryedemokratit janë parë edhe ish-deputetët e PD, Gent Strazimiri, Albana Vokshi, Jorida Tabaku.

Në një video të filmuar nga vetë banorët e Astirit gjatë orëve të para të mëngjesit shihet momenti kur policia ndërhyn duke hedhur gaz lotsjellës. Më pas banorët e Astirit të cilët kanë pritur gjatë gjithë natës pranë ambienteve të një lokali u kundërpërgjigjen duke hedhur gurë  dhe bomba molotov.

Ndërkohë në video shihet një banore që thërret të tjerët të kapin gurët dhe të qëllojnë policinë.

"Kapni gurët, mos rrini, mos u fshihni. Hajde! Kapni gurët. Pse kshu mbrohen shpiat? " dëgjohet të thotë një banorë në fillim të videos.

Pas afrimit të policisë të cilët hedhin gaz lotsjellës dhe spraj, banorët futen brenda ambienteve të lokalit, ku dëgjohen kollitje dhe shihen që shumica prej tyre fërkon sytë.

Ndërkohë në video shihet edhe pedagogu, Ervin Goci i cili është shoqëruar në komisariat.

Përfundon aksioni për shembjen e 5 objekteve në zonën e Unazës së re, ndërkohë që vijon aksioni për shembjen e tre objekteve të tjera të parashikuara për ditën e sotme. Deri më tani janë shembur 2 biznese dhe 3 banesa. Report Tv sjell pamje nga aksioni i IKMT.

Report Tv ka siguruar foto me dron nga zona e Astirit ndërkohë që vijon aksioni i IKMT për shembjen e 33 objekteve.

Institucioni i Avokatit të Popullit ka njoftuar se po ndjek në terren të gjithë situatën që është krijuar tek zona e ‘Astirit’, pas ndërhyrjes së sotme të IKMT për prishjen e 33 objekteve për t’i hapur rrugën ndërtimit të Unazës së Re.

Përmes një reagimi për mediat, ky institucion bën me dije se po ndjek me shqetësim ngjarjet e ditës së sotme në segmentin e Unazës së Re ku janë shënuar përplasje midis banorëve që kundërshtojnë një projekt ende të kontestuar infrastrukturor dhe forcave të rendit.

Për Avokatin e Popullit, respektimi i të drejtës qoftë edhe të një qytetari të vetëm duhet të jetë në bazamentin e një shteti demokratik pasi nuk mund të ketë interes madhor e të mirë kolektive, të themeluar mbi dhunimin e dikujt tjetër.

Reagimi i Avokatit të Popullit:

Institucioni i Avokatit të Popullit po ndjek me shqetësim ngjarjet e ditës së sotme në segmentin e Unazës së Re ku janë shënuar përplasje midis banorëve që kundërshtojnë një projekt ende të kontestuar infrastrukturor dhe forcave të rendit.

Ekipe të Avokatit të Popullit ndodhen në terren për të dëshmuar nga afër gjithçka që po ndodh e për ta referuar atë më pas me paanësi.

Në këtë situatë, institucioni kushtetues i Avokatit të Popullit, i cili prej një muaji ka dërguar në Kuvendin e Shqipërisë një raport të veçantë mbi çështjen e Astirit dhe ende është në pritje të përgjigjes, bën thirrje për vetëpërmbajtje, maturi, si dhe për garantimin e plotë të të drejtës së Mbrojtësve të të Drejtave të Njeriut për të kryer detyrën e tyre.

Gjithashtu, Avokati i Popullit tërheq vëmendjen e autoriteteve shtetërore që të mënjanojnë konfliktin me qytetarët, të mos zbatojnë politikën e faktit të kryer e të mos e tejkalojnë me anë të zellit të pajustifikuar detyrën e tyre, sidomos në kushtet kur çështja për të cilën ka lindur ky konflikt nuk është sqaruar.

Respektimi i të drejtës qoftë edhe të një qytetari të vetëm duhet të jetë në bazamentin e një shteti demokratik pasi nuk mund të ketë interes madhor e të mirë kolektive, të themeluar mbi dhunimin e dikujt tjetër.

Gjithashtu, Institucioni i Avokatit të Popullit u bën thirrjen autoriteteve të tjera vendase dhe ndërkombëtare që të ndërhyjnë sa më parë për qetësimin e situatës.

Ish -deputetja e PD, Alban Vokshi i ka dalë në mbrojtje koleges së saj Oriola Pampuri e cila tha se një protestues (Mahmut Imallari ) kishte vdekur si pasojë e përplasjes me policinë.

Vokshi ka thënë se Pampuri është bazuar tek dëshmitë e banorëve duke justifikuar deklaratën e rëndë të Pampurit.

"Kolegia ime u shpreh se nga informacionet që i janë dhënë nga banorët dhe dëshmitarët." ka deklaruar Vokshi.

Ndërkohë Vokshi ka deklaruar se policia ka bëre dhjetra arrestime, ndërsa për ta ka thënë se nuk dihet se ku po mbahen.

"Ka nga ata që i ka dalë kavilja, disa kanë thyer dhëmbët. Disa zonja kanë djegie për shkak të gazit që është përdorur mbi to. Me sa u informova kanë pasur djegie të shkallës së lartë. Ka dhjetëra të arrestuar. Nuk dihet se në cilin komisariat mbahen, mes tyre ka edhe gra." tha Vokshi ndër të tjera.

Ish-deputeti i PD, Klevis Balliu, i cili njihet për mbështetjen e vazhdueshme të banorëve të Astirit, ka mbajtur një deklaratë për mediat në lidhje me zhvillimet e sotme tek Unaza e Re ku IKMT po vijon aksionin e prishjes së banesave që pengojnë projektin e zgjerimit të rrugës. Balliu ka hedhur akuza ndaj policisë duke thënë se ka ushtruar dhunë ndaj banorëve.

Sipas Ballit të gjithë banorët në këtë zonë do të dëmshpërblehen të gjithë, si ata që kanë dokumente si edhe ata që nuk i kanë.

"Kanë dhunuar, prindër, fëmijë të gjitha moshave. I kanë hedhur nga çatitë, dikush ka thyer brinjët, krahët dikush ka mushkëritë me probleme. PD së shpejti do të jetë në qeveri dhe garanton dëmshpërblim cent për cent të banorëve të Unazës. Me letra pa letra nuk ka rëndësi. Kur shteti të merr shpinë duhet të dëmshpërblejnë. Nuk dëbohen qytetarët nga shpia me dhunë. Sot aferën e INK dhe Salillarit që janë kapur në konflikt të patër. Për hir të xhepave të oligarkëve sot po shemben shtëpitë. Ka qenë një dhunë e tmerrshme por kjo sakrificë do të jetë mision që do të shpërblehet cen për cent. Mbajeni mend mirë këtë, do të dëmshpërblehet. Dhe vënien përballë drejtësisë banditëve. Nga efektivi më i thjeshtë i policisë e deri tek Edi Rama. Ai për shqiptarët ka zgjedhur gazin ndërsa me Vuçiçin kërkon dialog. Ai nuk ka nevojë për linja ruse, pasi ai është vetë linja ruse në Shqipëri. Për shkak të kësaj sakrifice...këta banorë mbështetën ligjin ndërsa Rama dhunën. Kjo qeveri është banditeske. Pushtetarëve u jep qindra miliona euro. Këtu ka 30 vjet që paguajnë taksat. Ata janë heronj. " tha Balliu.

Ka shkuar në 13 numri i të plagosurve pas përplasjes së banorëve të Astirit me efektivët e policisë në afërsi të ish-Sheshit Shqiponja.

Në spitali e Traumës sapo ka ardhur edhe një grua e plagosur duke rritur numrin e të plagosurve. Sipas policisë deri më tani janë të plagosur 5 efektivë të FNSH,  Shqiponjat dhe Patrullat e Përgjithshme. Po kështu të plagosur janë edhe 8 banorë.

Report Tv ka siguruar edhe emrat e disa prej të plagosurve:

Policë:
Sali Lasha

Banorë:

Alda Hajdarasi 20 vjeç

Mahmut himollari 57 vjeç

Dhurata shehu 69 vjeç

Adelina Shehu 46 vjeç

Artan muja 43 vjeç

Isuf gjata 80 vjeç

Gentian alla 36 vjeç

Cerciz jace 74 vjeç

Lindita protoduari

IKMT, ashtu siç kishte njoftuar më parë, nisi mëngjesin e kësaj të marte prishjen e objekteve në zonën e “Astirit” që preken nga ndërtimi i Unazës së Re.

Gjatë nisjes së prishjes së objekteve, ka pasur incidente mes banorëve dhe forcave të Policisë, të cilët kishin shkuar në mbështetje të IKMT.

Policia e Shtetit njofton se gjatë ndërhyrjes, një grup banorësh kanë kundërshtuar me dhunë punonjësit e IKMT-së dhe punonjësit e Policisë.

Policia sqaron se banorët kanë sulmuar me gurë, sende të forta dhe bomba moltov punonjësit e Policisë, të cilit ishin planizuar me shërbim.

Si pasojë e sulmit mbi Policinë janë plagosur 5 efektivë nga FNSH-ja, Shqiponjat dhe Patrullat e Përgjithshme, të cilët u dërguan për ndihmë mjekësore në spitalin ushtarak.

Gjithashtu edhe 7 banorë janë lënduar e po marrin ndihmë mjekësore jashtë rrezikut për jetën.

Policia e Shtetit u ka bërë thirrje banorëve që të distancohen nga dhuna dhe të mos bien pre e provokimeve, pasi do përballen me pasojat ligjore.

Gjithashtu, Policia e Shtetit u bën thirrje qytetarëve që janë prezent tek Unaza e Re, të mos nxisin banorët për të sulmuar forcat e Policisë dhe të shmangin deklaratat disinformuese.

Policia Rrugore e Tiranës ka bllokuar përkohësisht lëvizjen në të dy krahët e Unazës së Re, deri në përfundim të aksionit të IKMT-së për shembjen e disa objekteve, që do t’i hapin rrugë projektit të ri.

TIRANE- Një fakenews qarkulloi sot në media i përhapur nga deputetja e PD Oriola Pampuri e cila deklaroi se një protestues i Astirit ka vdekur dhe gjendej në morg. Sipas Pampurit viktima quhej Mahmut Imallari dhe sipas saj, trupi i tij gjendej në morgun e spitalit. Madje ajo akuzoi spitalin e traumës se po mbante të fshehtë ngjarjen.

Pampuri: Zotëria, është zyrtare, zotëria ka humbur jetën. Për këtë Edi Rama do të mbajë përgjegjësi. Një nga banorët e Unazës, një nga protestuesit sot ka humbur jetën për shkak të dhunës që është ushtruar nga policia e Sandër Lleshit dhe Edi Ramës. 

Gazetari: Është e konfirmuar kjo? 

Pampuri: Tani sapo ma konfirmojnë banorët që kishin komunikuar me familjarët. është një turp për të cilin do të mbani përgjegjësi. është një krim i cili lidhet drejtpërdrejtë me Edi Ramën. 

Gazetari: Emrin e personit? 

Pampuri: Mahmut Himallari.

Deklarata e Oriola Pampurit fshihet nga Live i FB

Po pas konfirmimit se lajmi që përhapi ish-deputetja është i rremë, vetë ajo por edhe PD ka nxituar të fshijë videon nga faqja zyrtare e saj.Në të vërtetë Imallari është jashtë rrezikut për jetën dhe ka marrë vetëm një ndihmë shëndetësore pranë Spitalit. Nga foto e shkrepur në spitalin e Traumës Imallari qëndron madje ulur vetë pa ndihmën e asnjë personi dhe është gati për të lënë spitalin. 

Mahmut Imallari

Inspektorati Kombëtar i Mbrojtjes së Territorit ka njoftuar nisjen e aksionit për shembjen e 33 objekteve në zonën e Astirit. IKMT njofton se janë shpronësuar 21, ndërsa të tjerat janë skualifikuar nga procesi i legalizimit.

"IKMT nis aksionin tek “Astir” Inspektorati Kombëtar i Mbrojtjes së Territorit ka nisur mëngjesin e sotëm prishjen e një sërë objektesh në zonën e “Astirit”, për projektin e Unazës së Madhe së kryeqytetit, Loti I. Janë 33 objekte që do të prishen, prej të cilave 21 janë shpronësuar, ndërsa të tjerat janë skualifikuar nga procesi i legalizimit. Objektet variojnë nga një deri në katër kate. IKMT mbështetet në këtë aksion nga policia e shtetit", njofton IKMT.

Aksioni i IKMT në zonën e Astirit për prishjen e banesave ka 'paralizuar' tërësisht lëvizjen në këtë zonë mëngjesin e sotëm. Në zonë janë vendosur forca të shumta të policisë bashkiake dhe asaj të rendit për të garantuar mbarëvajtjen e aksionit të shembjes së banesave dhe për të shmangur përplasjet e banorëve dhe aktorëve politikë të djathtë me punonjësit e IKMT. Si rrjedhojë ata kanë bllokuar qarkullimin në këtë zonë si për mjetet por edhe për qytetarët që përdorin këtë rrugë për të kaluar.

Që në orët e para të mëngjesit të sotme kanë nisur prishja e banesave tek Unaza e Re. Ndërkohë banorët kanë kundërshtuar dhe ka patur momente përplasje me policinë.

Punonjësit e IKMT-së po vijojnë shembjen e godinave pa leje në gjurmë të Unazës, ndërkohë disa prej familjeve  kanë marrë edhe kompensimin sipas ligjit.

Sot është parashikuar që të prishen 8 banesa.

Banorët e Astirit kanë kaluar natën e djeshme jashtë banesave duke qenë se ishin paralajmëruar nga IKMT se dje do të nisnin shembjet në këtë zonë. Banorët kanë kaluar natën në lokalet e zonës dhe janë pajisur edhe me batanije për të përballuar temperaturat më të ulëta gjatë orëve të natës.

Report Tv ka siguruar pamjet e përplasjes së banorëve të Astirti me policinë që pa zbardhur mirë dita e sotme. Banorët të irritur me policinë kanë hedhur bomba molotovi shumë të rrezikshme ku si pasojë kanë lënë të plagosur të paktën 4 efektivë të plagosur. Këto shishe të mbushura me lëndë djegëse shpërthejnë direkt sapo përplasen me tokën duke krijuar flakë të mëdha.

Që në orët e para të mëngjesit, forca të shumta të policisë janë pozicionuar tek sheshi Shqiponja dhe pranë urës tek Astiri duke mos lejuar banorët që të afrohen. Ndërkohë banorët dhe protestuesit e Astirit të cilët kishin paralajmëruar edhe më parë përplasje me forcat e rendit, kanë hedhur bomba molotov ndaj policisë ku për pasojë dy prej këtyre të fundit  kanë mbetur të plagosur. Ndërkohë për të shpërndarë protestuesit policia ka hedhur gaz lotsjellës.

Policia e Shtetit ka përdorur gazlotësjellës, pasi banorët kanë nisur të qëllojnë me gurë në drejt të tyre. Po ashtu, blutë kanë bërë shoqërimin e më shumë se 10 personave, disa prej tyre, banorë të kësaj zone, ndërsa disa të tjerë kanë ardhur në ndihmë të protestuesve mes të cilëve edhe aktivisti Ervin Goci.

Si pasojë e përplasjes kanë mbetur të lënduar 6 qytetarë, si dhe 4 efektivë të policisë.