Ministria e Shëndetësisë ka reaguar pas vdekjes së nënës 35-vjeçare, Aida Çajka dhe foshnjës së saj në maternitetin “Koço Gliozheni”.

Në reagimin e Ministrisë theksohet se të gjitha lëvizjet e pacientes në QSUT dhe spitalin e Sanatoriumit janë kryer me autoambulancë dhe të shoqëruar nga mjekë.

MSH sqaron se pacientja ka mbërritur në maternitet në orën 23:15 minuta dhe është vështirësi në frymëmarrje, djersë si dhe puls i dobët, çka ka shtuar dyshimet e mjekut për një problem në zemër dhe për këtë është përcjellë drejt QSUT. 

Nisur nga simptomat e pacientes, thuhet më tej në reagimin e MSH, ajo përcillet drejt Sanatoriumit ku edhe zbulohet se 35-vjeçarja kishte probleme me gjakun (rënie e kuadrit të gjakut, grafi pulmonare normale, dhe u dyshua për hemorragji të brendshme pa burim të përcaktuar).

Gjatë ndërhyrjes kirurgjikale, sqaron Ministria e Shëndetësisë, pacientes i është konstatuar hemorragji masive në regjionin e shpretkës gjë që ka komplikuar gjendjen shëndetësore të gruas shtatzënë. 

"Nisur nga reperti kirurgjikal i paraqitur në orën 5 e 45 minuta u kërkua konsultë nga kirurgu, i cili konstatoi hemorragji masive në regjionin e shpretkës dhe koagula të shumta në këtë zonë. Megjithë ndihmën mjekësore të ofruar, pacientja fatkeqësisht ndërroi jetë. Kështu, të gjitha lëvizjet e pacientes janë bërë me autoambulancë nën asistencën e personelit mjekësor dhe shoqëruar me dokumentacionin mjekësor përkatës", thuhet në reagimin e MSH. 

Sa i takon foshnjës së pajetë, MSH thotë se fetusi u nxor i vdekur.

35-vjeçarja Aida Cajka ishte në muajin e nëntë të shtatzënisë. 

Reagimi i Ministrisë së Shëndetësisë:
"Pacientja A. Ç., e datëlindjes 28/07/1981, lindur në Kukës dhe banuese në Bathore, Tiranë, shtatëzania e tretë, është paraqitur në SUOGJ “Koço Gliozheni” ​rreth orës 22 e 30 minuta të datës 15/09/2016. Pacientja paraqiti ankesa për vështirësi në frymëmarrje, cianozë periorale dhe dhimbje në regjionin perikardiak. Në Repartin e Pranimit të Shërbimit të Obstetrikës të këtij spitali, është ekzaminuar nga mjekët e rojes në abdomen, pasi gruaja ka refuzuar vizitën vaginale, e cila rezultoi me RZF (Rrahjet e Zemrës Fetale) prezente, uterus të qetë, pa kontraksione, paraqitje oblik-cefalik në palpacion, pa hemorragji të dukshme. Në këto kushte, pacientja dërgohet me autoambulancë nën asistencë të personelit mjekësor rreth orës 23 e 15 minuta në Urgjencën e QSUT “Nënë Tereza,” dhe pas mbërritjes është vizituar nga mjeku kardiolog.

Më tej, nisur nga dispnea, cianoza dhe dhimbja prekordiale që paraqiste pacientja, rreth orës 1 e 45 minuta dërgohet me autoambulancë nën asistencën e personelit mjekësor të shërbimit të Urgjencës në SU “Shefqet Ndroqi”. Pacientja u paraqit në SU “Shefqet Ndroqi” rreth orës 02 të datës 16/09/2016. Aty konstatohet një rënie e kuadrit të gjakut, grafi pulmonare normale, dhe u dyshua për hemorragji të brendshme pa burim të përcaktuar.

Për këtë arsye, pacientja rikthehet në SUOGJ “Koço Gliozheni” në orën 4 të datës 16/09/2016, e shoqëruar me personel mjekësor me oksigjen dhe në perfuzion me dopaminë , ku shtrohet me diagnozën: “Gravidancë 41-42 javë oblik-cefalik, feto-morto in utero, abdomen akut”.

Qysh në shtrim, përshkruhet gjendje e rëndë, e zbehtë, me djersë, puls të dobët takikardik 120/min, TA (Tension Arterial) 83/40 mm të shtyllës së zhivës. Në këto kushte, transferohet menjëherë në reanimacion, ku fillohet reanimimi dhe monitorimi. Vazhdoi trajtimi i pacientes me gjak, dopaminë, adrenalinë dhe O2 nazal dhe kortizonik. Në kushtet e gjendjes së rënduar të pacientes, u thirr konsultë e zgjeruar, dhe megjithë vazhdimin e reanimimit, gjendja e pacientes vazhdoi të rëndohet, me puls periferik, me shenjat tipike të gjendjes së shock-ut.

Në këtë situtatë, konsulta vendosi që pacientja të futet në sallën operatore me diagnozën: “Abdomen Akut”, me dyshim për hemorragji të brendshme. Në orën 5, pacientja e fut në sallën operatore, ku u hap barku dhe u konstatua hemoperitoneum, rreth 2500 ml, me koagula të shumta, kryesisht majtas, uterusi (mitra) intakt (e paprekur). U nxorr fetusi i vdekur (vdekje e freskët), likid i pastër, placentë normale.

Nisur nga reperti kirurgjikal i paraqitur në orën 5 e 45 minuta u kërkua konsultë nga kirurgu, i cili konstatoi hemorragji masive në regjionin e shpretkës dhe koagula të shumta në këtë zonë. Megjithë ndihmën mjekësore të ofruar, pacientja fatkeqësisht ndërroi jetë. Kështu, të gjitha lëvizjet e pacientes janë bërë me autoambulancë nën asistencën e personelit mjekësor dhe shoqëruar me dokumentacionin mjekësor përkatës. Autoambulanca SUGJ “Koço Gliozheni”– QSUT: TR 3516 L Autoambulanca QSUT– SU “Shefqet Ndroqi”: TR 9438 K Autoambulanca SU “Shefqet Ndroqi” – SUGJ “Koço Gliozheni”: TR 9604 K". 

Redaksia Online
l.q/Shqiptarja.com