Veliaj: Ndërtojmë 11 kënde të
reja lojërash për fëmijët e Tiranës

Vogëlushët e Tiranës do të kenë shumë shpejt në dispozicion 23 kopshte të rikonstruktura dhe 11 kënde lojërash në 11 njësi administrative të Tiranës. Pas nismës së suksesshme “Adopto një çerdhe”, Bashkia e Tiranës ka nisur sot projektin për rikonstruksionin e plotë të kopshteve të Tiranës, si dhe krijimin e 11 kënde lojërash për fëmijët në 11 zona lagje të ndryshme të kryeqytetit.
 
Puna ka nisur nga Kopshti nr. 2 te “21 Dhjetori”, ku ishte i pranishëm edhe kryetari i Bashkisë së Tiranës, Erion Veliaj, i cili pasi falenderoi kompaninë “Kontakt shpk” për punën e kryer, theksoi se pas nismës së suksesshme “Adopto një çerdhe”, bashkia ka nisur të bëjë të njëjtën gjë edhe me kopshtet e kryeqytetit. “Sot nisim një projekt shumë të rëndësishëm për familjet dhe fëmijët e Tiranës. Një projekt, i cili do të rikonstruktojë totalisht 23 kopshte të qytetit tonë. Ka kopshte që janë ndërtuar që në vitin 1916 apo edhe disa të rinj, disa kanë nevojë për rikonstruksion që ndoshta është 100 vite me vonesë, disa ndoshta 20 vite me vonesë, siç është Kopshti nr. 2, nga ku po nisim punë sot”, tha kryebashkiaku Veliaj.
 
Sipas tij, është parashikuar që puna të vijojë me ritme të larta në mënyrë që çdo javë të kemi një kopsht të rikonstruktuar, pa penguar aktivitetin e tyre ditor. “Ky është një nga projektet madhore të këtij viti për fëmijët e Tiranës. Vjet mbyllëm dhe pajisëm 31 çerdhet e qytetit, ndaj këtë vit vazhdojmë me 23 kopshtet”, tha Veliaj. Ai shtoi se kjo është një tjetër dëshmi se për Bashkinë e Tiranës, fëmijët janë të parët.
 
Një lajm tjetër i mirë për fëmijët e Tiranës është edhe nisja e punës për ndërtimin e 11 këndeve të lojërave në 11 lagje të ndryshme të qytetit. “Më vjen mirë që do të vijojmë me ndërtimin e 11 këndeve të lojërave për fëmijë në të 11 lagjet urbane të Tiranës. Kështu, jo vetëm nuk ndalemi në punën tonë, por përveçse përfundojmë 23 kopshtet e Tiranës dhe këndin e lojërave te Parku i Liqenit, por do të kemi edhe 11 kënde lojërash në 11 lagjet e Tiranës. Dua t’i ftoj të gjithë qytetarët të kuptojnë se një qytet nuk bëhet me kritika, nuk bëhet as duke dhënë mend e as opinione, por vetëm me punë”, theksoi kryebashkiaku Veliaj.
 
Kreu i Bashkisë së Tiranës falenderoi inxhinierët dhe arkitektët e rinj që i janë bashkuar kësaj nisme, duke theksuar në të njëjtën kohë, se kjo është mënyra më e mirë për këdo që kërkon të kontribuojë për qytetin dhe në mënyrë të veçantë për fëmijët. “Unë besoj se kemi nevojë që të shkruajmë historinë e qytetit dhe jo të bëjmë histeri; besoj se ata që duan të shkruajnë historinë lënë një produkt konkret si shprehje e dashurisë së tyre për qytetin. Ndaj, dua t’i falenderoj të gjithë ata që sapo janë diplomuar si inxhinierë, arkitektë, urbanistë dhe ndoshta për ta, kjo është puna e tyre e parë konkrete. Ju priftë e mbara! Besoj se edhe për shumë të rinj të tjerë, që ndoshta nuk kanë dijen tuaj, por që duan të bëjnë diçka, e vetmja mënyrë se si mund ta bëjnë atë është jo duke ulëritur dhe protestuar, por duke bërë diçka konkrete”, tha Veliaj.
 
Në Kopshtin nr. 2 po kryhen një sërë punimesh që nisin me drenazhimin dhe izolimin për eliminimin e lagështirës, zëvendësimi i parketit dhe pllakave të tualeteve etj. Gjithashtu, është parashikuar të ndërhyhet edhe në zëvendësimin e dritareve, dyerve dhe gjithë sistemit hidrosanitar.


Redaksia Online
(F.T/shqiptarja.com)