Vendimet e qeverisë/ 40 mln dollarë për bonusin e fundvitit për pensionistët, familjet në nevojë dhe personat me aftësi të kufizuara

Pensionistët, familjet me ndihmë ekonomike dhe personat me aftësi të kufizuara janë kategoritë që do të marrin bonus për festat e fundvitit. Ku vendim u mor sot nga qeveria, ku Ministrja e Ekonomisë, Delina Ibrahimaj bëri me dije se fondi total i alokuar për këto shpërblime është 40 mln dollarë.

"Janë 668 mijë pensionistë që përfitojnë nga paketa që është miratuar sot që arrin në një vlerë prej 3.5 mld lekësh sa i përket pensionistëve dhe 400 mln lekë sa i përket kategorive të tjera. Janë afërsisht 40 milion dollarë që alokohen për shpërblimet e fundvitit për pensionistët familjet me ndihmë ekonomike dhe personat me aftësi të kufizuara", tha Ibrahimaj.

Ministrja e Shëndetësisë, Ogerta Manastirliu u shpreh se janë 66 mijë familje që marrin ndihmë ekonomike që do të përfitojnë nga ky bonus i fundvitit e po ashtu edhe 72 mijë persona me aftësi të kufizuara. Fondi i vënë në dispozicion vetëm për këto dy kategori është 4 mln dollarë.

"Sot qeveria ka marrë vendim të rëndësishëm për paketën e solidaritetit të fundvitit që mbështet një sërë kategorish të veçanta. Shpërblimi i fundvitit për familjet me ndihmë ekonomike dhe të gjithë ata përfitues të skemës së pagesave të aftësisë së kufizuar, janë rreth 72 mijë individë që mbështeten nga kjo skemë, për personat që vuajnë nga sëmundje të ndryshme janë 72 mijë individë që do përfitojnë. Fondi i vënë në dispozicion është rreth 4 mln dollarë pa përfshirë pensionistët", tha ajo. 

Pensionistët do të marrin 5 mijë lekë shpërblim këtë fundvit, ndërsa familjet në nevojë dhe personat me aftësi të kufizuara do të marrin nga 3 mijë lekë.

Zv.kryeministri, Arben Ahmetaj u shpreh se janë akorduar 3.2 mld lekë për bashkinë e Tiranës dhe bashkitë e tjera për të bërë të mundur vazhdimin me shpejtësi të procesit të rindërtimit, në mënyrë që të mbyllet në vjeshtën e vitit që vjen.

"Në kuadrin e rindërtimit, rindërtimi vazhdon me shpejtësi qoftë pallatet qoftë njësitë individuale. Sot janë akorduar likuiditet qoftë bashkisë së Tiranës apo bashkive të tjera rreth 3.2 mld lekë që bën të mundur vazhdimin me shpejtësi të rindërtimit për të mbyllur të gjithë procesin në vjeshtën e vitit që vjen. Buxheti me ndryshimet ka shkuar në 35 mld lekë", tha Ahmetaj.

Përballë sportivëve që po nderojnë flamurin kuqezi në gara ndërkombëtare, Ministrja Evis Kushi prezantoi ndryshimet në trajtimin e peshëngritësve.

"Sportistët medalistë do të shpërblehen për të gjitha garat. Vakum ligjor kur u miratua ligji për sportin në 2020, kemi parashikuar në disa dispozita të fundit që edhe ata që e kanë përfituar statusin e lartë menjëherë pas hyrjes në fuqi të ligjit të trajtohen sipas këtij vendimi. Calja do të vlerësohet njëjtë si peshëngritësit europian, për herë të parë. Edhe Erkand Qerimaj që muajt e fundit na kanë nderuar", tha Kushi.

Këshilli i Ministrave vendosi të falë gjobat e vendosura dhe të shtyjë deri në prill 2022 afatin që subjektet kishin për të deklaruar pronarët përfitues. Qeveria gjithashtu kaloi projektligjin për rritjen dhe mbështetjen financiare për ndërmarrjet e vogla. 

 

 

VIDEO-Vendimet e plota

Rendit zhvillimet sipas orarit:

Të Fundit Të Parat

/r.k./Shqiptarja.com

TAG:
• ogerta manastirliu