Miratimi në Këshillin Bashkiak për shembjen e godinës së Teatrit Kombëtar, ka sjellë reagimet dhe tensionimin e situatës nga Aleanca për Mbrojtjen e Teatri që janë kundër shembjes, por edhe organizatës Europa Nostra në Twitter  e cila më 24 mars 2020 e ka shpallur Teatrin Kombëtar një nga shtatë objektet më të rrezikuara të trashëgimisë europiane, të cilin e ka marrë në mbrojtje për restaurim me mbështetje të Bankës Europiane të Investimeve!

"Ne përkrahim trashëgiminë kulturore të Europës. Prandaj kundërshtojmë propozimin e paligjshëm për shkatërrimin e Teatrit Kombëtar në Tiranë, një nga shtatë objektet e marra në mbrojtje nga Europa Nostra! Teatri është i mbrojtur nga ligji vendas, i mbrojtur fuqimisht nga shoqëria civile dhe nga ekspertët", shkruan Europa Nostra në Twitter.

Europa Nostra është një Federatë Pan-Evropiane për Trashëgimi Kulturore, që përfaqëson organizatat e qytetarëve që punojnë për mbrojtjen e trashëgimisë kulturore dhe natyrore të Evropës.

Pas saj ka reaguar edhe kreu i PD, Lulzim Basha i cili u shpreh se afera me teatrin është vjedhja më e dhunshme që i bëhet shqiptarëve.

"Afera me TK është vjedhja më e dhunshme që u bëhet shqiptarëve nga Rama. Grabitja e TK në mes të pandemisë është akt lufte ndaj shoqërisë dhe ekonomisë që po rrënohen nga RAMAVIRUSI: varfëri masive, krizë e thellë, papunësi e lartë, institucione të kapura dhe korrupsion rekord", shkruan Basha.