Vettingu/ Mbyllet rivlerësimi në KPK, në ‘filtër’ 805 magjistratët! Vetëm 373 u konfirmuan të ndershëm, qytetarët ndihmuan drejtësinë me rreth 6700 denoncime (SHIFRAT)

Në 6 vite vetting procese rivlerësimi për gjyqtarë e prokurorë, kanë ndihmuar mbi 6700 denoncime të qytetarëve. Shifra e konfirmuar për Report Tv nga Komisioni i Pavarur i Kualifikimit, ndërsa një pjesë e rëndësishme e denoncimeve kanë shërbyer si provë dhe kanë ndihmuar shumë në vendimet e trupës vlerësuese, madje në disa raste ka qenë edhe vendimtare. 

Sipas statistikave që nga 18 shkurti i vitit 2018 i e deri më sot janë futur në sitë dhe janë marrë vendime nga Komisioni i Pavarur i Kualifikimit për të 805 gjyqtarët, prokurorët dhe ndihmës ligjorë, teksa u konfirmuan si pa probleme vetëm 373, mes të cilëve 165 gjyqtarë, 167 prokurorë, 2 ish- inspektorë në KLD, 2 inspektor në KLGJ dhe 37 ndihmës/ këshilltarë ligjorë.

268 magjistratë janë konsideruar si problematikë nga KPK, në të paktën një prej shtyllave të rivlerësimit, dhe janë marrë vendime për shkarkim. Nga këta  146 gjyqtarë, 1 ish-gjyqtare në GJL; 116 prokurorë, 1 inspektor në KLGJ dhe 4 ndihmës ligjorë.

49 vendime janë për përfundimin e procesit pa një vendim përfundimtar, nga të cilët 26 ish gjyqtar, 17 prokurorë; 1 ish- kryeinspektor në KLD-së; 2 ish-inspektorë në KLD dhe 3 ndihmës ligjorë.

105 vendime për ndërprerje të procesit për shkak të dorëheqjes; 61 gjyqtarë, 27 prokurorë, 1 ish-prokuror; 1 ish gjyqtar, 1 ish- inspektor në KLD dhe 14 ndihmës ligjorë.

Sipas statistikave gjithashtu janë 8 vendime të marra për pushimin e procesit, ku përfshihen 3 gjyqtarë, 1 prokuror dhe 4 ndihmës ligjorë, ndërsa 2 vendime për pezullimin nga detyra për 2 prokurorë, të cilët rikthehen në shkollën e Magjistraturës.

Procesi i vettingut në KPK, i cili nisi rreth 6 vite më parë, u nda në tri faza ku  dhjetëra gjyqtarë dhe prokurorë, të konsideruar si elita e drejtësisë, që aspironin edhe për të qenë pjesë e drejtësisë së re, nuk e kaluan provimin e vettingut. Pasuritë e pajustifikuara dhe lidhjet me eksponentë të krimit të organizuar, ishin arsyet për shkarkimin e tyre nga detyra.

Gjatë fazës së parë të Komisionit të Pavarur të Kualifikimit, dolën në seancë dëgjimore emra të rëndësishëm të sistemit, siç ishin anëtarët e Gjykatës së Lartë dhe asaj Kushtetuese, institucione që në përfundim të procesit të rivlerësimit, dolën jashtë funksionit, për shkak të shkarkimit të anëtarëve.

Në fazën e dytë të procesit të rivlerësimit, KPK-ja vlerësoi kandidatët që synonin të ishin pjesë e SPAK-ut, Gjykatës Kushtetuese dhe Gjykatës së Lartë si edhe drejtues të gjykatave dhe prokurorive në rrethe. Ndërsa ne fazën e tretë, përpara KPK-së kaluan të gjithë prokurorët dhe gjyqtarët.

Pas përfundimit të procesit në KPK, vettingu do të vazhdojë në shkallën e dytë në  KPA, anëtarët e te cilës kanë një mandat 9 vjeçar, deri në fund të vitit 2026. Mbrojtjen e rekomandimeve të ONM nuk do ta bëjë me Komisioneri Publik që i mbaron mandati njëjtë si me KPK, por sipas Kushtetutës prokurorët e SPAK. Komisionërët publikë kanë kërkuar që t’i bashkëngjiten Prokurorisë së Posaçme, ndërsa anëtarët e Komisionit të Pavarur të Kualifikimit të marrin statusin e gjyqtarit, fate që ende nuk janë përcaktuar.

K.T./r.k./Shqiptarja.com

TAG:
• kpa
• KPK
• drejtesia
• Vetting