Ditën e Shenjtërimit të Nënë Terezës (5 shtator) spitali i ri i Laçit hapi dyert, i rindërtuar nga themelet pas dëmtimit nga tërmeti i 26 nëntorit 2019, një investim i qeverisë shqiptare.

Me anë të një videoje të publikuar në Facebook, kryeministri ka nisur ditën me pamjet e spitalit të Laçit, i cili u hap ditën djeshme.

‘MIRËMËNGJES

dhe me Spitalin e Ri të Laçit tani në shërbim të qytetarëve, ju uroj një ditë të mbarë!’- shkroi Rama.

Kryeministri Edi Rama dhe Ministrja e Shëndetësisë Ogerta Manastirliu inspektuan dje spitalin e ri, të cilin e konsideruan një model për spitalet bashkiake në vend.

Spitali i ri i Laçit i rindërtuar nga themelet, është pajisur me aparatura mjekësore të teknologjisë së avancuar. Ka një kapacitet prej 40 shtretërish dhe do të ofrojë shërbimet e urgjencës; të imazherisë; laboratorit; kirurgjisë; patologjisë; maternitetin dhe pediatrinë; fizioterapinë, etj. Bashkë me investimin e ri, në këtë spital vijnë edhe mjekët e specializuar, ku vetëm këtë vit sapo janë punësuar pesë mjekë, në specialitetet: pediatri, obsetrikë-gjinekologji, mjekësi interne, endokrinologji, okulistikë, duke plotësuar stafin e përbërë nga 60 mjekë dhe infermierë të këtij spitali.