VIDEO-FOTO/ Shkatërrime, dhunë, xhama të thyer e institucione të dhunuara nga protestuesit! Pamjet nga protesta në Tiranë, dëmtohet selia e PS, Bunk'Art 2, KQZ, Muzeu Kombëtar dhe ambasada

Edhe gjatë ditës së dytë protesta është shoqëruar me tensione, shkatërrime, hedhje gurësh e djegie të koshave nga protestuesit. Protesta e sotme ka sjellë shumë shkatërrime  në zonë të ndryshme të Tiranë, duke qenë se protestuesit kanë qenë tepër të shpërndarë dhe jo të përqendruar në një pikë. Kjo ka sjellë dëmtim të tabelave rrugore dhe rrëzim të tyre. Thyerje xhamash, kosha të djegur, institucione të dhunuara dhe objekte të shkatërruara thuajse në çdo rrugë, që nga zona e ish Bllokut, pranë Ministrisë së Brendshme, në qendër, Myslym Shyri etj.

Pjesë e shkatërrimeve kanë qenë edhe Selia e PS-së dhe Bunk'Art 2.

Protestuesit kanë thyer edhe xhamat e selisë së PS. Ata kanë marrë koshat e mbeturinave të rrugës dhe i kanë hedhur në drejtim të xhamave në hyrje të selisë rozë. Nga pamjet duket se protestuesit kanë dëmtuar hyrjen e muzeut Bunk'Art 2 pranë Ministrisë së Brendshme. Protestuesit kanë hedhur një karrige dhe sende të tjera të forta duke thyer hyrjen kryesore.

Gjithashtu protestuesit kanë thyer xhamat e Muzeut Kombëtar dhe ato të KQZ teksa këto akte kanë vijuar dhe në disa rrugë të tjera të Tiranës. Ata kanë shkulur tabela të qarkullimit rrugor, tabela të emërtimeve të rrugëve si dhe stacione të ndryshme autobusësh. Protestuesit janë futur edhe brenda disa subjekteve përgjatë Bulevardit teksa policia ka shoqëruar disa persona. Edhe ambasada ruse ka rënë pre e këtyre akteve teksa kanë thyer xhamat. Gjithashtu protestuesit kanë thyer dhe xhamat ku qëndrojnë rojet e ambasadës zviceriane.

Lajmi kryesor:

Dita e 2-të e protestës për vrasjen e Klodjan Rashës/ Dhunë e shkatërrime në disa zona të Tiranës! Thyhen xhamat e selisë së PS dhe Bunk'Art 2! 5 efektivë e 2 protestues të lënduar (VIDEO)

/xy/Shqiptarja.com

TAG:
• Protesta
• vrasja e klodjan rashes
• Klodjan Rasha