Ekipet e mjekëve të Urgjencës Kombëtare Mjekësore kryen sot vizita në qendrat e evakuuimit dhe vizita shtëpi më shtëpi në familjet e prekura nga përmbytjet masive të ditëve të fundit në Fier dhe Vlorë, për monitorimin e situatës shëndetësore të këtyre banorëve.

Në Fier, në shkollën “Rakip Kryeziu” ku ende ka disa familje të evakuuara nga Shën Pjetri, në Njësinë Administrative Topojë, mjekët e Urgjencës Kombëtare kryen vizita mjekësore të të gjithë të evakuuarve dhe dërguan në spital një prej banorëve që shfaqte probleme kardiake.

Vizitat shtëpi më shtëpi u kryen edhe në fshatin Bashkim, afër Vjosës, një zonë e prekur nga përmbytjet në Levan, ku mori trajtim shëndetësor një grua e porsaoperuar, e cila nuk kishte mundësi të aksesonte spitalin. Vizita mjekësore derë më derë edhe në Novoselë, në fshatin Fitore, më i prekuri nga përmbytjet masive të ditëve të fundit.

Ministria e Shëndetësisë dhe Mbrojtjes Sociale vijon monitorimin e situatës shëndetësore të banorëve të prekur nga përmbytjet për të evituar një rritje të mundshme të sëmundshmërisë, pas përmbytjeve massive që prekën disa zona të vendit.

shendeti
vizita mjekesore
(Ekipet mjekësore duke iu dhënë ndihmë banorëve të prekur nga përmbytjet)

d.c./shqiptarja.com