LEZHË- Bashkëshortja e Ardian Nikulajt ka folur për herë të parë pas më shumë se një viti nga vrasja e burrit të saj, Ardian Nikulaj në Shëngjin të Lezhës. Vera Nikulaj ka folur për gazetarin Tom Kelly, editor i investigimeve në Daily Mail, i cili ka udhëtuar drejt Shëngjinit.
Në shkrimin e Daily Mail, thuhet se familja e Ardianit pranoi të flasë vetëm pak ditë para vendimit të ekstradimit të autorëve te vrasjes kësaj të marte në gjykatën e Londrës.
Bashkëshortja e Ardianit, me dhimbjen e madhe dhe lot në sy, ka treguar për Daily Mail se si familja e saj mikpritën në hotelin e sapo inauguruar grupin e britanikëve, të cilët erdhën si turistë për të qëndruar në hotelin e Nikulajt, por në fakt plani ndihmuan porositësin Edmond Haxhia në ekzekutimin e tij.
![](https://shqiptarja.com/template/img/NO_ALFA_Kuadrate shqiptarja.png)
Grupi i vrasësve qëndruan në hotelin 'Coral' në pronësi të Nikulajt, morën ushqim falas nga biznesmeni, biseduan me gruan e tij dhe luajtën pishinë me djalin e tij. Gjatë gjithë kësaj kohe ata monitoruan lëvizjet e Nikulajt, derisa një prej tyre tha sinjalin për ta ekzekutuar më 19 prill 2023. Ruben Saraiva dyshohet se është ekzekutori i cili më pas u fut në restorantin e hotelit dhe qëlloi Nikulajn gjashtë herë.
Vera, e ulur pranë tavolinës tashmë të ‘rezervuar’, ku u qëllua i shoqi, me lot në sy tregoi se si për shkak të gjakmarrjes ata ishin të kujdesshëm ndaj kërcënimeve nga shqiptarët, por asnjëherë nuk dyshuan se britanikët mund të përfshiheshin në vrasjen e Nikulajt.
Vera Nikulaj ka treguar se fillimisht pa në ambientet e hotelit të saj britaniken Harriet Bridgeman, nënë e një djali të vogël. Bridgeman ishte kamufluar si turiste, por në fakt qëllimi i saj i vetëm ishte vëzhgimi i lëvizjeve të Nikulajt me qëllim vrasjen e tij.
“Ajo tentoi të komunikonte me Ardianin. I fola asaj dhe i thashë se unë flas anglisht dhe si mund ta ndihmoja. Na kërkoi t’i gjenim një makinë me qira dhe Ardiani i ndihmoi për këtë”, është shprehur Vera.
Të nesërmen familja Nikulaj darkoi në restorantin në tavolinën ngjitur me Bridgeman dhe një nga burrat britanikë.
“Ajo donte të paguante me një kartë krediti, por nuk funksionoi. Ardiani i tha kamarierit 'mos u shqetëso, do t'i paguaj unë'.
"Ata erdhën tek ne dhe falënderuan Ardianin që pagoi për drekën e tyre."
Për Daily Mail, ka folur edhe djali Ardianit, Luisi, tani 14 vjeç, duke treguar se si ai pa Harry Simpson, në tavolinën e pishinës që ishte përballë restorantit ku babai i tij u vra. Djali tregon edhe një moment kur ka biseduar me britanikun Simpson.
'Të nesërmen po haja me të në të njëjtën tryezë. Unë isha duke ngrënë fasule dhe Simpson tha: 'më lejo ta provoj këtë ushqim tradicional shqiptar'.
Ai mori lugën e tij dhe filloi të hante fasulet nga pjata ime.
“I thashë nënës sime se burri duket pak i çuditshëm.”
14-vjeçari tregon edhe çfarë i ka thënë babai: “Mos u shqetëso bir, ai është vetëm një turist, nuk duhet të shqetësohesh për të”.
“Në ditën e tretë, pasi mbaroi picën dhe birrën e tij në restorant, Simpson mori tabakanë e tij dhe u përpoq ta dërgonte pas një perde në restorantin e hotelit ku punonin stafi dhe familja”, tha Vera Nikulaj.
Vera tregon se bashkëshorti i saj i tha Simpson-it “Mos u shqetëso, lëre tabakanë në tavolinë, je me pushime.”
"Por Simpson ishte shumë kurioz të dinte se çfarë kishte pas perdes.", vijon Vera Nikulaj.
Sulmuesi i dyshuar Ruben Saraiva, një banor britanik i lindur në Portugali, u pa gjithashtu duke u vëzhguar hotelin, pranë një shkallë afër skenës së të shtënave në ditët para saj. Fëmijët e zonës raportuan se kishin parë një 'burrë të çuditshëm gjatë gjithë kohës' dhe njëri ishte në gjendje të jepte një përshkrim të detajuar të tij pas vrasjes, thanë të afërmit për Daily Mail.
Gjykata britanike vendosi sot që të ekstradojë drejt Shqipërisë 4 nga 5 të arrestuarit për vrasjen e biznesmenit Ardian Nikulaj në Shëngjin. Pritet ekstradimi i porositësit Edmond Haxhia, si dhe britanikëve Thomas Mithan, Harry Simpson dhe Harriet Bridgeman.
Për Steven Hant për momentin nuk është marrë një vendim, pasi është diagnostikuar me kancer. Ndërkohë, portugezi Ruben Saraiva që dyshohet si ekzekutori i Nikulajat u ekstradua në Shqipëri me 31 dhjetor të vitit 2023.
Nikulaj u ekzekutua më 19 prill 2023 në Shëngjin në hotelin e tij. Vrasja e biznesmenit Ardian Nikulaj ishte në vazhdën e zinxhirit të hakmarrjes që familja e viktimës kanë me fisin Lekstakaj, konflikt ky që ndër vite ka prodhuar shumë viktima.
Komente
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)
cila grua se ka pas dy ne shpi
PërgjigjuE ke pyet ndonjehere sa ka vrare jet shoq ??
PërgjigjuThone se disa i ka vra vete, me doren e tij. prandaj ca ti besh tjereve, do te behet.