Vrasja e Devi Kasmit/ Report Tv siguron videon, killeri grek largohet në këmbë pas krimit dhe hipën në furgonin e bardhë

TIRANË - Një vit pas vrasjes së 41-vjeçarit Devi Kasmi, në një atentat në Tiranë, është publikuar një video e kamerave të sigurisë që tregon skenën e largimit të autorit nga vendi i ngjarjes. Personi që shfaqet në pamje dyshohet të jetë ish-oficeri i Focave Speciale greke, Efthymiou Efthymious pak minuta pas vrasjes, i cili aktualisht ndodhet në burg si autori kryesor, i dyshuar se ekzekutimin e kreu me pagesë.

Kamerat e sigurisë e kanë fiksuar këtë moment në orën 19:26 minuta, natën kur ndodhi krimi pranë banesës së Kasmit, në zonën e Spitalit Pediatrik. Një furgon i bardhë dhe i mbyllur nga pjesa mbrapa, i cili qëndron në pritje për disa sekonda, dhe më pas merr personin që dyshohet të jetë Efthymious, por duke qenë i maskuar, është i pamunudr identifikimi i tij.

Mirëpo avokati i Efthymious, Saimir Vishaj, pretendon se personi që duket në pamjet filmike nuk është klienti i tij. "Ai në pamje nuk është shtetasi grek. Nuk është klienti im. Pamjet filmike janë dorëzuar si pjesë e dosjes hetimore nga Prokuroria në Gjykatë", tha Vishaj për Report Tv. 

Nga dosja hetimore që gjendet në prokurori, rezulton se autori e ka pritur për disa orë viktimën Devi Kasmi, dhe sapo ky i fundit ka mbërritur poshtë banesës, e ka lënë të vdekur në vend pasi e ka qëlluar me katër plumba. Dosja gjithashtu posedon informacionin se furgoni ishte blerë 12 ditë para ngjarjes dhe drejtohej nga Malvin Dinellari.

Prokuroria ka mbyllur hetimet dhe dosjen e ka dërguar në gjykatë (Lexo këtu). I dyshuari kryesor si autor ekzekutues është Efthymiou Efthymious, ndërsa si porositës grupin kriminal të drejtuar nga Aurel Hoxhallari. Krimi i rëndë tronditi kryeqytetin në atë kohë, pasi ndodhi në një zonë të populluar dhe në një orar ku kishte shumë lëvizje.

TAG:
• Efthymiou Efthymious
• vrasja e devi kasmit
• aurel hoxhallari