Shefi i policisë japoneze, Itaru Nakamura, njoftoi se ka kërkuar dorëheqjen nga posti, duke marrë përsipër përgjegjësitë rreth nivelit të sigurisë në lidhje me vrasjen e ish-kryeministrit Shinzo Abe në fillim të korrikut.
Këtë e bëri të ditur vetë Nakamura, shef i Agjencisë Kombëtare të Policisë, në konferencën për shtyp të mbajtur mëngjesin e 25 gushtit, mbi rezultatet e hetimit për mangësitë e sigurisë gjatë tubimit elektoral të mbajtur nga ish-kryeministri Abe në Nara.
"Kishte mangësi në planet e sigurisë dhe vlerësimet e rrezikut mbi të cilat ato bazoheshin, dhe direktivat nga komandanti në terren ishin të pamjaftueshme. Rrënja e këtij problemi qëndron në kufizimet e sistemit aktual, i cili ka vite që ekziston, dhe ku policia lokale mban përgjegjësinë e vetme për ofrimin e sigurisë," shtoi ai.
Nakamura tha se do të merrte përgjegjësinë për dështimet dhe do të largohej nga posti i tij si shef policie.
"Ne kemi vendosur të shkundim personelin tonë dhe të fillojmë nga e para me detyrat tona të sigurisë, dhe kjo është arsyeja pse unë i paraqita dorëheqjen time Komisionit Kombëtar të Sigurisë Publike sot," tha ai.
Një automjet që bartë trupin e ish-kryeministrit të ndjerë japonez Shinzo Abe, i cili u qëllua gjatë fushatës për zgjedhjet parlamentare, niset pas funeralit të tij në Tempullin Zojoji në Tokio, Japoni, 12 korrik 2022.
Abe u qëllua dhe u vra gjatë një takimi elektoral më 8 korrik në rajonin Nara. Vrasësi i tij u ndalua në vendngjarje dhe besohet se kishte shënjestruar Aben, sepse mendonte se ishte i lidhur me Kishën e Unifikimit. Ai ishte politikani më i njohur i Japonisë dhe kryeministri më jetëgjatë, por siguria ishte relativisht e ulët derisa ai mbajti një fjalim në një rrugë në rajonin perëndimor. Policia lokale në zonë ka pranuar tashmë të metat "e pamohueshme" lidhur me sigurinë e ish-udhëheqësit.
Burri i dyshuar për vrasjen e Abes, Tetsuya Yamagami, po i nënshtrohet një vlerësimi psikiatrik për të përcaktuar gjendjen e tij në kohën e atentatit. Prokurorët pritet të përcaktojnë nëse Yamagami mund të mbajë përgjegjësi penale në bazë të ekzaminimit, përpara se të marrin një vendim nëse do ta inkriminojnë atë.
Nëna e Yamagamit raportohet të ketë bërë donacione të mëdha për kishën, të cilën djali i saj e fajësoi për vështirësitë financiare të familjes. Familja e ish-kryeministrit Abe mbajti një funeral privat për të menjëherë pas vdekjes së tij, por po organizohet edhe një funeral shtetëror, me liderë nga e gjithë bota që pritet të marrin pjesë në ngjarjen e 27 shtatorit./REL
Lajme të tjera
-
Koreja e Veriut kryen një provë me raketa balistike me rreze të shkurtër veprimi
5 Nëntor, 15:16 -
Aeroporti 20 miliardë dollarësh i ndërtuar në oqean, tashmë ‘po fundoset’ në ujë
13 Tetor, 12:20 -
Fituesit e Nobelit për Paqe paralajmërojnë për rrezik të luftës bërthamore
12 Tetor, 15:32 -
Grupi japonez kundër armëve bërthamore nderohet me Nobelin për Paqe
11 Tetor, 11:54 -
Nga teknikat e origamit tek workshop-et mbi kulinarinë dhe përpunimin e çajit, ja aktivitetet që do të sjellë Java Kulturore Japoneze në Shqipëri
8 Tetor, 15:24 -
VIDEO/ Prag Liga e Kombeve, Jasir Asani shënon golin e gjashtë në Azi
1 Tetor, 12:48 -
Shigeru Ishiba pritet të emërohet kryeministër i ri i Japonisë
27 Shtator, 10:15 -
Moti i keq godet Japoninë/ Stuhi dhe përmbytje katastrofike 1 i vdekur, 7 të zhdukur (VIDEO)
21 Shtator, 21:35 -
Koreja e Veriut teston raketa balistike
12 Shtator, 08:26 -
VIDEO/ Shikoni se si tajfuni ‘Shanshan’ e lëkund avionin me pasagjerë në Japoni dhe e detyron që të mos ulet në pistë
30 Gusht, 11:32 -
VIDEO/ Tajfuni 'Shanshan' godet Japoninë, evakuohen 800 mijë njerëz! Disa viktima dhe të zhdukur
29 Gusht, 07:35 -
Tokio: Një avion luftarak kinez shkel hapësirën ajrore të Japonisë
26 Gusht, 22:54
