/ATSH/.- Po vazhdojnë reagimet ndërkombëtare kundër vendimit të Beogradit për moslejimin e vizitës së Zëvendëskryeministrit të Kosovës, Hashim Thaçit, në Serbi.
Ambasadori Frank Wisner, i cili ka qenë edhe kryenegociatori i Departamentit të Shtetit në negociatat e Vjenës, në një deklaratë të zgjeruar për KosovaPress, dënoi sjelljet e Beogradit si një "shembull fatkeq i një mundësie të humbur në avancimin e marrëdhënieve mes Kosovës dhe Serbisë".
Ambasadori Frank Wisner tha se qeveria serbe ka cituar një vendim të vitit 1997 nga regjimi i Millosheviçit, duke e kërcënuar Thaçin me arrest. "Kjo lloj politike është për keqardhje. Këso lloj deklarata serbe vetëm sa do ta ndezin opinionin publik në Kosovë. Ky refuzim serb është në kundërshti të qartë me mënyrën se si Kosova ka organizuar mirëseardhje në vizitat e presidentit, kyeministrit dhe ministrit të Jashtëm të Serbisë",  deklaroi Wisner.
Për personat si unë që kanë punuar për pajtim në rajon, shtoi Wisner, vendimi i Serbisë është shumë fatkeq. "Nëse dy popujt dëshirojnë të arrijnë normalizim të marrëdhënieve të parashikuar me Marrëveshjen e Brukselit, çdo mundësi duhet të përdoret që të përmirësohet komunikimi dhe të adresohen çështjet e dekadave të dhimbshme të së kaluarës. Kërcënimet me arrestime për njerëzit e paqes janë të gabueshme dhe kundërproduktive", përfundon ambasadori Wisner./k.s/