TIRANE - Shtetet e Bashkuara të Amerikës lëshojnë një deklaratë të fortë për zgjedhjet lokale duke nënvizuar se kanë identifikuar disa kandidatë me histori të mundshme kriminale të cilët janë zgjedhur nga forcat politike për garën e 21 Qershorit.
 
Ishte ambasadori i ri amerikan në Tiranë Donald Lu, që duke folur shqip dhe qartë tha se disa kandidatë kanë rekorde kriminale të regjistruara brenda dhe jashtë vendit. 
 
Ambasadori Lu nënvizoi se pas verifikimeve këto shqetësime u janë përcjellë edhe udhëheqësve politik, ndërsa lëshoi edhe një apel ndaj medias dhe shoqërisë që të kërkojë respektimin e standardeve ndaj politikës.