POP 5

Lajmet më të lexuara të 5 minutave të fundit

Politikë

Zgjedhjet 2025/ Tiranës i shtohet një mandat, bëhet me 37, një i hiqet Korçës, do të ketë 10! Shqiptarja.com siguron relacion e KQZ-së

Në zgjedhjet e ardhshme, Tirana do të prodhojë 37 deputetë. Lëvizja e popullsisë drejt kryeqytetit, i ka shtuar qarkut një ligjvënës më shumë, duke ja hequr Korçës. Ndërkohë 11 maji imponon disa afate të tjera, duke detyruar qeverinë që prej 11 janarit, të mos kryejë aktivitete që mund të quheshin joshëse ndaj votuesve.

Tirane-  Sapo Presidenti i Republikës dekretoi datën e zgjedhjeve,në KQZ ka nisur menjëherë puna për përgatitjet për 11 majin. Së pari janë bërë llogaritë për mandatet, duke u bazuar në numrin e popullsisë.

Tirana do të përfaqësohet në Kuvendin e ri me 37 deputetë, ndërsa Korça do ta humbasë një, duke ngelur me 10 ligjvënës. Ky relacion, një kopje e të cilit siguroi dhe shqiptarja.com pasqyron lëvizjet demografike në vend, do të miratohet të shtunën, (7 dhjetor) nga Komisioni Rregullator.

Numri total i shtetasve 4627824 është pjesëtuar me numrin 140 të mandateve të Kuvendit, ku është përcaktuar numri 33056 si numri mesatar i shtetasve që i takojnë çdo mandati.

Ndërkohë firmosja e 11 majit nga Presidenti Begaj, vë në lëvizje institucionet për disa afate.

Menjëherë do të nisë puna për hartimin e listës së zgjedhësve, e cila kësaj radhe, do të jetë e ndarë për herë të parë në dy pjesë: listë e votuesve brenda vendit, dhe lista e votuesve, jashtë vendit.

Ata që do të regjistrohen për votim në diasporë, do të hiqen nga lista këtu në Shqipëri.

Duke filluar nga 11 janari, pra 4 muaj përpara datës së zgjedhjeve, institucionet, nga ministritë e deri tek bashkitë, nuk lejohen të bëjnë aktivitete që mund të joshin votuesit në favor të partisë në pushtet.  Ndalohen inaugurimet, lejet e legalizimeve, shpërblimet, bonuset, apo amnistitë.

Kandidatët për deputetë duhet të dorëzohen në fillim të marsit, por këtë vit, me kërkesë të KQZ-së, publikimi i listave mund të bëhet më herët, në mënyrë që të mjaftojë koha për dërgimin e fletës së votimit me postë tek emigrantët.  

Mandatet për zgjedhjet 2025
Berat 7 mandate
Dibra 5 mandate
Durrës 14 mandate
Elbasani 14 mandate
Fieri 16 mandate
Gjirokastra  4 mandate
Korça 10 mandate
Kukës  3 mandate
Lezhë 7 mandate
Shkodër 11 mandate
Tirana 37 mandate
Vlora 12 mandate
Totali 140 mandate – 4627824 shtetas në 2024

Si përcaktohen mandatet?

Në nenin 75 të Kodit Zgjedhor parashikohen kriteret dhe procedura për caktimin e numrit të mandateve. Çdo mandat përfaqëson një numër afërsisht të njëjtë shtetasish. Numri total i shtetasve, sipas Regjistrit Kombëtar të Gjendjes Civile, pjesëtohet me numrin 140 të mandateve të Kuvendit, duke përcaktuar numrin mesatar të shtetasve që i takojnë çdo mandati të Kuvendit. Numri i mandateve për çdo zonë zgjedhore përcaktohet duke pjesëtuar numrin e shtetasve me vendbanim në zonën zgjedhore, me numrin mesatar, të përftuar sipas pikës 2 të këtij neni.

Çdo zone zgjedhore i caktohet fillimisht një numër mandatesh i barabartë me numrin e plotë të përftuar nga pjesëtimi, sipas pikës 3 të këtij neni. Në rast se në përfundim të veprimit të kryer, sipas pikës 4 të këtij neni, një apo më shumë mandate mbeten pa u shpërndarë, ato u shpërndahen zonave mbi bazën e presjes dhjetore më të madhe të përftuar nga pjesëtimi, sipas pikës 3 të këtij neni. Shpërndarja e mandateve të mbetura kryhet në rend zbritës, duke filluar nga zona me presjen dhjetore më të madhe. Në rast se edhe pas zbatimit të pikës 5 të këtij neni presja dhjetore e dy apo më shumë zonave është e njëjtë, mandati i fundit i caktohet asaj zone që, pas përllogaritjes sipas pikës 3 të këtij neni, ka numrin më të madh të mbetur të shtetasve që nuk kanë prodhuar mandat të plotë.

(Kliko këtu për të lexuar dokumentin e plotë)

S.G/I.M/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 13 Janar, 10:25

    Nisi regjistrimi, a do të marrë pjesë masivisht në zgjedhje diaspora?

Lajme të tjera



×

Lajmi i fundit

Kate Middelton: Sëmundja e kancerit po ma ‘fal’ jetën

Kate Middelton: Sëmundja e kancerit po ma ‘fal’ jetën

15 Janar, 11:23