Zhvillimi urban e strehimi,Gjermeni
në konferencën 'Habitat 3' në Ekuado

Në kryeqytetin e Ekuadorit, Quito, po mbahet “Habitat 3”, Konferenca Botërore e organizuar nga Kombet e Bashkuara, me temë zhvillimin e qëndrueshëm urban dhe strehimin.

Shqipëria, një ndër 193 vendet anëtare të OKB-së, përfaqësohet në Habitat 3 nga Ministrja e Zhvillimit Urban, Eglantina Gjermeni.

Në fjalën e saj, në hapje të sesionit plenar, Ministrja Gjermeni e cilësoi Agjendën e Re Urbane, e cila do të miratohet nga pjesëmarrësit në përfundim të Habitat 3, si vizionin e përbashkët dhe platformën udhërrëfyese përzhvillimin e vendeve në 20 vitet e ardhshme.

“Ky angazhim universal që përcakton prioritetet tona afatmesme dhe afatgjata, kërkon vendimmarrje politike, si dhe një platformë efektive që adreson nevojat dhe interesat e njerëzve. Agjenda është një udhëzim i plotë për të gjitha vendet tona, për të reduktuar varfërinë, për të siguruar barazinë gjinore dhe fuqizimin e të gjitha grave dhe vajzave, për të nxitur gjithëpërfshirjen apo për të nxitur rritjen ekonomike dhe për të mbrojtur mjedisin”, tha ajo në fjalën adresuar Habitat 3.

Në emër të Qeverisë Shqiptare, Ministrja Gjermeni i njohu drejtuesit e shteteve anëtare të Kombeve të Bashkuara, me reformat e ndërmarra në këto tre vite si: reforma territoriale, hartimi dhe miratimi i Planit të Përgjithshëm Kombëtar, puna e nisur për hartimin e planeve vendore të bashkive të reja, strategjia 10 vjeçare e strehimit apo ligji i ri që pritet të përfundojë së shpejti, për strehimin social.

Habitatet organizohen çdo 20 vjet nga Kombet e Bashkuara. I pari është mbajtur në vitin 1976 në Vankuver (Kanada) dhe në të ka mbajtur fjalën e saj me theks varfërinë shenjtorja shqiptare Nënë Tereza. Duke cituar një pjesë të mesazhit të Nënë Terezës, 40 vjet më parë, Ministrja Gjermeni e mbylli deklaratën e saj përpara vendeve anëtare të Kombeve të Bashkuara,me apelin se, lufta ndaj varfërisë është një sfidë aktuale dhe Agjenda e Re Urbane ështëe domosdoshme për t’u zbatuar nga të gjitha vendet.

Redaksia Online
(F.T/shqiptarja.com)