Historia e një të riu nga Vlora që në vitin 1948 vendosi të arratisej drejt Kosovës, i shtyrë nga idealet dhe bindjet e tij për Shqipërinë etnike. Por rruga e tij nuk ishte ajo që kishte imagjinuar. Autoritetet serbe e arrestuan dhe ai përfundoi në burgun famëkeq të Nishit, ku përjetoi vite të vështira, rebelime dhe vuajtje të mëdha në qelitë e regjimit jugosllav.

Pas lirimit dhe kthimit në Shqipëri, ai nuk gjeti qetësinë që priste. Përkundrazi, u përball me një tjetër përndjekje, këtë herë nga regjimi komunist shqiptar, që e trajtoi si armik për shkak të së kaluarës dhe bindjeve të tij. Kështu nisi një kalvar i gjatë vuajtjesh jo vetëm për të, por edhe për familjen Skënderaj, e cila mbajti mbi supe pasojat e përndjekjes për vite me radhë.

Në këtë histori ndërthuret edhe lidhja me vajzën e patriotit të njohur Ago Agaj, një tjetër figurë që u detyrua të largohej nga Shqipëria për shkak të regjimit komunist dhe që ia kushtoi jetën çështjes kombëtare dhe Kosovës.