21 maj 1973. Ora 23 e 30 minuta. Radio Vatikani do të transmetonte një lajm të bujshëm për Shqipërinë nën komunizëm."NË BORËN 29-VJEÇARE NË SHQIPËRI ÇELEN LULET E PARA." Bëhej fjalë për të parën revoltë antikomunsite në burgjet e regjimit, e cila do të zgjaste 3 ditë rradhazi dhe do të shkaktonte një tërmet të vërtetë për regjimin komunist. Burgu i Spaçit në Mirditë i kishte dhënë një grusht të fortë regjimit të Enver Hoxhës. Revolta e Spaçit përbën një pikë kulmore në historinë e qëndresës antikomuniste, por edhe të lëvizjes për liri e demokraci. Shkaqet e kësaj revolte ishin kushtet çnjerëzore në të cilat vuanin të burgosurit e burgut, puna e tyre skllavëruese, përdorimi i torturave psikologjike dhe fizike, si edhe gjendja e mjeruar e popullit nën diktaturën komuniste, kundër së cilës ata u ngritën dhe qëndruan heroikisht. Kjo ngjarj e rrallë e qëndresës antikomuniste, jo vetëm për Shqipëri por edhe për gjithë Evropën Lindore, do të tregohet sot, me rastin 50 vjetorit të kësaj revolte, nga nji prej protagonistëve të kësaj ngjarjeje, Gjet Kadeli. Ai ishte edhe ideatori për ngritjen e flamurit pa yll në mes të kampit të Spaçit, ç’ka i dha revoltës një karakter të qartë politik.