Kaos dhe dhunë për dy orë me radhë në Kuvendin e Shqipërisë, ku nga deputetët e opozitës u hodhën qese me miell, vezë e sende të forta drejt kryeministrit Edi Rama, kryeparlamentarit Gramoz Ruçit dhe ministrave të kabinetit. Deputetët e PD dhe LSI bllokuan për rreth dy orë foltoren e Kuvendit pas fjalimit të Lulzim Bashës, për të pezulluar punimet e seancës, deri në përjashtimin e kryeministrit Edi Rama për fyerje ndaj shqiptarëve gjatë seancës së para dy jave.

Basha foli për protestën në Kukës, arrestimin e 11 kuksianëve për aktet në "Rrugën e Kombit" si dhe për fyerjet e Ramës. 

"Ky parlament nuk do të vazhdojë asnjë sekond pa e nxjerrë nga salla kryeministrin Rama. Ndale seancën menjëherë. Përjashtoje! Nuk ka për të pasur procedim normal pa larguar njeriun që ka ofenduar të gjithë shqiptarët.  Arrestimi i 11 kuksianëve është turp, mos i harroni ata. Indiferenca, heshtja, frika hezitimi ynë janë fuqia e plaçkitësve si Edi Rama.

Lulzim Basha, kryetar i PD


Pas fjalimit të Bashës, deputetët e opozitës rrethuan foltoren. Por situata degjeneroi më tej me hedhjen e qeseve me miell, shisheve me ujë, stilolapsa dhe topa letre në drejtim të kryeministrit Rama, kryeparlamentarit Ruçi dhe ministrave të kabinetit. Pas disa ndërprerjeve, Ruçi hodhi në votim pr/ligjet e rendit të ditës të cilat u votuan me 74 vota të maxhorancës së PS, ndërsa ligjvënësit e opozitës mbanin të bllokuar foltoren dhe u binin tavolinave.


Ora 11:30 Kuvendi votohen pr/ligjet mes kaosit
Edhe pse opozita bllokoi për rreth një orë e 30 minuta foltoren e Kuvendit, seanca vijoi pavarësisht tensioneve. Deputetët e PD dhe LSI refuzuan të marrin fjalën për rendin e ditës, çka bëri që Ruçi t’u japë fjalën vetëm deputetëve të maxhorancës. Shumica votoi vetëm me votat e saj projektligjet e parashikuara në rendin e ditës. Kuvendi votoi pr/rezolutën për KQZ, marrëveshjen me Kosovën për pensionet, të cilat u miratuan me 74 vota pro.   

Ora 11:20 Deputetët e opozitës hedhin sende të forta në drejtim të Ramës
Pas qeseve me miell, deputetët e PD dhe LSI kanë hedhur sende të forta në drejtim të kryeministrit Edi Rama dhe ministrave të qeverisë. Ata hodhën shishe me ujë, stiolapsa dhe topa letre. Ruçi ndërpret sërish seancën.

“Ervin Salianji për përdorimin e mjeteve të palejueshme ndaj drejtuesit të seancës përjashtohet nga seanca Parlamentare. Ervin Salianji dhe Flamur Noka lironi sallën. Shërbimet e Kuvendit t’u komunikojnë deputetëve daljen e tyre nga salla. Ndërpritet seanca”, tha Ruçi. 

Ora 11:10 Ruçi përjashton Flamur Nokën
Flamur Noka përjashtohet nga seanca me vendim të kryeparlamentarit Gramoz Ruçi, pasi hodhi miell në drejtim të kryeministrit Edi Rama. "Liro Sallën, shërbimet e kuvendit ta nxjerrin jashtë z.Noka", u shpreh Ruçi i cili ndërpreu për të tretën herë seancë derisa Flamur Noka të linte ulëset nga punonjësit e Gardës. 

Ora 11:05 Noka dhe Balliu i hedhin miell Ramës
Vijonë tensionet në Kuvend. Teksa mbanin të rrethuar foltoren e Kuvendit, deputetët e PD, Flamur Noka dhe Klevis Balliu i hedhin qese me miell Edi Ramës. Pas këtij momenti, kryeparlamentari Gramoz Ruçi ndërpret seancën për herë të dytë.

Opozita me pankarta në duar
Pas një mbledhjeje të shkurtër të Bashës me grupin parlamentar të PD, opozita ka shkuar në Parlament me pankarta në duar, ku shkruhet: 'Liro kuksianët', 'Arresto kriminelët'.


(Deputetët me pankarta në Kuvend)

Një ditë më parë, Lulzim Basha mblodhi grupi parlamentar të PD, ku njoftoi se demokratët do të jenë në Kuvend, por seanca nuk do të jetë normale, duke nënkuptuar me këtë një seancë të trazuar dhe me përplasje.

Kohët e fundit, politika është përfshirë në debate të ashpra, shoqëruar dhe me protesta nga opozita, për shkak të taksës në Rrugën e Kombit dhe vendosjen e TVSH te biznesi i vogël. Këto dy tema të nxehta pritet të bëhen dhe sot temë debatesh në sallën e Kuvendit, ku demokratët kanë paralajmëruar se nuk do ta lënë kryeministrin Rama të flasë, duke kërkuar largimin e tij.

Ora 10:00 Seanca ka nisur me raportin vjetor të KQZ, që po prezantohet nga kreu i KQZ, Klement Zguri. Zguri i ka bërë thirrje Parlamentit të themelojë epokën e administrimit të zgjedhjeve. Nga foltorja e Kuvendit, Zguri deklaroi se ka ardhur koha për një reformë themelore në procesin e zgjedhjeve.

“Ekzistenca e zgjedhëse të dyshuar si të dubluar. Ekzistenca e zgjedhësve pa kontest banimi, që kanë emigruar, mospërfshirja në votim e të dënuarve. Shqetësimet që vijnë nga eksperienca e 2017 të na ndihmojnë për në vazhdim. Kuvendi të na ndriçojë rrugën me rezolutën që do të miratojë. Jemi të gatshëm të ofrojmë ekspertizë teknike. Propozimi i komisionerëve nga partitë politike, ndërrimi i tyre para apo gjatë procesit të numërimit ka ndikuar direkt në procesin e administrimit. Askush nuk duhet të nda pengojë të bëjmë një administratë të aftë. Administrimit i zgjedhjeve kërkon një reformë të tërë, i takon këtij Parlamenti të themelojë epokën e administrimit”

Klement Zguri, kryetar i KQZ


Rendit zhvillimet sipas orarit:
Ora 13:30
Video e re nga Kuvendi, Mehmetaj si Kryemadhi, në vend të çizmes godet Ramën me ...

Një seancë e tensionuar dhe kaotike është zhvilluar sot për dy orë në Kuvend, ku deputetët e opozitës bllokuan foltoren, duke kërkuar përjashtimin e kryeministrit Edi Rama.

Deputetët gjuajtën me miell e shishe uji ndaj Ramës, ndërsa një tjetër video e re është publikuar nga seanca e tensionuar. Në video duket deputetja e LSI, Kejdi Mehmetaj, e cila niset që nga salla e Kuvendit dhe i afrohet Ramës, duke e gjuajtur me shishen e ujit që mbante në dorë.

Kujtojmë se në seancën e fundit të vitit 2017, kur do të zgjidhej kryeprokurorja Arta Marku, u zhvillua një seancë e tillë e tensionuar, ku ajo që bëri më shumë bujë ishte gjesti i kryetares së LSI, Monika Kryemadhi, e cila hoqi çizmen në Kuvend dhe tentoi të godasë Ramën.

Një gjest i tillë sot është ndjekur nga deputetja Mehmetaj, e cila ka përdorur shishen e ujit, duke i hedhur kryeministrit ujë.

Ora 12:07
VIDEO/Bushati hedh ujë dhe provokon opozitën, Rama e kritikon

Ministri për Europën dhe Punët e Jashtme Ditmir Bushati nuk është sjellë aspak në mënyrë diplomatike dhe qytetare, kur ka reaguar ndaj goditjeve me sende të opozitës në Kuvend.

Ndryshe nga ministrat e tjerë dhe kryeministri Rama, Bushati ka qenë i vetmi ministër që ka marrë shishen e ujit duke ua hedhur në fytyrë deputetëve të opozitës.

I menjëhershëm ka qenë reagimi i kryeministrit Rama, i cili duket qartë që e ka penguar atë dhe i ka tërhequr vëmendjen për reagimin aspak etik dhe jo në unison me qëndrimin e kabinetit ndaj provokimeve, edhe me sende të forta, të opozitës gjatë ditës së sotme të seancës plenare.

Ora 12:07
Spiropali: Turp dhe neveri! Balla: Sali Berisha, koordinatori i dhunës

Situata e tensionuar e krijuar sot në Kuvend nga opozita është komentuar nga deputetët socialistë jashtë dyerve të Kuvendit.

Kreu i grupit parlamentar të PS, Taulant Balla, deklaroi se pavarësisht rrëmujës, Kuvendi miratoi sot disa marrëveshje shumë të rëndësishme, siç ishte ajo me Kosovën për pensionet, apo marrëveshja me Italinë dhe BE.

Sipas tij, më 17 maj shqiptarët do të marrin lajmin e mirë për rekomandimin e KE për hapjen e negociatave, edhe pse sipas tij, opozita tenton të bllokojë një proces të tillë, pasi ka frikë nga Reforma në Drejtësi.

"Sot është seanca e fundit para se më 17 Shqipëria të marrë rekomandimin e KE për hapjen e negociatave. Ky do jetë një lajm shumë i mirë për të gjithë shqiptarët. Procesi i Vettingut dhe Reforma në Drejtësi po ecin përpara. Dhuna sot në Parlament është shprehja e solidaritetit e politikanëve të korruptuar me gjyqtarët të korruptuar. Sot miratuam marrëveshje shumë të rëndësishme me Kosovën për pensionet. Është e turpshme që PD e LSI nuk votuan një marrëveshje kaq të rëndësishme. Kishim dhe marrëveshje shumë të rëndësishme me Italinë dhe BE. Kuvendi sot me gjithë pamjet e turpshme të servirura me buton nga koordinatori i dhunës, Berisha, që urdhëroi Monikën e Lulin të bënin dhunën e radhës, dhe sigurisht Monika vajzat e veta dhe Luli djemtë e tij, bënë punën e tyre. Ne jemi shumë të vendosur të vijojmë përpara. Jemi të bindur që të martën edhe pas pamjeve të sotme, ne do kemi lajm të mirë. Vajza dhe gra në Kuvend bënë akte të turpshme"

Taulant Balla

 

"Një grusht deputetësh, gra e burra, të frikësuar, të mbledhur rreth foltores së Kuvendit si në një mejhane për t’i ngulur thikën pas shpine Shqipërisë në moment vendimtar. Dua të theksoj turpin dhe neverinë që kemi ndjerë si gra të ulura aty për gjuhën jashtëzakonisht të turpshme dhe aktet edhe më të rënda të kryera nga disa vajza e gra të keqpërdorura nga PD e LSI. Vajzat  e gratë janë si ligjvënëse dhe jo për t’u keqpërdorur nga dy kryetar partisë që kanë probleme me drejtësinë. Qytetarët ta peshojnë situatën"

Elisa Spiropali, deputete e PS

Ora 12:00
Opozita rrëmujë në foltore, Kuvendi miraton me votat e PS pr/ligjet e rendit të ditës

Pas dy ore tensioni dhe kaosi nga opozita, Kuvendi ka mbyllur punimet me votimin e projektligjeve vetëm me votat e PS.

PD dhe LSI mbajtën të bllokuar gjatë gjithë kohës foltoren, por kjo nuk e pengoi Kuvendin të votonte projektligjet e parashikuara në rendin e ditës. 

Deputetët e PD dhe LSI refuzuan të marrin fjalën për rendin e ditës, çka bëri që Ruçi t’u japë fjalën vetëm deputetëve të maxhorancës. Kuvendi votoi pr/rezolutën për KQZ, marrëveshjen me Kosovën për pensionet si dhe raportin e veprimtarisë së ERRU, të cilat u miratuan me 74 vota pro.

Ora 11:53
Kryemadhi: Do i nxijmë jetën Ramës! Berisha: E Nxorëm nga dera e pasme e nevojtores

Deklarata të forta kanë ardhur edhe jashtë dyerve të Kuvendit nga deputetët e djathtë. Sali Berisha dhe Monika Kryemadhi kanë bërë thirrje për largimin e kryeministrit Edi Rama nga Kuvendi, pas gjuhës fyese të përdorur ndaj qytetarëve.

Berisha deklaroi se sot opozita e nxori Ramën nga dera e pasme e Kuvendit, duke i dhënë sipas tij, atë që meritonte.

"Kam një përshëndetje të përzemërt për të gjithë ata që bëjnë revoltë. Në emër të tyre, deputetë të opozitës sot nxorën Ramën nga Parlamenti nga dera e pasme, kuksianë, dibranë dhe të gjithë veriorët e dinë ç’do të thotë të largohesh nga dera e pasme apo nga dera e nevojtores. Pra, shkoi aty ku e meriton"

Sali Berisha

 

" Të largohet ai njeri që nuk do t’ia dijë për fëmijën e vet. Fusin në burg shqiptarët për një çati që ju shembet dhe nuk fusin kriminelët. Ka futur në burg kuksianet, për atë që ai kërkoi falje. Kjo është teatri i radhës, shëmtira e Ruçit dhe Ramës. Njeri që ka probleme mendore"

Monika Kryemadhi

Ora 11:31
Të qeshura në Kuvend, Noka-Braçes: Çohu në këmbë, s’e nuk të shoh

Përtej tensioneve, nuk kanë munguar dhe batutat në seancën e sotme plenare, e cila ka nisur me përplasje, pasi opozita ka bllokuar foltoren, duke kërkuar përjashtimin e kryeministrit Edi Rama.

Gramoz Ruçi i ka dhënë fjalën deputetit socialist, Erjon Braçe, nga vendi, ndërsa ky i fundit ka filluar të akuzojë kryedemokratin Lulzim Basha. Deputeti demokrat, Flamur Noka, ka ndërhyrë, duke i kërkuar Braçes të ngrihet në këmbë, pasi nuk e sheh. Kjo ka shkaktuar të qeshura mes deputetëve në sallë.

Noka-Braçes: Çohu në këmbë, s’e nuk të shohë

Ora 10:54
"Liro Kuksianet!", "Arresto kriminelët!", deputetët e opozitës me pankarta në Kuvend

"Liro Kuksianët!", "Arresto kriminelet!". Këto janë pankartat që mbajnë në duar deputetët e opozitës në seancën e Kuvendit. Kryetari i PD-se Lulzim Basha i bëri thirrje qytetarëve të mos i harrojnë kuksianët e arrestuar.

"Sot është dita e 13-të ku 11 kuksianët mbahen në burg. Ky kryeministër i cili vrasësit dhe përdhunuesit i bëri deputetë, kryebashkiakë dhe politikanë të lartë i do në pranga kusianët e varfër", tha Basha, i cili kërkoi lirimin e 11 protestuesve ndaj të cilëve është dhënë nga Gjykata e Tiranës masa e arrestit me burg.