Politikë

Kryeministri Edi Rama u ka prezantuar ditën e sotme pikat e Paketës së Rezistencës Sociale përfaqësuesve të biznesit të vogël, se si  qeveria do t'i mbrojë ata përballë pasojave që po sjell lufta. Ai tha se biznesi i vogël është aleati më i madh i qeverisë, prandaj kanë zero taksa, si asnjë biznes tjetër në rajon apo Europë.

Kryeministri Edi Rama i ka cilësuar deklaratat e Rusisë se mercenarë shqiptarë po luftojnë në Ukrainë të pavërteta shqetësuese që vendi ynë po i ndjek me vëmendje. Ndërsa Borrell tha se BE është e shqetësuar nga ndikimet pro ruse në Ballkanin Perëndimor.

Deputetja e PD, Jorida Tabaku e ka konsideruar qesharake paketën e rezistencës sociale që qeveria ndërmori për rritjen e çmimeve.

Ministri gjerman, njëherazi kryetar i Komitetit të Punëve të Jashtme, Michael Roth është shprehur se Shqipëria është gati për të nisur negociatat me Bashkimin Europian. Luftën në Ukrainë, ai e ka konsideruar si një mesazh të drejtpërdrejt për Bashkimin Europian, që sipas tij duhet të marrë më shumë përgjegjësi për të krijuar më shumë paqe dhe stabilitet në Europë.

Të përlotur, me tufa lulesh në duar familjarët e 26 viktimave të tragjedisë së Gërdecit janë mbledhur në qendër të fshatit te memoriali, ku janë skalituar emrat e atyre që humbën jetën në fabrikën e vdekjes. Një ritual që përsëritet për të 14-in vit radhazi, por dhimbja u shtohet edhe më shumë pasi përpara drejtësisë nuk është askush. As këtë vit, atje nuk ndodhej asnjë përfaqësues politik.

Kryeministri Edi Rama ka kërkuar nga BE që të ndihmojë ekonomikisht vendet e Ballkanit për pasojat e luftës në Ukrainë, ndërsa shtoi se Shqipëria është në pritje të integrimit kur Europa të jetë gati. Ndërsa Borrell vlerësoi Shqipërinë për rolin e saj në luftën në Ukrainë, ndërsa theksoi se kjo situatë e bën edhe më emergjente integrimin e Ballkanit në BE.

Ndonëse protestuesit kanë deklaruar për 6 ditë radhazi se nuk kamë asnjë lidhje me politikën per protestën që po organizojnë për rritjen e çmimeve, Sali Berisha ka filluar zyrtarisht sponsorizimin e protestës. 

Kaluan 4-muaj hetime në Kuvend dhe raporti i Partisë Demokratike për tre kontratat koncesionare të inceneratorëve, që u shndërruan në kalin e betejës opozitare kundër qeveris, u braktis në momentin e votimit nga një pjesë e konsiderueshme e deputetëve të opozitës. Raporti përfundimtar i pakicës mori 84 vota kundër dhe 27 vota pro, kundrejt raportit të mazhorancës që mori 76 vota pro dhe 34 vota kundër.

Pas humbjes së gjashtë radhazi Lulzim Basha duhet të hapë garën për kryetarin e ri të Partisë Demokratike. Kështu ka deklaruar deputeti demokrat Tomorr Alizoti në emisionin ‘5 pyetjet nga Babaramo’ në Report TV.