Politikë

Drejtuesit e institucioneve të burgjeve duhet që të bindit të burgosurit që të vaksinohen kundër COVID. Kështu u ka kërkuar ministri i Drejtësisë, Ulsi Manja gjatë një takimi me Drejtorin e Përgjithshëm të Burgjeve, drejtuesit e IEVP (Institucionet e Egzekutimit të Vendimeve Penale) dhe drejtuesit e policisë së burgjeve

Opozita për të tretën herë  ka bojkotuar mbledhjen Këshillit të Legjislacionit që po diskuton propozimin e Partisë Socialiste për ndryshime kushtetuese zgjatjen e afateve të vettingut. Pavarësisht mungesës së opozitës, maxhoranca ka vijuar me mbledhjen duke dëgjuar ekspertët. 

Naftëtarët e Ballshit do të marrin sërish pagë nga shteti edhe për 2 vitet në vijim, 2022 dhe 2023. Këtë bëri me dije Ministrja e Infrastrukturës dhe Energjisë, Belinda Balluku në Komisionin e Veprimtarisë Prodhuese.

Debatet nuk munguan as dje në mbledhjen e Grupit Parlamentar të Partisë Demokratike pavarësisht përpjekjes së kreut të PD-së për të diskutuar vetëm për veprimtarinë parlamentare.

Ministri i Drejtësisë, Ulsi Manja denoncoi një rast të inspektorëve të AKU në Fier, të cilët i kishin vunë gjobë pa të drejtë një subjekti, pronari i të cilit i denoncoi në njësinë AntiKorrupsion. Report TV mësoi se qytetari në Fier që kishte në pronësi një biznes fruta-perime, është gjobitur me 4 mln lekë pa dijeninë e tij. Ministri i Drejtësisë tha se ky rast duhet të shërbeje si shembull për të gjithë shushunjat që i pinë gjakun qytetarët me vulën e shteti pa të drejtë dhe se kushdo që abuzon do të çohet për hetim në SPAK dhe se përbaltjen me drejtësinë nuk do e kenë të lehtë.

'Po poshtëron Policin e Shtetit', kështu e ka konsideruar deputeti i PD-së, Ervin Salinaji faktin që kryeministri Edi Rama ishte sot i pranishëm në prezantimin e buxhetit për Policinë e Shtetit, ku në fjalën e tij nuk i kurseu kritikat. Po ashtu ka reaguar edhe Sekretari i Përgjithshëm i LSI-së, Endrit Braimllari, i cili tha se Policia e Shtetit duhet të shkëputet nga ndikimi politik dhe personal i Edi Ramës.

Ministri i Mbrojtjes vuri në dukje vlerësimet që Forcat e Armatosura shqiptare kanë marrë nga vendet partnere të NATO-s, ndaj edhe Shqipëria mund të bëhet sërish vendi mikpritës i stërvitjes më të madhe "Defender" në vitin 2023.

Ministrja e Shëndetësisë bëri me dije se buxheti i vitit 2022, për të cilin janë mbledhur, do të rrisë ndihmën ekonomike ku tregoi dhe kategoritë e caktuara se si do përfitojnë. Manastirliu theksoi se financimi publik për shëndetësinë është rritur dhe 450 mijë qytetarë do të përfitojnë nga rimbursimi i barnave, skemë e parashikuar te buxheti 2022.