5% e të prekurve në COVID-19 në Shqipëri kanë humbur jetën, 56% janë shëruar! 22 raste të reja sot (VIDEO)

TIRANË- 5% e të prekurve në COVID-19 në Shqipëri kanë humbur jetën, shifër kjo e bërë e ditur nga ministria e Shëndetësisë në buletinin ditor. Në 24 orët e fundit, nga 233 testime të bëra janë konfirmuar pozitiv 22 qytetarë, duke çuar në total numrin e të prekurve në 584, ndërkohë që i janë shtuar listës së të shëruarve edhe 13 të tjerë.

Përkthyer në shifra bilanci i koronavirusit në Shqipëri, 56% janë të shëruar, 7 të hospitalizuar, pra të shtruar në 2 spitalet COVID-19, 32% të vetëizoluar në shtëpi, 5% vdekje, të dhëna këto të cilat sipas Përfaqësueses së Institutit të Shëndetit Publik, (ISHP), Eugena Tomini janë tregues i një epidemie të butë në vendin tonë.

Nga rastet e reja 3 janë në Shkodër, 2 raste në Tiranë. Ndërkohë vijon hetimi epidemiologjik dhe gjurmimi i kontakteve në vatrën e Krujës ku kanë rezultuar pozitivë 5 persona dhe në Kurbin ku kemi 12 raste të reja. Report Tv mëson se të prekurit nga Kruja dhe Kurbini janë punonjës të biznesit fason, fabrikë këpucësh që ka shpërthyer si vatër me dhjetra të prekur.  Edhe në 24 orët e fundit, përqindja e të shëruarve është më e lartë krahasuar me të infektuarit aktivë dhe kjo tendencë tashmë vazhdon pa luhatje prej më shumë se një jave.

Me një kapacitet prej 310 shtretësh në 2 spitalet COVID-19 në Shqipëri, përkatësisht në Urgjencën e QSUT-së dhe "Shefqet Ndroqi", janë të shtruar po marrin shërbim 44 pacientë, teksa deri më sot kanë humbur këtë betejë 26 qytetarë. "Në shërbimin infektiv aktualisht janë 35 të shtruar. 5 pacientë janë në terapi intensive. Në spitalin COVID 2 “Shefqet Ndroqi”, janë 9 pacientë të shtruar, prej të cilëve 5 pacientë janë në terapi intensive në gjendje të rënduar", njofton Ministria e Shëndetësisë.

Harta e qyteteve të prekura me koronavirus, përgatitur nga Report Tv

Shpërndarja gjeografike e rasteve pozitive:

- Tiranë            253 raste
- Durrës            42 raste
- Lushnje          6 raste
- Elbasan          16 raste
- Fier                 36 raste
- Kavajë            9 raste
- Rrogozhinë     4 raste
- Korçë             19 raste
- Vlorë              5 raste
- Shkodër          99 raste
- Lezhë             14 raste
- Berat              2 raste
- Has                13 raste
- Krujë              23 raste
-Tropojë           4 raste
- Pukë               5 raste
- Mirditë           3 raste 
- Kukës           11 rast
-Mallakastër     1 raste
- Kurbin           19 raste

"Pavarësisht luhatjesve në numrat ditorë të zbulimit të bartësve të virusit apo të sëmurëve prej tij, situata është njëlloj e kontrolluar.  Treguesi i vërtetë është numri i të shtruarve në spitale, që vazhdon të mbetet në shifra të qëndrueshme.  Në mënyrë që situata të vazhdojë të jetë e kontrolluar, është e rëndësishme që qytetarët të respektojnë masat e distancimit fizik, si e vetmja mënyrë e kufizimit të përhapjes së infeksionit. Këto masa duhet të respektohen makimalisht edhe brenda rretheve familjare, duke shmangur vizitat tek të afërmit për çdo lloj arsye. Nëse keni shenja të sëmundjes COVID19 telefononi numrin e urgjencës 127. Për çdo pyetje apo informacion rreth COVID19 telefononi në linjën e gjelbër 0800 40 40", tha Eugena Tomini nga ISHP.

Rendit zhvillimet sipas orarit:

Të Fundit Të Parat

B.K./b.ha./Shqiptarja.com

TAG:
• Koronavirus
• koronavirusi ne shqiperi
• bilanci i koronavirusit