​Peleshi ia del, mbledh në takim
edhe kryebashkiakët demokratë

Pavarësisht hezitimit për tu takuar me kryeministrin, disa kryebashkiakë të djathtë nuk kanë hezituar aspak të ulën në një tryezë me zëvendëskryeministrin Niko Peleshi dhe ministrin e Pushtetit Lokal Bledi Çuçi. Arsyen e takimit dhe fotot e pjesëmarrësve mes të cilëve edhe disa të zgjedhur demokratë i publikoi në Facebook vetë zv.kryeministri Peleshi. 

“Një diskutim e debat serioz me kryetarët e bashkive të reja, të majtë e të djathtë, për të gjetur rrugën më të mirë për të përballuar së bashku sfidat e reformës territoriale-administrative. Jemi të vendosur t'u ofrojmë bashkive të reja të gjithë ndihmën dhe ekspertizën e nevojshme për t'u krijuar atyre kushtet optimale për të realizuar misionin e tyre”, shprehet Peleshi.
 
“Së shpejti, me ndihmën dhe financimin e qeverisë këto bashki do të kenë Planet e Përgjithshme Vendore për të gjithë territorin e bashkive të reja për t'i hapur rrugë kështu një zhvillimi të qëndrueshëm, pa plagët e anarkisë, informalitetit dhe kaosit nga i cili ka vuajtur aq shumë zhvillimi i territorit në këto 25 vjet”, shkruan në faqen e tij në Facebook,zv.kryeministri ndërsa bie në sy fotoja ku krah përkrah socialistit Erjon Veliaj qëndron demokratja Voltana Ademi dhe pak më tej kryetari i bashkisë së Vorës, i shumë debatuari Fiqiri Ismaili.

Redaksia Online
(f.s/shqiptarja.com)

TAG:
• voltana ademi