TIRANË- Në GJKKO po mbahet seanca për dosjen e privatizimit të ish-kompleksit Partizani, me të pandehur ish-kryeministrin Sali Berisha, dhëndrin Jamarbër Malltezi dhe 3 të tjerë. 

Në seancën e 30 prillit, dëshmoi për herë të parë në cilësinë e kallëzuesit deputeti socialist Taulant Balla, ndërsa sot seanca do të vijojë me thirrjen e 7 dëshmitarëve të tjerë, ish-drejtues të kompleksit Partizani

Ish presidentët e Partizanit Albert Xhani dhe Paro Laçi dhe ish drejtorët Bujar Labinoti, Afrim Tole, Isa Tare pritet të dëshmojnë mbi procedurat që u ndoqën për t’i marrë atyre pronën ku vazhdonin aktivitetin sportiv.

Në dosje e SPAK thuhet se ish-drejtorit të viteve 1995-2005, Isa Tare ka dëshmuar se atij iu premtua një apartament që të mos kundërshtonte privatizimin. Po në SPAK edhe ish Presidenti Paro Laçi ka thënë se i është ofruar një pazar nga njerëzit e Berishës për të liruar ambientet e klubit. Ndërsa Afrim Tole, drejtor i Klubit Shumësportesh Partizani, në vitet 2006-2008 ka bërë para hetuesve të SPAK një pasqyrë të të gjitha pronave që “de facto” dhe “de jure” posedonte klubi.

Dy dëshmitarët e tjerë që ka thirrur SPAK janë edhe Dhurata Çela dhe Petrit Kullolli. E para ish drejtoreshë e Agjencisë së Pronave për Tiranën dhe i dyti topograf, në grupin e atyre që shqyrtuan dosjen e “Partizanit”. Sipas SPAK, dosja e ish-kompleksit Partizani, ishte nga të parat që u shqyrtua nga agjencia e Pronave, ndërsa një dëshmi në prokurori e ish drejtorësh se përgjithshme të Pronave Justina Boriçi konfirmon se Dhurata Çelën e kishte emëruar me rekomandim nga lart.

Ndërkohë GJKKO ka pranuar edhe kërkesën e mbrojtjes së Berishës dhe Malltezit për të thërritur si dëshmitar dhe kryeministrin Edi Rama. Ky i fundit pritet të dëshmojë në cilësinë e kryebashkiakut të Tiranës, i cili sipas tyre ka firmosur ndryshimin e destinacionit të truallit të ish kompleksit Partizani, nga terren sportiv për ndërtim, në kohën kur ka qenë kryetar.

Dëshmitarët e thirrur nga SPAK
Afrim Tole                    Ish-shefi i Klubit Partizani
Isa Tare                        Ish drejtori i kompleksit
Bujar Labinoti              Ish drejtori i kompleksit
Albert Xhani                Ish presidenti i Partizanit
Paro Laçi                      Ish presidenti i Partizanit
Dhurata Çela                Ish drejtoreshë e AKKP Tiranë         
Petrit Kullolli                Topograf në AKKP Tiranë

Lexo këtu investigimet e plota të Report Tv dhe Shqiptarja.com për privatizimin e 'Kompleksit Partizani' nga 'klani Berisha'
INVESTIGIMI I
INVESTIGIMI II
INVESTIGIMI III

Lajmi në përditësim....

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë

Rendit zhvillimet sipas orarit:
Ora 14:08
Afera Partizani/ Dëshmia e ish-drejtorit të Klubit: Godinat ishin të amortizuara, nuk mbaj mend me çfarë vlere u vlerësuan

Ish-drejtori i Klubit Sportiv “Partizani”, Afrim Tola, dëshmoi në gjykatë lidhur me gjendjen e ish-kompleksit sportiv dhe procedurat e inventarizimit gjatë kohës që drejtonte klubin në vitet 2006-2008.

Në dëshminë e tij, Tola deklaroi se godinat kanë qenë të amortizuara. Ai pranoi se kishte qenë pjesë e grupit të ngritur për inventarizimin dhe evidentimin e aseteve të klubit, por tha disa herë se nuk i kujtoheshin detaje konkrete mbi vlerësimin e godinave apo aseteve të klubit. 

Avokati i Malltezit, tha se vlerësimi sipas formularit është 20 milionë lekë, por Tola këmbënguli se këto janë akte të financës dhe se nuk i kujtohej vlera. 

Sipas tij, klubi funksiononte me staf të reduktuar dhe me fonde minimale, ndërsa vetëm sportistët elitarë përfitonin pagesa. Tola pretendoi gjithashtu se në ambientet e klubit kishte pasur familje informale që kishin zënë godinat.

Pjesë nga dëshmia në GJKKO

Prokurorja Millonai: Çfarë detyre keni pasur në vitet 2006-2008?

Afrim Tola: Kam qenë drejtor i klubit shumësportësh “Partizani”, më pas në Tatime.

Prokurorja Millonai: Si ka funksionuar ky klub dhe a ka pasur objekte e staf administrativ?

Afrim Tola: anë qenë rreth 6-7 punonjës staf. Sportistët s’kanë pasur status. Objekte ka pasur, është bërë inventar dhe unë kam qenë në komision, por s’e mbaj mend.

Prokurorja Millonai: Vjollca Shirja, e njihni? Kur jeni larguar në 2008?

Afrim Tola: S’më kujtohet mirë. Në 2005 kanë qenë 25 punonjës. Në kohën time staf i reduktuar. Sportistë shumë, për pagesën ka qenë një fond shumë i vogël, ku vetëm sportistët elitarë merrnin diçka. Atë vit u rregullua palestra e volejbollit dhe ajo e mundjes. Me urdhër të vitit 2003 rezulton se është miratuar Sportklubi në varësi të Ministrisë së Kulturës.

Prokurorja Millonai: Për procedurat e privatizimit çfarë roli keni pasur dhe çfarë veprimesh keni bërë?

Afrim Tola: Kam qenë pjesë e një grupi të ngritur nga ministri për të treguar asetet e klubit.

Millonai: Ke qenë pjesë e grupit të vlerësimit. Çfarë keni bërë?

Afrim Tola: Vetëm kemi treguar objektet.

Millonai: Keni pasur investime?

Afrim Tola: Kemi pasur një fond të vogël, që mezi mbanim frymën gjallë.

Millonai: Në kërkesën për shkurtim fondesh keni pasur rol?

Afrim Tola: Jo.

***

Klodian Skënderaj: Si ishte gjendja e godinave?

Afrim Tola: Të amortizuara.

Klodian Skënderaj: Thatë se keni bërë inventarizim. Konkretisht, çfarë përmbante?

Afrim Tola: S’e mbaj mend fare.

Klodian Skënderaj: Në dijeninë tuaj, mbani mend nëse ka pasur familje informale që kishin zënë ambientet?

Afrim Tola: Ka pasur.

Klodian Skënderaj: Mbani mend të keni vendosur shifër konkrete për vlerësimin?

Afrim Tola: S’e mbaj mend. Këto kanë qenë akte të Financës.

Klodian Skënderaj: Çfarë përmbajtje ka ky inventarizim?

Afrim Tola: Janë të gjitha godinat.

Klodian Skënderaj: Vlerësimi sipas formularit është 20 milionë lekë.

Gjyzari: Duke qenë se në formular ka disa objekte të zëna forcërisht, kur është bërë inventari?

Afrim Tola: Më vonë.

Jamarbër Malltezi: A jeni në dijeni se ka një shkresë të vitit 2003 ku thuhet se godinat kanë qenë të zëna forcërisht?

Afrim Tola: S’më kujtohet.

Jamarbër Malltezi: Jeni në dijeni se Edi Rama i ka firmosur të gjitha shkresat që objektet janë të zëna?

Afrim Tola: S’e di.

Jamarbër Malltezi: Kanë qenë të zëna edhe godinat e Sport Klub “Partizani”?

Afrim Tola: Shumica të zëna.

SI.E./Shqiptarja.com