Ahmetaj në Lushnje: Kanë përfituar 500 mijë familje nga ulja e taksave

Ministri i Financave, Arben Ahmetaj ka diskutuar sot në Lushnje për taksën e vendosur ndaj biznesit të vogël. Ahmetaj theksoi se nuk po flitet për një taksë të re, sepse historiku i kësaj takse, sipas tij, daton që nga viti 1996. Ajo që është e re, sipas ministrit të Financave, është se nuk do ketë më fokusim te ambienti i biznesit të vogël, por do të ketë fokusim tek biznesi i madh.

Gjithashtu Ahmetaj  theksoi se filozofia e qeverisë në të dyja mandatet e fituara ka qenë dhe ngelet përpjekja e vazhdueshme për të lehtësuar biznesin, si dhe solli si shembull uljen e taksës së biznesit të vogël nga 10% i dikurshëm bashkë me 1.5% e qarkullimit, në 5%.

Unë do të filloj të bëj një prezantim të plotë për çështjen e biznesit të vogël dhe sigurisht edhe në referencë të pyetjeve që erdhën, qoftë nga biznesi i vogël këtu, qoftë nga biznesi i vogël në të gjithë Shqipërinë, po edhe nga biznesi i madh. Para së gjithash, dua që të theksoj që filozofia e kësaj qeverie në mandatin e parë dhe në mandatin e dytë dhe në vazhdim, është dhe ngelet përpjekje e vazhdueshme për të lehtësuar biznesin. Është e rëndësishme të kujtojmë që kjo qeveri uli taksën e biznesit të vogël nga 10% e dikurshme bashkë me 1.5% e qarkullimit, në 5%, dhe bëri zero taksën e biznesit të vogël 2 deri në 5 milionë lekë xhiro.Vetëm nga këto dy lëvizje, të cilat janë në zemër të përpjekjes, e theksoj të kësaj qeverie për të mbështetur biznesin e vogël, shkuan në xhepat e qytetarëve që janë të vetëpunësuar dhe bëjnë biznes të vogël 20 milionë dollarë në vit. Pra, ato para ishin në buxhetin e shtetit, nuk janë në buxhetin e shtetit, janë fatmirësisht në xhepat e qytetarëve që punojnë, apo janë të vetëpunësuar. Ka një diskutim shumë të gjerë në të gjithë Shqipërinë dhe unë jam munduar të vizitoj një pjesë të mirë, deri në ditën që do të filloje zbatimi, do ta vizitoj gjithë Shqipërinë.

LEXO EDHE:
Moti i keq në Lushnjë/ Rrugët kryesore në pushtetin e ujit! Ndërprerje e energjisë elektrike në qytet dhe zona rurale (VIDEO)

Është taksë e re? Nuk është taksë e re. Një historik të kësaj takse, është vendosur në vitin 1996. Në vitin 1997 është 20%, që atë ditë nuk ka ndryshuar më, është 20%. Në momentin e vështirë të 2013-ës, kur Fondi Monetar Ndërkombëtar ngulte këmbë që Qeveria Rama ta rriste TVSH-në nga 20% në 23% për shkak të asaj gremine që ne gjetëm, Kryeministri nguli këmbë që nuk do të lëvizte dhe nuk lëvizi. Në çdo mall, apo dhe çdo shërbim që marrim, pavarësisht se e marrim në dyqanin e lagjes, apo e marrim në një supermarket, secili prej konsumatorëve sot e paguan 20%, diku vetëfaturohet, diku faturohet, flas për ato që janë formale. Që do të thotë për konsumatorin, për biznesin e vogël, nuk ka asnjë kosto të re. Pra, në një shishe ujë 20% ka qenë dhe është, nuk është asgjë e re. Ajo që është e re, është filozofia që ne nuk do merremi me ato 20m2 që ka biznesi i vogël, e gjithë logjika është të fokusohemi tek biznesi i madh. Për të ndarë me ju një statistikë domethënëse, çka vjen nga biznesi i vogël është 0,8% e të ardhurave nga TVSH-ja. Tani secili mund ta kuptoj qartë se si mundet që një administratë të fokusohet tek 0,8% dhe jo tek 99%? Pra fokusi jonë është zinxhiri i transaksionit tek biznesi i madh për ta detyruar biznesin e madh dhe për ta skanuar transaksionin e tij nga A tek ZH, pra deri tek konsumatori. Biznesi i vogël do të ketë një deklarim shumë të thjeshtëzuar, nuk do të bëjë atë deklarimin që bën biznesi i madh. Do të jenë 4 deri në 6 kuti në deklarimin e tij dhe do të bëhet një herë në 3 muaj. Ashtu siç bëni deklarimin për sigurimet shoqërore dhe shëndetësore të thjeshtëzuar njëherë në 3 muaj, ashtu do të bëjë biznesi i vogël dhe deklarimin e thjeshtësuar në atë deklaratë të TVSH-së, dhe ajo që dua të them është që tashmë biznesit të vogël do t’i jepet mundësia të kreditojë. Pra ajo kosto që mund t’i ngelej nga TVSH-ja dhe për shkak të vetë-faturimit në zinxhir që rakordonin me biznesin e madh, sot energjinë, qeranë, ujin mund ta kreditoni dhe ne finale, kur të filloje deklarimi si procedurë do të keni mundësi që të përfitoni kreditim dhe në një moment edhe rimbursim.

A ka ndonjë biznes të vogël që nuk e di se sa mall ka në dyqan? Asnjëri të çfarë do lloj malli, shishe ujë, miell, sheqer, pra e dinë mirë që kanë 10 apo 30 pako, 10 apo 30 shishe dhe kjo i lejohet që të grumbulloj gjithë atë TVSH të blerë, të marrë në furnizim për 1 vit që është një lehtësi shumë e madhe. Pra është para në xhep në mundësi për biznesin e vogël. Përtej kësaj, administrata tatimore do preke çdo sipërmarrje të vogël. Janë 9975 biznese të vogla që preken. Këtu do ndaloj me lejen tuaj që t’ju bëj një krahasim. Ulja e taksave që ka bërë qeveria “Rama 1” ka prekur 80% të sipërmarrjes, 80% të sipërmarrjes që janë mbi 500 mijë familje. Vetëm 19% e sipërmarrjes, ashtu siç ne erdhëm në detyrë, me atë flamur “Kush fiton më shumë, do të paguaj më shumë”, vetëm 19% e sipërmarrjes iu rrit taksa nga 10% në 15% të tatim-fitimit, por kjo ishte dhe logjika që ne kishim ama shërbimet, në qoftë se merrnin një njësi shërbimesh dhe pikë pyetje të madhe do t’i vija, sot shërbimet që merr biznesi i madh, nuk rri në rradhë mbi të gjitha, por i merr online. Unë do kthehem sërish tek biznesi i vogël për të thënë që sot administrata tatimore ka prekur nga 9975 sipërmarrje të vogla, ka prekur 6000. Vetëm në Fier janë prekur 883 sipërmarrje të vogla, në Kukës nga 64 janë prekur 64. Këtu 550 janë, 550 do të preken. Në Shkodër nga 464 do preken 464. Në Tiranë 4000 janë 4000 do preken. Pra do preket çdo sipërmarrje dhe kur them do preket pra do takohet me sipërmarrjen, do të informohet, do ndihmohet, do t’i tregohet se si mbushet deklarata dhe është dhënë një urdhër që nuk do të ketë asnjë gjobë për deklarim të gabuar deri në 31 dhjetor të 2018.

Nuk është fokus biznesi i vogël, është fokusi te biznesi i madh. Edhe një sqarim të vogël se shpesh opozita përpiqet të krijojë konfuzion. Nuk ka pasur, nuk ka dhe nuk do të ketë asnjë iniciativë për koncension të TVSH-së, zero! Janë të gjitha gënjeshtra, dhe përsa i përket vetëdeklarimit, siç iu referua dhe përfaqësuesi i biznesit të madh, vetë deklarimi është shumë i thjeshtë, nuk ka kosto, ashtu siç e bën për sigurimet shoqërore, këto 4-6 kuti që kemi thjeshtuar deklaratën, ashtu do ta bëjë edhe për TVSH-në. Përsa i përket pyetjes, përse e mori iniciativën qeveria për TVSH-në tani? Fokusi është biznesi i madh. Tani jemi në situatë që antinformaliteti ka kaluar në një fazë shumë të rëndësishme, inteligjente, dhe intensive dhe sigurisht që fokusimi tek transaksionet e biznesit të madh na kërkon që ta ulim pragun e deklarimit për ta pasur pamjen të plotë, madje për informacionin tuaj, po në funksion të këtyre transaksioneve, ne do të kalojmë në një sistem të ri fiskalizimi, të kontrollit të biznesit të madh ne funksion të antiinformalitetit. Më tej për kreditimin për biznesin e vogël, unë e theksova të gjitha në momentin e parë kanë për të kaluar në kreditim. Pra, për të gjithë ato që nuk kuptojnë çfarë është kreditimi, në llogarinë e biznesit të vogël do të ketë shuma plus rezervë për të trajtuar si zbritje në muajt dhe në vitet që do të vijnë për shkak të sistemit të TVSH-së që e afron këtë mundësi që nxit tashmë për biznesin e vogël. Përsa i përket imputeve bujqësore, unë e kam theksuar dhe do ta theksoj sërish që këmbëngulja që Kryeministri pati për ndryshimin nga 6% në20% në rimbursimin e bujqësisë kaloi në xhepat e fermerëve nga 2 milionë që ishte deri në vitin 2014 deri në 20 milionë që marrin sot, Pra, është automatikisht në xhepat e tyre. Këto ishin pak a shumë ato informacione që unë doja të ndaja me ju. Do ta mbyll duke thënë që ne do të vijmë t’ju takojmë në çdo biznes të vogël për t’ju sqaruar dhe nuk do të ketë asnjë gjobë gjatë gjithë periudhës.

Ministri i Financave,  Arben Ahmetaj

TAG:
• arben ahmetaj
• biznesi i vogel
• lushnje
• ulja e taksave