Një ditë pasi Voltana Ademi kërkoi komision ndërkombëtar si në vitin 1913 për të liruar Shkodrën, refuzimi i parë ka ardhur nga Austria. Ambasadorit austriak Johann Sattler e ka cilësuar si një kërkesë aspak normale për vitin në të cilin jetojmë, sipas së cilit ky problem është i brendshëm dhe duhet të gjendet një zgjidhje sa më shpejt. 

“Do isha i lumtur të diskutoja. Por 2019 nuk është 1913. Shqipëria aspiron të hapë negociatat me BE. Kjo kërkon aftësinë për të zgjidhur problemet politike. Dhe për këtë nevojiten dy gjëra: Sezoni i konfliktit duhet të ndiqet nga sezoni i zgjidhjes së konflikteve. Shqiptarët duan të shkojnë me pushime me mendje të qetë”-shkruan Sattler.

Opozita bojkotoi zgjedhjet e 30 qershorit me argumentin se kjo datë është zhdekretuar nga presidenti Meta. Nisur nga ky akt, ndonëse Kolegji Zgjedhor e cilësoi si antikushtetues, kryebashkiakët e djathtë dolën njëzëri duke thënë se nuk do të lirojnë zyrat. Teksa të tjerët u mjaftuan me këtë deklaratë, Ademi bëri një hap përpara, duke u dërguar një letër të gjithë ambasadorëve të huaj në Shqipëri.

Çfarë ndodhi në 1914 në Shqipëri?
Që nga momenti i shpalljes së pavarësisë dhe deri në miratimin e reformës në drejtësi  faktori ndërkombëtar ka luajtur një rol të rëndësishëm në ecurinë e zhvillimeve politike shqiptare.  Por cfarë ndodhi në 1914, që kërkon Voltana Ademi? Më 22 janar 1914, si rezultat i grindjeve, përçarjeve dhe komploteve, pushteti i kaloi KNK-së (Komisioni Ndërkombëtar i Kontrollit) që kishte marrë tashmë funksione qeverisëse, duke mënjanuar qeverinë e Vlorës. Komisioni Ndërkombëtar i Kontrollit ishte Pushtet Ekzekutiv i dërguar nga Gjashtë Fuqitë e Mëdha dhe kishte një mandat 10-vjeçar i zgjatshëm në rast nevoje. KNK e qeverisi Shqipërinë në periudhën 22 Janar 1914-7 mars 1914.

Postimi i ambasadorit austriak, Sattler në Twitter