Humbi babanë pak ditë më parë, Basha: Sot i dhamë lamtumirën! U largua në paqe dhe i rrethuar nga dashuria

TIRANË- Kryetari i PD-së,  Lulzim Basha ka falënderuar të gjithë miqtë që iu gjendën pranë familjes së tij, në një nga momentet më të vështira, atë të ndarjes nga jeta të babait të tij, Xhelal Basha , pas një sëmundjeje të rëndë. Xhelal Basha u përcoll sot në banesën e fundit, teksa Lulzim Basha ka pasur një falenderim për mjekët që i qëndruan pranë në ditët kur ai luftonte me sëmundjen e rëndë.

"Sot i dhamë lamtumirën babait tim Xhelalit i cili u nda nga kjo jetë pas një beteje të gjatë, duke na hidhëruar dhe ligështuar mamanë time Remzijen, mua dhe vëllain tim Erlindin, Aurelën, vajzat, familjarët dhe miqtë e shumtë të tij dhe familjes. Ai u largua në paqe i rrethuar nga dashuria dhe përkujdesi i njerëzve të tij të dashur.

Në këto momente dhimbje të rëndë për familjen tonë, falenderojmë me mirënjohjen më të thellë të gjithë miqtë dhe dashamirët që na u gjendën dhe na lehtësuan, me praninë, mendimet, mesazhet, lutjet dhe mbështetjen e tyre.

LEXO EDHE:
Duka kundër Berishës e Metës për sulmet ndaj drejtësisë: I thonë SPAK-ut, ‘skap’, koha e  pandëshkueshmërisë ka ikur! Mbështes propozimet e Bashës për zgjedhoren

Falenderojmë mjekët, infermierët dhe të gjithë personelin shëndetësor për përkujdesjen e tyre të dhembshur për babain gjatë gjithë kësaj periudhe.

Për familjen tonë kjo është një humbje e madhe. Por po kaq i madh është ngushëllimi që Zoti e mori me qetësinë dhe dinjitetin që i fali në çdo çast të jetës së tij, si dhe lutjet tona që shpirti ti prehet në paqe", shkruan Basha.

Babai i kryedemokratit Xhelal Basha u nda nga jeta pas një beteje me një sëmundje të rëndë. Prej muajsh ai ishte i shtruar në spital, ndërkohë që sot ka mbyllur sytë në moshën 85-vjeçare. Për herë të fundit, babai i kryetarit të PD-së, është shfaqur në publik kur e ëma e Bashës kishte ditëlindjen, në qershor të vitit 2020. Bashkë me të vëllanë, kreu i PD-së, Lulzim Basha u “zhvesh” nga roli i politikanit, dhe bëri një urim publik nga shtëpia e tyre, që e ndau dhe me ndjekësit e tij në rrjetet social. 

B.K./Shqiptarja.com

TAG:
• lulzim basha
• xhelal basha