PD-ja i vendos zjarrin me molotov KZAZ-së në Bushat, digjen materialet e zgjedhjeve, plagosen tre policë (VIDEO)

Mark Babani, kandidati i Partisë Socialiste për bashkinë Vau Dejës ka akuzuar direkt kryetarin aktual të bashkisë Zef Hila për sulmin mbi KZAZ-në pasditen e sotme. "Absolutisht janë mirëorganizim i kryetarit të bashkisë. Unë do të kandidoj derisa të zgidhim këtë qeverisje të bashkisë vendore. Elektorati jonë nuk është përzier, se po të ishte...por ne nuk jemi për vëllavrasje, ata që i mbajnë kanë përgjegjësinë e tyre" tha ai.

Përveç se në Shkodër, në Fier e në Berat protesta ka patur edhe në Tiranë. 

Militantët e Partisë Demokratike, me në krye ish-deputetin e PD, Klevis Balliu mbrëmjen e sotme janë grumbulluar në minibashkinë nr.6 në Tiranë, në zonën e Kombinatit.

Tentativa e tyre ka qenë për të hyrë në shkollën 'Betim Muço'  ku është vendosur KZAZ për zgjedhjet lokale të 30 qershorit. Për të ndaluar këtë është vendosur një kordon policie të cilët nuk kanë lejuar që militantët e PD dhe të LSI të shkatërrojnë materialet zgjedhore ashtu siç bënë në Bushat.

Me thirrjet 'Rama ik' militantët e opozitës kanë protestuar për disa minuta dhe më pas janë larguar pa krijuar përplasje.

Deputeti i PSD-së për qarkun e Shkodrës, në koalicion me PS-në, Tom Doshi u shpreh se materialet zgjedhore që u dëmtuan do të zëvendësohen, ndërsa autorët do të dalin para drejtësisë. "U lidha me KQZ-në, do të vijnë me avion prej Sllovenia dhe ditën e shtunë materialet janë këtu. Populli nuk do të kenë asnjë shqetësim, ata që e kryen këtë akt do të japin llogari para ligjit.

Këto gjëra ndodhin në Afganistan jo në Vaun e Dejës dhe Shkodrës, të gjithë banorët nuk duhet të shqetësohen por të dielën të drejtohen në kutitë e votimit. Për ne është pozitive me parë se cfarë kanë ndërmend me bërë. Do të marrim masat që qendrat të mbrohen. Policia ka përgjegjësinë e vet në mbrojtjen e KZAZ-ve" tha ai.

Policia e Shkodrës deklaron se shkolla ku është vendosur KZAZ-ja u sulmua me bomba molotov dhe mjete të tjera të forta nga militantët e PD-së, ndërsa nga ngjarja u plagosën 3 policë. Deri tani 9 persona janë shoqëruar.

"Sonte, rreth orës 20:00 janë grumbulluar rreth 200-250 simpatizant të PD, tek KZAZ nr.6 e cila ështe ngritur prane një shkolle në Bushat, Vau i Dejës.

Gjatë protestës ata kanë sulmuar KZAZ duke përdorur bomba molotov dhe mjete të tjera të forta.

Për pasojë janë plagosur 3 punojës policie të Komisariatit Vau Dejës, që ishin në shërbim. Ata po marrin ndihmë mjekesore në Spitalin Rajonal Shkodër.

Deri tani janë shoqëruar 9 persona dhe vazhdon puna per kapjen dhe shoqerimin e personave të tjerë, te perfshire ne ngjarje.

Grupi hetimor i ngritur për çeshtjen, në bashkëpunim me Prokurorinë po kryen veprime intensive hetimore për vënien përpara ligjit të autorëve dhe drejtuesve të sulmit" njofton policia.

Shqiptarja.com siguron pamjet e momentit kur disa kutive të votimit në KZAZ-në e Bushatit në Vaun e Dejës iu vendos zjarri nga militantët e PD-së mbrëmjen e sotme pas protestës që zhvilluan. KZAZ-ja ndodhet në ambientet e shkollës profesionale 'Ndre Mjeda'.

Si pasojë e zjarrit që iu vendos shkollës brenda së cilës ndodhet KZAZ-ja nr. 6 janë dëmtuar materialet zgjedhore. Kutitë me materialet zgjedhor janë nxjerrë jashtë me shpejtësi. E ndërsa zjarrfikësja vijon punën për të shuar plotësisht flakët, në vendin e ngjarjes ndodhet deputeti socialist Tom Doshi, por edhe drejtori i Policisë së Shkodrës, Niko Brahimaj.  

Tre efektivë kanë pësuar djegie nga flakët që shpërthyen në KZAZ-në numër 6 në Bushat. Militantë të PD-së siç u shpreh edhe minsitri i Brendshëm Sandër Lleshaj, hodhën bomba molotov ndaj KZAZ-së që ndodhet në shkollën profesionale "Ndre Mjeda" në Bushat. Në një video që sjell Report Tv, shihet efektivi me dëmtime nga flakët që përfshinë flakët aty pranë.

Një nga efektivët e plagosur nga sulmi me molotov në KZAZ

Militantët e PD-së në Vaun e Dejës mbrëmjen e sotme sikur kishin lajmëruar pasi u mblodhën për të protestuar para ambienteve ku është vendosur KZAZ-ja nr. 6 në një shkollë profesionale i kanë vendosur zjarrin. KZAZ-ja ndodhet në shkollën profesionale 'Ndre Mjeda' në Bushat.

Sipas burimeve të Report Tv shkolla brenda së cilës ndodhet KZAZ-ja u sulmua me molotv, ndërsa të dhënat e para  janë për dy efektivë policie të lënduar. Lajmi prë zjarrin u konfirmua për Shqiptarja.com edhe nga sekretari i KZAZ-së në një lidhje telefonike. Ai tha se "Jemi informuar se KZAZ-ja është sulmuar, i kanë vendosur zjarrin. Ka shkuar zjarrfikësja, ka dëme materiale nga flakët".

Strukturat e PD-së janë mobilizuar në zbatim të skenarit të opozitës për të bllokuar zgjedhjet në 30 Qershor duke ndjekur modelin e Shkodrës pak ditë më parë me përplasjet që kulmuan me zjarrin që iu vendos po një KZAZ-je në shkollë.

Edhe pse prej ditësh kryebashkiakja e Shkodrës, Voltana Ademi bën thirrje se nuk do të lejojë që të kryhen zgjedhje më 30 qershor, në qytetin verior kanë mbërritur materialet zgjedhore. Këto materiale janë transportuar me kamionët e vendosur në dispozicion nga Ministria e Mbrojtjes, ndërsa në shoqërim të tyre ka qenë edhe policia.

Gjithashtu edhe në kohën kur materialet zgjedhore u shpërndanë konkretisht në KZAZ, 2 dhe 3, policia ishte prezente për të ruajtur rendin dhe mbarëvajtjen e këtij procesi.

Kujtojmë se KZAZ 2 dhe 3 të cilat janë spostuar nga Pallati i sportit dhe Shkolla Shejnaze Juka në Shkollën Industriale Arbën Broci, për shkak të sulmeve nga militantët e Partisë Demokratike.

Një urdhër i paprecedentë ky i kryebashkiakes së Shkodrës Voltana Ademi e cila ka urdhëruar të gjithë administratën e bashkisë që të dalë në punë të shtunën, në ditën e heshtjes zgjedhore, dhe të dielën, ditën e votimeve të 30 qershorit, nga ora 07:00 e mëngjesit deri në 19:00. Kjo është fasha orare e lejimit të votimit, një urdhër që duket më shumë një tentativë e hapur e Ademit për të mos lejuar administratën e bashkisë që të votojë më 30 qershor. Ky urdhër i brendshëm që mban datën 26 qershor, thuhet se vjen në zbatim të dekretit të Presidentit Ilir Meta për shfuqizimin e 30 qershorit. Urdhri është për të gjithë punonjësit e administratës, njësive administrative dhe institucioneve në varësi të Bashkisë së Shkodrës.

Urdhri i plotë:

"Mbështetur në Ligjin 139/2015 "Për vetëqeverisjen vendore", Rregulloren e Bashkisë Shkodër dhe në zbatim të Dekretit të Presidentit të Republikës së Shqipërisë, Nr.11199, datë 10.06.2019 "Për shfuqizimin e Dekretit nr 10298 datë 05.11.2018 të Presidentit së Republikës së Shqipërisë "Për caktimin e datës së zgjedhjeve për organet e qeverisjes vendore".

Urdhëroj:

1) Caktimin e ditës së shtunë dhe të dielë si ditë pune për të gjthë punonjësit e administratës, njësive Administrative dhe institucioneve në varësi të Bashkisë Shkodër nga ora 07:00 deri në 19:00.
 
2) Organizimi i punës të përcaktuar nga secila drejtori dhe institucion.

Ngarkohen të gjithë punonjësit e Administratës së Bashkisë Shkodër, Njësitë Administrative (Velipojë, Bërdicë, Gur i zi, Dajç, Rrethina, Ana e Malit, Shalë, Shosh, Pult, Postribë) Institucionet e Varësisë, (Drejtoria e Shërbimit Bujqësor dhe Pyjor, Sportklub Vllaznia, Drejtoria Ekonomike e Kulturës, Drejtoria Ekonomike Arsimit, Teatri Migjeni, Drejtoria Cerdhe Kopshte).

3) Ky urdhri hyn në fuqi menjëherë."

Në Dibër materialet janë vendosur në ambiente private pasi bashkitë nuk dhanë godinat e KZAZ-ve.

Kujtojmë se më 19 qershor materialet zgjedhore vendosur në KZAZ vendosur brenda një biblioteke u sulmuan nga militantët e PD-së. Sot, materialet zgjedhore kanë mbërritur në KZAZ nr. 17, konkretisht në Bashkinë Klos dhe janë  vendosur në një ambjent privat. Sipas nënkryetarit të KZAZ Jetmir Dedolli, grupi punës po merret me sistemimin e bazës materiale dhe ditën e shtunë do shpërndahen sipas qendrave të votimit.

PD në Shkodër ka dalë ditën e sotme në një deklaratë për mediat për të njoftuar se mbrëmjen e sotme do të zhvillojnë një protestë

"Ju bëj thirrje për protestë në orën 20:00 para KZAZ 2 tek pallati i Sportit . Shqipëria ka nevoja për ne. Shkodra ka nevojë për bashkimin tonë për t'i thënë Edvinit ndal. Ne e njohim dekretin e presidentit. Zgjedhje më 30 qershor nuk do të ketë. Lironi shkollat dhe çdo ndëtesë tjetër që e mbroni me gazin e Lleshit duke u bërë gazi i botës. Lind detyra e shenjtë për rrëzimin e diktaturës. Të kërkojmë njëzëri largimin e kryeministrit Rama", thuhet në deklaratë.

Bashkia e Shkodrës i kërkon policisë dhe Komisionit Qendror të Zgjedhjeve të lirojnë ambientet në administrim të bashkisë të përdorura si KZAZ, në të cilat kanë mbërritur tashmë materialet e votimit. Përmes një deklarate për mediat, bashkia e drejtuar nga Voltana Ademi, e zgjedhur e PD-së, e cila që në moment të parë ka dalë hapur në kundërshtim të procesit të 30 qerëshorit duke zbatuar dekretin e Presidentit Meta për anulimin e zgjedhjeve, thotë se në ambientet e KZAZ-ve janë punonjës të bashkisë që po menaxhojnë godinat. "këto godina nuk janë në dispozicion të materialeve të kujdot institucioni qofshin", thotë bashkia e Shkodrës duke ju drejtuar KQZ-së dhe Policisë së Shtetit.

Reagimi 

Përmes mediave, kemi mësuar se drejt Qarkut të Shkodrës është nisur nga KQZ-ja bazë materiale. Siç kemi informuar edhe më herët KQZ-në, në zbatim të dekretit të Presidentit të Republikës, Kodit Zgjedhor, ligjit 139/2015 “Për vetëqeverisjen vendore”, nuk ka funksionuar asnjëherë dhe aq më shumë pas datës 10 qershor 2019, asnjë e ashtëquajtur KZAZ në territorin e Bashkisë së Shkodrës.

Në asetet pronë dhe në menaxhim të Bashkisë së Shkodrës, me urdhër- pune, janë punonjës të administratës vendore që po vijojnë dhe do të vazhdojnë punën për administrimin dhe menaxhimin e godinave. Ndërkohë, në detyrë fuknsionale, punonjësit janë pajisur me urdhrin e punës dhe me shkresën dërguar më herët KQZ-së ku bëhet me dije se godina e Pallatit të Sportit dhe të tjera asete të Bashkisë Shkodër, nuk janë vënë në dispozicion nga qeverisja vendore për funksione të tjera. Në këto kushte, këto godina nuk janë në dispozicion për depozitim të materialeve të kujtdo institucioni qofshin.

Bashkia e Shkodrës i kërkon Policisë së Shtetit dhe zyrtarëve të KQZ-së, për çdo këkresë që mund të kenë për sa më sipër, t'i drejtohen me shkresë institucionit të Bashkisë Shkodër. Si deri më tani, nxisim të gjithë individët dhe institucionet të zbatojnë rigorozisht Kushtetutën, Dekretin në fuqi të Presidentit të Republikës, Kodin Zgjedhor, ligjin 139/2015 “Për vetëqeverisjen vendore”, Kartën Europiane për Autonominë Vendore. Sjellim në vëmendje që shkelja e tyre, ngarkon me përgjegjësi ligjore çdo individ apo instititucion.

Materialet zgjedhore kanë mbërritur edhe në qytetin e Kukësit, i njohur si bastion i djathtë. Ato janë transportuar nga mjetet e ushtrisë të shoqëruara nga policia e shtetit dhe janë vendosur në KZAZ nr 11, në godinën e prefekturës. Kjo godinë prej një jave ruhet nga forca të shumta policie. Gjatë transportit të materialeve nuk ka pasur probleme. Ende nuk është bërë e qartë vendndodhja e qendrave të votimit. Transporti i materialeve zgjedhore do të bëhet të shtunën mbrëma.

Pas letrës që kreu i Bashkisë Kamës Xhelal Mziu i dërgoi KQZ për lirimin e ambienteve të KZAZ 27 e 28 në këtë zonë, policia ka marrë të gjitha masat për mbarëvajtjen e ndonjë përplasje të mundshme mes efektivëve dhe simpatizantëve të PD.
Më shumë se 20 efektivë janë vendosur në KZAZ 27 në shkollën Ibrahim Rugova, e ndërsa një grup tjetër efektivësh patrullojnë në lëvizje.
Mësohet se një pjesë e uniformave blu qëndrojnë brenda ambienteve të KZAZ qe pas mbrëmjes së djeshme, me mbërritjen e materialeve zgjedhore e fletëve të votimit.
Kamza konsiderohet si një nga zonat më të nxehta për shkak edhe të tensioneve të ndodhura një javë më parë. Ndërkohë që më 30 Qershor, në ditën e zgjedhjeve është programuar se 6 grupe të FNSH-së do të jenë pikërisht në këtë zonë./ Përgati Xhensila Kodra

Kanë mbërritur në Lezhë materialet zgjedhore në KZAZ-të numër 12 dhe 13. Ato janë transportuar nga mjete të ushtrisë të shoqëruara nga forcat speciale të policisë. Nga ana tjetër policia bashkiake e Lezhës, e cila drejtohet nga PD ka kërkuar lirimin e ambienteve ku janë vendosur materialet zgjedhore.