Bebja 2 javëshe me fibroze ciste
babai: Nuk mund të kurohet këtu 

TIRANE-Siel është një bebe vetëm 2 javëshe, dhe që ditën e parë që erdhi në jetë pati probleme me shëndetin.

Ajo u diagnostikua me fibroze cistike, një sëmundje gjenetikisht e trasmetueshme dhe që prek organet e brendshme.

Babai i saj Elson Jaçaj, në transmetim live për Report Tv u shpreh se kurimi i vajzës së tij ne vendin tonë është i pamundur, pasi nuk ka mjekë specialistë, edhe pse numri i pacientëve është i konsiderueshëm.  
 
“Problemi më i madh është që këtu nuk ka një mjek specialist për këtë sëmundje. Janë mjekë të përgjithshëm pneumologë apo diçka tjetër që thjesht ndihmojnë në trajtimin e fëmijëve    por që të ketë një mjek specialist nuk ka as në QSUT as në Shqipëri, tha Jaçaj.
 
Jaçaj bën thirrje për ndihmë, që edhe vendi ynë të ketë një qendër trajtimi për fibrozën cisitke dhe që jeta e fëmijëve të zgjatet.
 
“Fillimisht kjo është një sëmundje shumë e rëndë, është gjenetike është mungesë e një enzime që pankreasi nuk e prodhon dhe duhet që në çdo vakt që ushqehet  të marrë trajtimin e duhur. Pastaj është problemi i trajtimit që këtu nuk ka kushtet e duhura. Këtu, përveçse dhe spitali nuk e mban për një kohë të gjatë, sepse janë fëmijë që duhen trajtuar shumë gjatë. Rreziku është në 5 vitet e para për sa kohë që fëmijëve iu formohen  të gjitha organet, por këtu nuk ka kushte dhe nuk ka një qendër të specializuar për këtë sëmundje që ti trajtojë”, u shpreh babai i fwmijws.  
 
Mundësia e vetme që Siel të kurohet është jashtë vendit tonë, por edhe për këtë kostot janë tejet të larta, që prindërit nuk munden ti përballojnë.
 
“Këtu në Shqipëri në fakt, shpresat janë zero. Sepse kështu më është thënë e dhe nga mjekët. Supozohet që fëmijët të trajtohen këtu 5 deri në 10 vjet dhe kaq shkon jetëgjatësia e të gjithë fëmijëve . Por unë do të bëj të pamundurën që ta nxjerr jashtë duke kërkuar ndihmën e të njohurve dhe të panjohurve si dhe të medias që të ndihmohem. Sepse jashtë Shqipërisë ka qendra trajtimi ku jeta e pacientëve shkon deri mbi 40. dhe 40 me 10 është një diferencë shumë e madhe”, tha Jaçaj.
 
Babai i Sieleit, tregon se kjo sëmundje mund të ishte diagnostikuar qysh në shtatzëni. Ndaj dhe ai bën apel për prindërit që të jenë më të vëmendshme gjatë testeve në shtatzëni, ashtu sikundër bën një thirrje ministrisë së shëndetësisë që të marrë seriozisht këtë sëmundje, duke ngritur qendrën e terapisë si dhe të ketë mjekë specialsitë.
 
“Unë i bëj apel fillimisht prindërve që të marrin guximin dhe të bëjnë maksimumin e tyre.  Gjithashtu i bëj thirrje shtetit që me aq publicitet sa i bëjnë mjekësisë, të paktën të gjejnë një mjek ta çojnë për specializim, i cili të trajnojë dhe mjekë të tjerë. Si dhe besoj nuk kushton shumë ndërtimi i një qendre për trajtimin e kësaj sëmundje”, u shpreh Jaçaj.
 
Siel, aktualisht ndodhet në reanimacionin e maternitetit Koço Gliozheni, dhe për këdo që dëshiron të ndihmojë familjen Jaçaj është i lutur të ofrojë kontributin e tij. 



Redaksia Online
B.B/Shqiptarja.com