Çasti më i vështirë dhe momenti më i bukur në 2019-ën...Kush është personazhi i vitit për kryeministrin Rama

Kryeministri Edi Rama thotë se nuk mban një ditar, megjithatë ka të shënjuar në kujtesën e tij disa ngjarje të rëndësishme të vitit që lamë pas, të vështira, të hidhura e momente të lumtura.

Çasti më i vështirë për të është ora 4 e mëngjesit e datës 26 nëntor, ku tërmeti me magnitudë 6.4 i shkallës Rihter goditi Shqipërinë.

Ngjarja më e bukur për të është ditëlindja e djalit të tij, Zahos, në përvjetorin e tij të pestë.

Më e keqja në 2019-ën ishte nata e mbledhjes së Këshilli Evropian, kur u nda fati për Shqipërinë dhe mos çeljen e negociatave për anëtarësim në Bashkimin Evropian.

A ka marrë një mesazh që e ka tronditur, që e ka lënë pa gjumë? Rama përgjigjet: Kam marrë kaq shumë mesazhe në telefon saqë në përgjithësi janë ndikim i drejtpërdrejt në pagjumësinë time se e kam këtë zakon që dua t'i përgjigjem të gjithëve.

Personazhi i vitit sipas tij është Ermal Mamaqi dhe për këtë arsyeja është qe realizoi një nga ëndrrat e tij, të aktronte.

"Zgjedh Ermal Mamaqin, se më ka bërë aktor tek filmi 'I Love Tropoja'. Duke qenë se më dha mundësinë të heq edhe një merak timin të luaja në një film për mua është personazhi i vitit që kaloi", tha Rama.

Në emisionin "Java" në RTSH, shefi i qeverisë ndau edhe një urim për gazetarët: "Të shpifin sa më pak. nuk kam asnjë armiqësi, me shtypin kam pamundësinë që të sillem si politikan, sepse vij nga një kohë kur kam milituar në radhët e shtypit të lirë dhe e ndjej si të pamundur të më sfidojnë në atë fushë duke më treguar edhe arat shpesh herë përmes broçkullave. Kam bërë paqe të plotë".

Duke komentuar me moderatorët Preç  Zogaj dhe Lorenc Vangjeli, pamjen e tij, mjekrën e zgjatur, atletet por edhe çitjanet, pyetjet se "me këto mendoni se do të marshoni drejt mandatit të tretë?", Rama u përgjigj: Me opinga, po.  "Po të shkosh më larg, janë munduar të kapen dhe pas hallateve të mia. Por kjo gjë duhet të mbyllet, jo u vesh kështu, jo ka vesh opinga. Për sa i përket mjekrës nuk kam dhënë asnjë përgjigje për anën time të jashtme, kështu që pyesni mjekrën time. Është një çështje individuale dhe duhet të mbyllet. Jam duke bërë edhe opinga të cilat janë komode shumë të mira", shtoi Rama.

A do të ketë rritje rrogash dhe rritje të pensioneve në 2020-ën? Rama tha se kjo pritet të ndodhë në vitin tjetër, 2021, ndikuar edhe nga procesi i rindërtimit pas tërmetit.

"Me siguri në vitin 2021 ndërsa duke qenë të imponuar nga axhenda e rindërtimit mendoj se do të ishte e nxituar po të thoja se kjo gjë do të ndodhte në 2020-ën", u shpreh kryeministri.

Zgjedhje të parakohshme në 2020? "Sot për sot nuk e shoh, zgjedhje mund të ketë vetëm nëse vendos PS të shkojë në zgjedhje se rrugë tjetër dhe mënyrë tjetër nuk ka", thotë Rama.

Lajmi kryesor:

Rama: Opozita do të marrë pjesë në zgjedhje!... Rrëfen çastin më të vështirë dhe më të bukur të 2019-ës

G.M./Shqiptarja.com

TAG:
• edi rama
• zgjedhje
• lulzim basha
• opozita