Rama: Opozita do të marrë pjesë në zgjedhje!... Rrëfen çastin më të vështirë dhe më të bukur të 2019-ës

TIRANË -  Kryeministri Edi Rama e ka cilësuar vitin 2020 si një fillim të ri. "2020 është një vit kyç, më i shënuar i qeverisjes sime për shkak të rindërtimit që është kryefjalë, një procesi historik në betejën me krimin që nis në ditët në vijim për të çuar një tërmet nga shteti në themelet e botës së krimit në raport me pasurinë e paligjshme të elementëve kriminalë", u shpreh kryeministri.

Vitin që lamë pas, Rama e cilësoi si periudhë e vrasjes politike të opozitës. Ai thotë se pas asaj që ndodhi, nuk do të ketë më në Shqipëri një forcë politike që të bëjë të njëjtin gabim si bojkoti, shantazhi apo braktisja e dialogjeve.

Kryeministri Edi Rama beson se opozita shqiptare që në 2019-ën mori vendimin e paprecedentë për të djegur mandatet dhe për të mos marrë pjesë në zgjedhjet vendore të 30 qershorit, tashmë do të reflektojë dhe do të marrë pjesë në zgjedhjet e ardhshme. I ftuar në emisionin "Java" në RTSh me moderatorët Preç  Zogaj dhe Lorenc Vangjeli, kreu i qeverisë u shpreh: "Unë shpresoj që gjërat të ndryshojnë. Në këndvështrimin tim kanë filluar të ndryshojnë. Se me sa duket ka rënë teza që o ik o s’ka dhe s’kemi punë me institucionet dhe me procesin demokratik brenda institucioneve. Mendoj se opozita do marrë pjesë në zgjedhje, nuk ma ha mendja që do kemi parti politike që do të lëshojnë territorin pa luftë politike ose që do tentojnë ta lëshojnë betejën në fushën e përplasjeve e me kërkesa anti-demokratike".

LEXO EDHE:
Ylli Pata: Pse opozita nuk ka fituar pikë nga hetimet e SPAK?

Përballë gjykimit të kritikëve se ishte ai personi që e shtyu opozitën drejt 'vetëvrasjes' politike, shefi i mazhorancës, ndan këtë qëndrim:

"Unë nuk kam detyrë të ndihmoj opozitën të bëhet më e fortë as që të jetë më e gatshme për të fituar zgjedhjet. Kam detyrën që në këtë sfidë me opozitën të bëj atë që është e mundur që opozita të dobësohet, natyrisht duke respektuar rregullat dhe duke ndjekur parimet e lojës demokratike pa përdorur pushtetin për ta tkurrur, intimiduar, për ta vendosur opozitën në pozitë të vështirë. Se opozita shkon drejt vetëvrasjes si rezultat i mungesës së një largpamësie strategjike, nuk më bën autor i kësaj vendimmarrje, dhe as më bën të ndihem i keqardhur. Kësaj opozite nëse i ka munguar diçka, s’ka qenë si rezultat i ushtrimit të pushtetit, por i ka munguar mendja për të pasur një skuadër dhe lidership të fortë".

Kryeministri zbuloi edhe komunikimin e fundit që ka pasur me liderin demokrat, Lulzim Basha.

"Në ditët pas tërmetit i kam çuar një mesazh për t'i sugjeruar që të jemi bashkë, dhe kaq. Para këtij momenti komunikimi i fundit ka qenë kur PD ka qenë ende në parlament", tha Rama.

Kreu i qeverisë hodhi poshtë të gjitha akuzat për kapje të sistemit të drejtësisë së re nga mazhoranca.

"Nëse ne do të kishim pasur tendenca kapje të sistemit të ri të drejtësisë nuk do të ishte e mundur që ata që e kanë sponsorizuar politikisht dhe financiarisht të mos kishin ngritur zërin, SHBA, o ne i kemi kapur të gjitha edhe drejtësinë edhe Amerikën edhe Europën, ose këtu ka diçka që nuk shkon në logjikë", tha Rama.

Shefi i mazhorancës tha se brenda vitit 2020 do të jenë ndërtuar lagjet e reja për të prekurit nga tërmeti që ju dëmtua shtëpitë dhe ju kthyen në të pabanueshme, dhe tha se këtë qeveria do ta realizojë edhe sikur të mos vijë asnjë donacion nga konferenca që do të organizojë Komisioni Evropian këtë muaj.

"Kemi dy skenarë bazë, një sikur mos të marrim asnjë euro nga donatorët, dhe një skenarë me disa përshkallëzime të mundshme si rezultat i kontributit të donatorëve. Këto do i bëjmë edhe sikur donatorët të mos japin asnjë qindarkë", tha Rama.

TAG:
• edi rama
• zgjedhje
• lulzim basha
• opozita

Sondazhi i ditës:

Si ka qene per ju viti 2024?

• I mire

  44.1%

• I keq

  22.7%

• As i mire as i keq

  33.2%

Vota total: 1507

Votat totale janë unike

• Sondazhi i ditës:

  Si ka qene per ju viti 2024?

  I mire I keq As i mire as i keq