Çështje të 'nxehta' politike, nga zgjedhjet e 30 qershorit, përplasja Rama-Meta e deri te Teatri Kombëtar/ Tashmë me 7 anëtarë, Kushtetuesja i shqyrton në janar

Gjykata Kushtetuese ka njoftuar sot se duke filluar nga muaji i ardhshëm do të nisë shqyrtimi i kërkesave, disa prej të cilave presin prej vitesh.

"Pas plotësimit të Gjykatës Kushtetuese me tre anëtarë të rinj, z. Altin Binaj, z. Përparim Kalo dhe znj. Sonila Bejtja, dhe krijimit të trupës prej 7 gjyqtarësh, sot, më 29.12.2020, u zhvillua Mbledhja e Gjyqtarëve, e cila ra dakord që në ditët e para të muajit janar të vitit 2021 të mblidhet për të shqyrtuar çështjet që sipas ligjit i përkasin për kompetencë Mbledhjes së Gjyqtarëve, si dhe për të kryer veprimet e nevojshme përgatitore dhe organizative për funksionimin e Gjykatës Kushtetuese", thuhet në njoftimin e Gjykatës Kushtetuese.

Kujtojmë se ditën e sotme u betua para presidentit anëtarja e 7 e Kushtetueses, Sonila Bejtja, duke krijuar kështu një numër të rëndësishëm për të rritur funksionalitetin e Gjykatës.  Që nga fundi i vitit 2017 deri ditët e sotme numri i dosjeve që presin për t’u shqyrtuar nga Gjykata Kushtetuese janë mbi 125.

Gjykatën Kushtetuese e presin një sërë çështjes të 'nxehta' që pritet të sjellin edhe reagime politike. Në Kushtetuese pritet të shqyrtohet  kërkesa e kryeministrit Edi Rama për mosmarrëveshjet me Presidentin Ilir Meta për emërimin dhe shkarkimin e ministrave.

Rama ka kërkuar interpretimin e pikës 1 të nenit 98 të Kushtetutës, e cila parashikon që ‘ministri emërohet dhe shkarkohet nga Presidenti i Republikës, me propozim të Kryeministrit, brenda 7 ditëve’. Mosmarrëveshja u krijua pasi presidenti Ilir Meta nuk pranoi të dekretonte Gent Cakaj si ministër të Jashtëm, çka detyroi Ramën të emërohej vetë dhe t’i delegonte detyrën Cakajt.

Zgjedhjet e 30 qershorit 2019 është një çështje që pritet të marrë vëmendjen e anëtarëve të Kushtetueses pasi opozita i cilësoi si antikushtetuese. Ka qenë kryetarja e Bashkisë së Shkodrës, Voltana Ademi e cila korrikun e kaluar ka paraqitur një kërkesë në Kushtetuese dhe kërkon verifikimin e regjistrimit në këto zgjedhje të partisë së re, Bindja Demokratike.

Një çështje e nxehtë është edhe prishja e Teatrit Kombëtar. Në Maj të 2019-s, Presidenti Ilir Meta depozitoi një kërkesë duke ankimuar ligjin për “Shembjen e Teatrit”.

Ndërkohë që vetëm sot Bindja Demokratike e Astrit Patozit dhe Lëvizja Demokratike Shqiptare e Myslim Murrizit dërguan në Kushtetuese kërkesën për shpalljen antikushtetues të nenit 168 të Kodit Zgjedhor, i cili parashikon mënyrën se si ndahen mandatet.

 Elsa Toska, Marsida Xhaferllari, Fiona Papajorgji, Altin Binaj  Përparim Kalo dhe Sonila Bejtja

Vitore Tusha

K.T./r.k./Shqiptarja.com

TAG:
• gjykata kushtetuese
• edi rama
• Ilir Meta
• teatri kombetar
• astrit patozi
• myslim murrizi
• zgjedhjet e 30 qershorit